YAKUB 3

Ha' tebaraa' tong jela'

1O kekat padéé' ké'! Semu'un néh kuraa' usah awah jin belah ka'ah nengayet ke' néh omok nebaraa'. Ka'ah jam tong uleu' éh nebaraa' adang lu' teneng petuneng palaa' éh pelapah bahat kepéh jin kelunan éh jah. 2Uleu' béé ngelayau maneu' éh sala'. Hun kelunan bé' pu'un maneu' éh sala' tong kekat ha' ané néh, Iah kelunan éh sukup mu'un. Iah omok mihau ketem lo'ong usah néh. 3Pu'un lu' masek tising lem ujun kuda kelu' omok mupah éh, ke' néh kivu sohoo' lu' ngan lakau semah-semah éh pengeloo' lu'. 4Kenat péh tong kapen, na' péh éh ja'au ngan nejuk kepu éh gahang mu'un, bang kapen inah omok nupah kelunan palaa' besai éh siik awah. Kapen inah omok tai semah-semah éh keneloo' kelunan éh mupah éh nah. 5Barei' inah péh jela' lu' na' péh éh si'ik awah, bang jam éh pané ngan bau-bau ha'.

Jian keh seruh tong kuraa'-kuraa' ke ja'au nalaa' jalan kayeu' murip pu'un potong naneu' luten éh siik awah. 6Jela' lu' barei luten. Tong usah lu', jela' lu' barei' jah tana' éh penoo' neu' kesa'at, ngan éh mihin kesa'at inah tai pah tipo usah motong ketem lo'ong urip lu' palaa' luten éh tuai jin luten meraka. 7Omok kelunan peluyaa' kekat ineu' éh jah, ka'an éh lajam, juhit, torok ngan seluang péh. 8Bang bé' pu'un jah usah péh éh omok peluyaa' jela' kelunan. Jela' nah sa'at éh bé' éh omok peluyaa' lu' ngan pu'un katah éh omok maneu' matai. 9#Kej. 1:26 Uleu' pakai jela' lu' dokoo' bara' jian kenin ngan Tuhan éh Tamen lu', ngan palaa' jela' lu' pu'un lu' maneu' kelunan éh senuai pekua' layan Allah. 10Jin ujun kelunan musit kuraa'-kuraa' ha' mejing Tuhan, musit kepéh kuraa'-kuraa' ha' maneu' kelunan. O kekat padéé' ké', bé' éh tekep pu'un kenat! 11Bé' pu'un jah usit baa' éh pepusit baa' éh mabah ngan baa' éh petuh. 12O kekat padéé' ké', inan ara, hun néh ngebuaa' bé' éh omok ngebuaa' buaa' saitun, kenat péh inan agun, hun néh ngebuaa' bé' éh ngebuaa' buaa' ara. Usit baa' éh mesem bé' éh omok pepusit baa' éh mabah kepéh.

Pengejam éh tuai jin seruga

13Jian iah pepoléng éh neu' kekat barék néh pu'un jian ngan jin kekat penganeu' éh neu' néh ngan diva' kenin ngan jam seruh. 14Bang hun keh sakit kenin ngan seruh tong usah keh tengéé', mai keh ngelapah tong ha' tebaraa' éh teneng jin Allah ngan bau kenin seruh keh pu'un pengejam. 15Pengejam éh kenat bé' éh tuai jin seruga, bang jin tana' awah jin barék kelunan éh penyala' ngan jin sahéé' éh sa'at! 16Uban semah-semah pu'un kelunan sakit kenin ngan seruh tong usah réh tengéé', Tong sinah pu'un kasau ngan kekat arong kesa'at. 17Bang kelunan éh pu'un pengejam éh tuai jin seruga pu'un éh mihin kelunan murip ni'ai, pawah, dawai kenin, ngan jian pengané. Irah pu'un pika kelunan ngan kivu kekat arong penganeu' éh jian bé' réh netah ngan ngelayoo' awah maneu' jian. 18Pengejian inah éh oléé' jin tulin pengepawah éh lepah nulah kelunan éh keloo' tong pengepawah.

Currently Selected:

YAKUB 3: PNT

Highlight

Copy

Compare