IBRANI 3

Yésus pelapah Ja'au jin Musa

1O kekat padéé' ké' lem Tuhan éh tenebai Allah, jian keh seruh tong Yésus éh tuai sohoo' Allah ke' Néh omok Imam éh pengeja'au kekat imam tong adet sebayang lu'. 2#Bil. 12:7 Yésus tigéh tong Allah éh lepah ngevéléé' Iah dokoo' maneu' kereja' inah, barei' Musa péh tigéh maneu' kereja' néh tong Umaa' Allah. 3La'ah kelunan éh suai lamin pu'un éh kenajung réh. Bé' réh ngajung lamin éh senuai néh. Kenat péh adang néh tekep Yésus péh alaa' pengaren éh pelapah ja'au jin Musa. 4La'ah siget-siget lamin pu'un éh senuai kelunan, bang Allah éh suai kekat ineu'-ineu'. 5Musa tigéh barei' kelunan sohoo' dalem Umaa' Allah. Iah bara' tong kekat éh juk benara' Allah jaka' temurei' kepéh. 6Bang Kristus nah Anak Tuhan mu'un, tigéh mu'un éh mihau umaa' Allah. La'ah uleu' néh umaa' Allah, inah éh hun lu' ngereken kenin lu' ngan petem pengelan lu' omok alaa' ineu' éh kepelum lu'.

Tong lu' mokoo' ngan Tuhan

7Uban barei' éh benara' Sahéé' Ni'ai, ka' ha' Néh,

Dau iteu' hun keh menéng ha' Allah,

8mai keh mahéng kenin barei' tepun keh irah ngelawan Allah,

barei' hun réh tupat Allah tong tana' pengawa sahau rai.

9Tong sinah tepun keh tupat Akeu'

ngan silam ku' ha' Allah,

na' péh irah lepah na'at ineu' éh naneu' ké' kelebéé' pat poloo' taun.

10Inah maneu' Akeu' merek ngan réh ngan bara' ka',

irah ngelayau ngelapah ha'

ngan bé' keloo' kivu sohoo' ké'.

11 # Msm. 95:7-11 Akeu' merek ngan pejajii',

bé' réh omok masek tong tana' inah dokoo' réh omok posot pemung ngan ké'.

12O kekat padéé' ké', mavaa' keh jian-jian, mai pu'un séé'-séé' péh éh pu'un kenin sa'at éh bé' ngelan tong Tuhan pah avéé' néh piso jin Allah éh murip. 13Bang dai pu'un kelunan éh kelavo' penyala' ngan mahéng kenin, jian keh nolong petolong, ngereken kenin siget usah ngan siget dau, jian keh nolong petolong ngereken kenin siget usah kelebéé' lu' to murip lem jaka' éh nateng Dau iteu barei' éh benara' lem surat Allah. 14Uleu' béé pu'un pekua' kereja' ngan Kristus, hun lu' avéé' ga' néh petem ngamit pengelan éh pu'un ngan lu' jin bu'un néh.

15 # Msm. 95:7-8 Uban ka' ha' surat Allah,

Dau iteu' hun keh menéng ha' Allah,

mai keh mahéng kenin barei' tepun keh sahau

tovoo' réh ngelawan Allah.

16 # Bil. 14:1-35 Séé' réh éh menéng ha' Allah ngan éh ngelawan éh kepéh? Kekat irah éh nihin Musa piso jin tana' Mesir. 17Ngan séé' Allah merek avéé' pat poloo' ta'un kelebéé' nah? Iah pu'un merek ngan irah éh maneu' penyala' ngan éh matai tong tana' pegawa. 18Hun Allah bara', adang irah bé' omok masek tong tana' inah, ke' réh omok posot pemung ngan ké', séé' éh benara' néh inah? Irah éh ngelawan Allah. 19Hun iteu' uleu' jam irah bé' omok masek tong tana' inah, uban réh bé' keloo' ngelan tong Allah.

Currently Selected:

IBRANI 3: PNT

Highlight

Copy

Compare