GALATIA 6
6
Nolong kelunan éh jah lem penusah néh
1O kekat padéé' ké', hun keh jam séé'-séé' péh maneu' penyala', tekep ka'ah éh penoo' neu' Sahéé' Tuhan, dawai kenin peteneng jalan néh, ngan mihau usah keh kepéh dai keh sioo' tenupat kepéh. 2Tekep keh nolong kelunan éh jah lem penusah néh, kenat jalan keh kivu sohoo' Kristus. 3Uban hun jah usah seruh usah néh tengéé' jian jin kekat irah éh jah, éh mu'un néh bé' éh kenat, hun iah seruh éh pu'un jian kenat, inah iah ngelavo' usah néh awah. 4Tekep siget usah petuneng kereja' néh tengéé', hun kereja' néh pu'un jian boh éh omok murung kenin ngan bé' makat pitah kelunan éh jah mejing iah. 5Uban tekep siget usah ngamit penusah néh tengéé'.
6La'ah kelunan éh pekalai tong tebaraa' Kristus, tekep iah mena' tulat jin kekat-kekat éh nalaa' néh éh jian ngan irah éh nebaraa' éh.
7Mai keh ngelavo' usah keh tengéé'. Mai keh seruh Allah bé' jam ineu'-ineu' éh penganeu' keh. Barei' éh nulah kelunan kenat ke' éh najau néh kepéh.
8Uban kelunan éh mulah kekat barék éh sa'at lem kenin néh, neu' néh kivu pengagat dalem kenin néh éh sa'at, iah majau éh kepéh, ajau néh inah mihin éh matai awah. Kenat péh kelunan éh mulah kekat éh jin Sahéé' lem kenin néh, iah péh majau éh kepéh, ajau néh inah mihin éh alaa' urip pelinguh. 9Hun néh kenat mai lu' leko maneu' jian, uban hun lu' nengayet maneu' jian, omok lu' majau éh kepéh. 10Uban néh kenat siget koléé' hun lu' na'at kelunan lem penusah néh, tekep lu' nolong réh, makin péh ngan kekat padéé' lu' éh ngelan tong Tuhan.
Ha' tepat Paulus ngan tabi'
11Kebit mu'un ha' éh senurat ké' tengéé'. 12La'ah kelunan éh bau kenin éh keloo' pané tong kekat adet kelunan awah, inah éh nyohoo' ka'ah pesunat. Irah maneu' kenat dokoo' mai kelunan éh jah peketa réh uban hun réh bara', Neu' pengematai Kristus tong salib, inah awah jalan kelunan omok alaa' urip Tuhan, hun réh pané kenat adang irah Yahudi peketa réh. 13Uban irah éh pakai adet sunat nah, bé' réh kivu kekat sohoo' lem Surat Musa, bang irah keloo' ka'ah sunat dokoo' réh omok ngajung usah réh ngan kelunan éh jah uban ka'ah kivu sohoo' réh kenat. 14Bang tong akeu', jah awah éh juk kenajung ké', inah éh tong pengematai Tuhan lu' Yésus Kristus. Uban neu' Néh matai tong kayeu' salib, kekat-kekat éh tong tana' iteu' tuyah-tuyah awah ngan ké'. Akeu' péh seleket matai ngan kekat-kekat éh pu'un tong tana'. 15Uban na' péh kelunan pu'un pesunat ngan bé' pesunat péh, bé' éh ineu', inah awah éh pu'un gunah, hun kelunan pu'un alaa' urip maréng lem kenin néh. 16Jian pengepawah ngan penika Tuhan pu'un ngan kekat ka'ah éh pu'un alaa' urip maréng, kenat péh ngan kekat kelunan éh anah Tuhan semah-semah péh.
17Inah ga' ha' ké', jin la'o iteu' mai jah usah péh petusah kenin ké' kepéh. Kekat ila tong usah ké' neu' kelunan éh bé' ngelan éh maneu' akeu' lepah rai, inah éh pekelenaa' akeu' kelunan sohoo' Yésus.
18O kekat padéé' ké', jian penika Tuhan Yésus Kristus pu'un ngan ka'ah béé, Amin.
Currently Selected:
GALATIA 6: PNT
Highlight
Share
Copy
Want to have your highlights saved across all your devices? Sign up or sign in
Irah éh suai © 2009, Pengepemung irah éh suai Surat Tahun tong Malaysia (The Bible Society of Malaysia) Copyright © 2009 The Bible Society of Malaysia
Éh Keruwah koléé senuai © 2011 Pengepemung irah éh suai Surat Tahun tong Malaysia (The Bible Society of Malaysia) Copyright 2011 The Bible society of Malaysia