GALATIA 4

1La'ah iteu' éh benara' ké', anak éh tekep alaa' kekat-kekat livah tamen néh hun tamen néh matai, kelebéé' néh anak keto, iah péh barei' kelunan sohoo' awah na' péh kekat livah inah juk anah nah béé. 2Kelebéé' néh si'ik keto, kelunan éh jah mihau éh, ngan mihau kekat livah inah, pah avéé' jaka' néh omok alaa' éh kunah tamen néh. 3Hun lepah rai, hun lu' to bé' jak sukup kenin tong Tuhan, uleu' péh barei' anak awah, keripen awah kivu kekat sohoo' ngan adet tong tana' iteu'. 4Bang avéé' tong jaka' éh kevéléé' Allah, inah éh nyohoo' Anak Néh mu'un tuai, Iah tuai tong tana' ngan tinen Néh kelunan jin tana'. Anak Néh inah pu'un éh kivu sohoo' lem Surat Musa, 5ke' Néh ngelepu lu' jin kamit sohoo' lem Surat Musa nah dokoo' uleu' béé omok anak Allah kepéh.

6La'ah dokoo' uleu' omok jam uleu' pu'un paléu anak Néh, Allah mena' Sahéé' Anak Néh lem kenin uleu', Sahéé' inah éh bara', O Amam, O Amam. 7#Rum. 8:15-17 Uban néh kenat bé' ka'ah kelunan ripen kepéh, bang ka'ah anak Tuhan, ngan hun keh anak Néh, ka'ah péh omok alaa' kekat éh juk nena' Allah ngan irah éh anak Néh.

Besau kenin Paulus uban kelunan Galatia petat

8Hun lepah rai bé' keh jam Allah bang ka'ah pu'un kivu kuraa' arong allah éh adek ke' awah. 9Bang hun iteu' uban keh lepah jam Allah, éh mu'un néh Allah éh jam keh, uban ineu' keh juk keripen sahéé' ngan kekat-kekat éh kenat, éh lemoo' ngan sa'at awah? Uban ineu' keh juk alaa' éh pengeja'au keh kepéh? 10Uban keh pu'un mihau kuraa' dau ngan kuraa' laséh, ngan ta'un péh, inah keh seruh keh kivu Tuhan mu'un. 11Medai ku' seruh keh kenat, dai kekat kemutau ké' kereja' ngan keh rai, tuyah-tuyah awah.

12O kekat padéé' ké', akeu' nyohoo' keh kivu Tuhan barei' akeu' péh, uban akeu' péh kelunan pekua' ka'ah ke'. Na' péh akeu' pané kenat, bé' makat ka'ah maneu' sala' ngan ké'. 13Bang tong jalan bu'un-bu'un ké' tuai perengah Rengah Jian ngan keh rai, ka'ah péh jam éh, pu'un ku' tai uban ké' sakit. 14Bé' ka'ah leko tong kesakit ké' nah, bé' keh bet akeu', na' péh keh tusah mu'un na'at ku' sakit kenat, pu'un keh alaa' akeu' barei' alaa' jah meliket Tuhan, éh mu'un néh ka'ah alaa' ku' barei' hun néh usah Kristus Yésus mu'un. 15Murung kenin keh hun irai, mah lah kekat kemurung keh irai kepéh? Uban akeu' jam hun keh omok nirok mega' tulin maten keh dokoo' mena' éh tong akéé', keloo' keh kenat. 16Kineu' kepéh kenin keh hun iteu', akeu' éh barei' ayau keh uban ké' bara' kekat éh teneng ngan keh?

17Gahang mu'un irah éh jah ngajung ka'ah, bé' éh uban réh keloo' maneu' jian, bang uban irah keloo' petengéé' keh jin akeu' dokoo' ka'ah omok ngajung irah kepéh. 18La'ah jian ke' éh kelunan ngajung keh jin kenin réh mu'un, bé' makat hun ké' pu'un na'at keh awah. 19O kekat anak ké', barei' hun lepah rai akeu' keta mu'un lem kenin juk mihin keh ngelan tong Kristus, kenat péh hun iteu' kepéh, akeu' keloo' kéh pepit mu'un ngan sukup mu'un kenin lem Kristus. 20Keloo' mu'un-mu'un akeu' pemung ngan keh hun iteu', dokoo' ké' omok ngepaléu kenin ké' éh bahat iteu'. Bahat mu'un-mu'un kenin ké' seruh keh.

Hagar ngan Sara jah layan éh lenaa'

21Akeu' juk neteng ka'ah éh juk kivu kekat sohoo' lem Surat Musa dokoo' alaa' urip, bé' keh jam tong ha' tebaraa' lem surat inah kei? 22#Kej. 16:15, 21:2 Pu'un éh bara' Abraham duah anak, jah anak néh ngan Hagar redo ripen, jah anak néh kepéh ngan Sara, redo néh mu'un. 23Anak néh ngan Hagar redo ripen nah, pu'un éh uban roh pemung barei' kemalai kelunan awah, bang anak néh ngan redo néh mu'un, pu'un éh uban Tuhan kivu jajii' Néh ngan Abraham ngan mena' anak inah ngan rawah. 24Rawah anak inah barei' ha' tapan ngan lu' kepéh tong urip lu' lem Tuhan. Rawah redo inah ha' tapan tong duah jajii' Tuhan. Jah jajii' Néh nena' Néh ngan Musa tong tokong Sinai éh tong tana' Arab éh tana' Hagar nah. 25La'ah Hagar nah ha' tapan kepéh tong Yérusalem éh leboo' Yahudi, éh keripen pemung ngan kekat irah éh pohoo' néh inah. 26Bang Sara nah ha' tapan tong jajii' Tuhan éh keruwah nah, éh bara' tong Yérusalem éh tong seruga éh seleket tinen lu'. Iah éh pelepu ngan kekat uleu' éh anak néh pu'un lu' pelepu kepéh. 27#Yes. 54:1 Barei' ha' lem Surat Allah éh bara' ka',

O redo éh bé' pu'un anak, murung kenin ko', ka'au' éh bé' jam sakit nganak uban ko' bé' pu'un anak, mejui ke' ngan ngelahap murung kenin. Uban redo éh bé' pu'un lakei' néh pelapah pinaa' anak jin redo éh pu'un petem lakei'.

28O kekat padéé' ké', ka'ah péh anak Allah neu' jajii' Néh, pekua' Ishak anak Abraham éh pu'un neu' jajii' Tuhan. 29#Kej. 21:9 Uban hun sahau rai, Ismael éh anak redo ripen, pu'un éh peketa Ishak éh pu'un neu' Sahéé' Tuhan, kenat péh hun iteu' kepéh. 30#Kej. 21:10 Bang kineu' ha' lem Surat Allah? Ha' lem Surat Allah bara', ka' éh, Bet redo ripen ngan anak néh uban redo ripen bé' omok alaa' livah tamen néh pemung ngan anak redo éh bé' ripen, ha' Néh. 31O kekat padéé' ké', uban néh kenat, bé' uleu' anak redo ripen, bang uleu' anak redo éh bé' ripen.

Currently Selected:

GALATIA 4: PNT

Highlight

Copy

Compare