1 TIMOTIUS 2

Kineu' lu' sebayang

1La'ah bu'un-bu'un akeu' nyohoo' dokoo, sebayang menyat ngan bara' jian kenin ngan Allah tulat kekat kelunan. 2Ngan irah raja' kenat péh irah éh pu'un penyukat. Sebayang ngan Allah dokoo' uleu' omok murip ngida ngan pawah. Uleu' tekep seva' Allah ngan Jian tipan ngan kekat kelunan. 3Jian uleu' sebayang kenat uban inah jalan éh ngepayoo' kenin Allah éh purip lu'. 4Adang Iah keloo' kekat kelunan alaa' urip Néh ngan jam tong ha' tebaraa' éh teneng éh omok purip éh. 5Allah jah awah, ngan Kristus Yésus Iah awah éh jalan éh omok mihin lu' pemung jah awah kepéh ngan Allah. Kenat péh Kristus inah Iah malui kelunan mu'un. 6Yésus mena' usah Néh penatai réh dokoo' ngelepu kekat kelunan, inah éh telana' éh benara' Néh sioo' jaka' éh kevéléé' Néh éh jalan lu' omok jam adang Iah keloo' kekat kelunan alaa' urip Néh. 7#2 Tim. 1:11 Kenat péh jalan Tuhan ngevéléé' akeu' lawah Néh ngan nyohoo' ku' tai nebaraa' irah éh tengéé' pohoo' jin irah Yahudi dokoo' ké' nebaraa' réh tong pengelan tong Tuhan éh jalan éh teneng. Pu'un ku' pané mu'un bé' ku' kenyo.

8Akeu' keloo' irah lakei' sebayang semah-semah péh ngan kenin éh Ni'ai, bé' pu'un kemerek kenat péh pepaneu'. 9#1 Ptr. 3:3 Kenat péh akeu' keloo' kekat redo jam nipet tong pakai néh. Jian éh pakai kekat éh jian ngan éh tekep, mai éh pakai éh ke' néh no'é' kelunan. Mai réh manyam bok réh nyavuu' anyam éh tengéé' jin kemalai réh ngan mai réh pakai mas ngan talem mutiara ngan pakai seput éh ma'an belih éh palaa' réh ngejian layan usah réh dokoo' kelunan éh jah magat réh awah. 10Jian réh pekerayung usah réh palaa' kekat penganeu' éh jian éh nolong kelunan éh jah, inah barék éh tekep ngan redo éh ngelan ngan kivu Tuhan. 11Jian kekat redo pekalai mokoo' kelem ngan diva' kenin. 12Bé' akeu' buhaa' irah redo nebaraa' ngan pu'un penyukat bau irah lakei', jian irah mokoo' kelem awah. 13#Kej. 2:7,21-22 Uban Adam éh tenah senuai Tuhan, la'o inah boh éh Awa'. 14#Kej. 3:1-6 La'ah bé' éh Adam éh pu'un lavo' rai, bang redo néh éh lavo' nah, ngan redo néh éh ngelapah tong sohoo' Allah. 15Bang redo omok alaa' urip neu' pu'un anak, inah éh hun néh pu'un petem dalem pengelan néh, ngan pika ngan kekat éh ni'ai ngan jam seruh.

Currently Selected:

1 TIMOTIUS 2: PNT

Highlight

Copy

Compare