1 PÉTERUS 4

Tong urip maréng

1La'ah uban Kristus lepah tagong pengeketa tong usah Néh, jian ka'ah ngegahang kenin keh palaa' penyeruh éh pekua' kenin Kristus. Éh ke' néh kenat uban séé'-séé' éh tagong pengeketa tong usah néh, bé' iah maneu' penyala' kepéh. 2Kelebéé' keh murip keto tong tana', jian keh murip kivu pengeloo' Allah, mai keh murip kivu pengagat usah keh awah. 3Hun sahau rai, lepah lebéé' tenéh keh maneu' ineu' éh keloo' naneu' kelunan éh bé' jam Allah. Ka'ah murip maneu' barék éh sa'at. Ka'ah murip mavuk, kuman nyahan mesep baa' maneu' mavuk, ngan seva' butun éh ngejelemih nah. 4Bang hun iteu' irah éh bé' ngelan tong Allah, béé kenin réh ngan sa'at kenin réh, uban keh bé' pu'un pemung ngan réh maneu' barék éh sa'at pekua' sahau nah, uban néh kenat nah ke' réh muau keh awah. 5Bang irah tekep bara' tong urip réh ngan Allah éh sedia petuneng kelunan éh murip ngan éh matai péh. 6Uban néh kenat, inah néh ke' réh bara' Rengah Jian nah, jian péh éh ngan kelunan éh lepah matai rai, dokoo' na' péh réh teneng ukum éh kemalai teneng tong kelunan, sahéé' réh éh omok murip pekua' pengeloo' kenin Allah. Éh ke' réh kenukum kenat, uban penyala' neu' réh kelebéé' réh murip tong tana' iteu' rai, bang Allah mena' bi'en ngan réh dokoo' réh omok alaa' urip éh pelinguh.

Jian pakai kekat pengena' Tuhan dokoo' nolong kelunan éh jah

7La'ah sioo' pengega' tana' lepah danii', jian keh mihau kenin keh ngan seruh jian-jian, dokoo' keh omok sebayang. 8#Ams. 10:12 Éh pelapah gunah éh tekep ka'ah maneu', inah éh pika ngan pepika ngan kekat kenin keh uban neu' keh jam pepika kenat pinaa' penyala' omok pega'. 9Jian ka'ah alaa' kelunan éh nyakai tong lamin keh ngan jian kenin, mai keh leko alaa' réh. 10Jian siget usah tigéh maneu' kereja' Tuhan uban pinaa' arong pengena' Allah dalem kenin kelunan dokoo' lu' nolong kelunan éh jah. Jian keh tigéh dalem kekat pengena' Néh inah. 11Séé'-séé' éh juk nebaraa' kelunan, jian iah bara' ha' éh jin Allah. Hun keh pu'un pengena' dokoo' nolong kelunan éh jah, jian keh nolong réh neu' pengegahang éh nena' Allah ngan keh. Dokoo' dalem kekat-kekat néh béé, Allah pu'un kenajung lem Yésus Kristus. Kristus éh pu'un pengaren ngan penyukat pah avéé' pelinguh. Amin.

Tong kelunan éh teneng pengeketa uban réh ngelan tong Tuhan

12O kekat bakéh ké', mai ka'ah béé kenin dalem pengeketa iteu', pengeketa inah pekua' luten éh palaa' réh memarem mas, mai keh barei' kelunan éh tejeu' tong pengeketa ngan mujah kenin seruh. 13Bang jian ka'ah murung kenin uban keh pu'un pemung ngan Kristus dalem pengeketa Néh. Uban barei' ka'ah pu'un pemung ngan Néh dalem pengeketa Néh hun iteu', kenat péh ka'ah omok murung hun Néh tuai lem kekat pengaren kepéh. 14Murung kenin ka'ah hun réh pekenyaa' keh uban keh kivu Kristus, uban hun néh pu'un kenat, inah pepoléng Sahéé' éh maren, inah éh Sahéé' Ni'ai pu'un dalem keh. 15Mai éh uban keh maneu' barék éh sa'at barei' kelunan éh mematai kelunan kenat péh nekau, kenat maneu' kekat arong éh sa'at, kenat péh uban néh kasau kereja' kelunan éh jah. 16Uban hun keh teneng pengeketa uban ngaran keh Kristén, mai keh menyaa', bang jian keh mejing Allah, uban keh anah Kristus.

17Uban avéé' lah jaka' Allah petuneng kekat kelunan, bu'un-bu'un Iah juk petuneng irah éh anah Nah. Hun uleu' éh ngelan saa' tenah petuneng Néh, matek tusah mu'un tong ga' néh ngan kelunan éh bé' ngelan tong Rengah jian éh jin Allah pu'un kenat tong uleu' éh ngelan, kineu' kepéh tong kelunan éh pohoo' néh bé' ngelan tong Rengah Jian éh jin Allah? 18#Ams. 11:31 Uban pu'un éh barei' ha' dalem surat Allah, ka' éh,

Hun kelunan éh ngelan ma'an alaa' urip,

kineu' éh tong kelunan éh bé' ngelan ngan éh maneu' penyala' péh?

19Hun néh kenat kelunan éh pu'un keta uban pengelan réh tong Allah, jian irah petem maneu' jian ngan mena' usah réh ngan Allah éh bu'un-bu'un suai réh kelunan ke' Néh mihau réh uban Tuhan éh tigéh.

Currently Selected:

1 PÉTERUS 4: PNT

Highlight

Copy

Compare