1 KORINTUS 5

Tong kelunan sidang éh petuyang

1 # Ula. 22:30 Pu'un ku' menéng ha' réh bara' rengah jin ka'ah. Tusah kenin ké' menéng éh. Éh benara' réh, pu'un kelunan sidang éh petuyang. Éh mu'un néh pelapah sa'at jin barék kelunan éh bé' ngelan tong Tuhan, uban néh petuyang ngan tinen keruwah néh. 2Kineu' ka'ah ngajung usah keh hun kelunan pu'un maneu' kenat? Jian keh besau kenin, ngan kelunan éh maneu' kenat tekep keh pepiso éh jin sidang keh. 3Na' péh usah ké' pu'un juu', bang kenin ké' pu'un pemung ngan keh, ngan dalem ngaran Tuhan Yésus, akeu' ngukum kelunan inah, pekua' barei' hun usah ké' pu'un ngan keh sinah. 4Na' péh usah ké' bé' pu'un sinah, dalem kenin ké' akeu' pu'un pemung ngan keh sinah, ngan hun ka'ah petipun, neu' penyukat Tuhan Yésus éh pu'un pemung ngan uleu', 5jian keh pepusit éh jin sidang keh, mena' éh ngan Sitan, boh éh jihah. Hun keh maneu' kenat, na' péh usah néh jam matai, bang sahéé' néh omok éh murip tovoo' Tuhan Yésus tuai kepéh.

6 # Gal. 5:9 Bé' tekep keh ngajung usah keh kenat. Kineu' keh, bé' keh jam tawan-pekevat tepong, na' péh éh si'ik awah, omok éh pekevat kekat lugung tepong? 7#Kel. 12:5 Jian keh bet tawan-pekevat, éh lepah lebéé' tenéh, inah éh penyala', dokoo' keh omok jah lugung tepong éh maréng kepéh, éh bé' pu'un vat neu' tawan pekevat. Jian keh maneu' penguman éh sohoo' Tuhan ngan kenin éh ni'ai ngan jian. Uban Dau Ja'au Paska uleu' lepah petenup, uban Kristus éh Domba Paska uleu' lepah penatai réh. 8#Kel. 13:7, Ula. 16:3 Mai lu' ngeja'au Dau Ja'au Paska lu' palaa' roti éh pu'un tawan-pekevat, inah éh penyala' ngan kekat kesa'at. Bang maneu' éh ngan kekat éh jian ngan teneng.

9Lem surat éh senurat ké' lepah rai, pu'un ku' meta' keh pebakéh ngan kelunan éh sa'at barék ngan petuyang. 10Tong ha' ké' kenat, bé' akeu' pané tong irah éh bé' jak ngelan tong Tuhan éh petuyang, ngan éh magat juk alaa' mekum, ngan éh nekau ngan éh pakai butun. Hun akeu' meta' keh pebakéh ngan kelunan kenat, seleket ké' nyohoo' keh piso jin tana' iteu' mu'un. 11Bang tong ha' ké' rai, akeu' nyurat meta' keh pebakéh ngan kelunan éh bara' iah jah padéé' dalem Tuhan, bang barék néh sa'at ngan petuyang, ngan magat juk alaa' mekum, ngan pakai butun, ngan ngesa'at ngaran irah éh jah, ngan mavuk ngan nekau péh. Éh mu'un néh bé' tekep keh kuman ngan kelunan éh kenat.

12-13 # Ula. 13:5, 17:7 Bé' akeu' petuneng barék kelunan éh to bé' jak ngelan Tuhan. Allah omok petuneng ngan ngukum réh. Bang tekep ka'ah petuneng barék kelunan tong sidang. Barei' ha' lem Surat Allah, Pepusit kelunan éh sa'at barék jin belah keh, ha' Néh.

Currently Selected:

1 KORINTUS 5: PNT

Highlight

Copy

Compare