Salmo 86
86
Kararag Di Ipogaw Ay Magay Bael Na
1Apo, dengngem koma ya patgam nan kararag ko,
tan kaseseg-angak ya magay bael ko.
2Diyos ay pantalkak, somalaknib ya omisalakan ka,
tan napodnoak ay mansilbi en sik-a.
3Apo, maseg-ang ka koma,
tan maninsin-agew ay mankararagak en sik-a.
4Paragsakem koma nan mansilsilbi en sik-a,
tan di pankararagak et sik-a.
5Nakasagana ka ay mamakawan ya managseg-ang ka,
adi manbalbaliw din layad mo sin mankararag en sik-a.
6Dengngem koma nan kararag ko
ay mankedaw si badang mo.
7Mankararagak en sik-a sin timpon di ligat ko,
tan patgam din kararag ko.
8Magay Diyos ay makaison sik-a, Apo,
magay makaamag sin inam-amag mo.
9Amin ay nasyon ay insaad mo et omali dan to,
mandokmog dan sik-a ay mangidayaw sin ngadan mo.
10Tan nangato ka, din amagem yan nakaskasdaaw da,
magay odom ay Diyos mo adi et sik-a.
11Itdom ay Diyos di pandanak ay kosto
ta say napodnoak ay mamati en sik-a, Apo.
Omiturong ka ta maimongsan di nemnem ko
ay mangipateg sin ngadan mo.
12Naimposoan di pan-iyamanak en sik-a, Apo,
idaydayaw kos sik-as eng-enggana, Yahweh ay Diyos ko.
13Tan din layad mon sak-en et palalo ay dakdake,
et inmisalakan ka sin pese.
14Komonkontra din mankakekedse ya mangipapangatos awak da,
ipogaw ay adi mangikaskason sik-a.
Nantotolag da en pomse da.
15Ngem sik-a, Yahweh ay Diyos, et managseg-ang ka,
naanos, managlayad ya napodno ka.
16Somagong ka koma ta someg-ang ka,
tan mansilsilbiak en sik-as eng-enggana.#86:16 Din kanana sin Hebreo et: esaak ay anak di babai ay bag-en mo. Din anak di bag-en et maibilang ay bag-en engganas tongpal biyag.
Maseg-ang ka kod ta omipabikas ya omisalakan ka.
17Ipailam koman sak-en din kinasiged mo
ta maibabain din kalaban ko
mo ilaen da ay linmiwliwa ya binmadang ka, Apo.
Currently Selected:
Salmo 86: KD
Highlight
Copy
Compare
Share
Want to have your highlights saved across all your devices? Sign up or sign in
© 2000, 2017 Wycliffe Bible Translators, Inc. All rights reserved.
