Salmo 80
80
Kararag Para Sin Nasyon Ay Israel
1Sik-a ay mangay-ayowan ya mangipangpango en dakami,
dakami ay Israelita ay polin Jose,
Dengngem kod nan adawag mi,
tan kaman mon karnero si dakami.
Sik-a ay tinmotokdo sin tronom sin ngaton din kerubim,#80:1 Din kerubim yan napayakan ay sinan paparsua ay wada sin kaleb di Baol di Tolagan. Ilaen sin Exodo 25:18-22.
2ipailam kod panakabalin mo en dakami ay polin Efraim
ya tribun da Manasses en Benjamin,
omali ka ay en omisalakan.
3Apo Diyos, itaolim kod din sigod ay kasasaad mi.
Maseg-ang ka koma ta isalakan mos dakami.
4Yahweh ay Diyos ay Kangatoan ay Turay,
adi ka kod pabayagen san bonget mo
en dakami ay ipogaw mo
ta dengngem nan adawag mi.
5Kaman ladingit di inpakan mon dakami
ya ad-ado ay lowa di inpainom mon dakami.
6Inpalobos mo ay din kaibaw mi sin nandinmang ay il-ili
yan pan-iibawan da din daga mi ya sis-iyekan das dakami.
7Diyos ay Kangatoan ay Turay, itaolim kod dakami
sin sigod ay kasasaad mi.
Maseg-ang ka kod ta isalakan mos dakami.
8Esa ay obas di kaiarigan mi ay ipogaw mo
ay en ka inkaan ed Egipto,
et inmolam si odom ay daga
ay inpakaan mo di ipogaw na.
9Nilinisam din daga ta say gomabayana.
Linmamot et kinmalapkap sin intiro ay daga.
10Din dontog ya dadakke ay kaiw et linidomana.
11Dinmateng sin baybay din panga na
enggana sin ginawang sin bas-il na.
12Apay nga dinadael mo din alad na
et amin ay malabas yan alaen dan lames na?
13Din bango et dadaelen da
ya din odom ay animal et kanen da.
14Diyos ay Kangatoan ay Turay ay wadad daya,
mansagong ka koma.
Man-osdong ka ta ilaem ya ayowanam dana,
15nan obas ay en ka inmola.
16Kinsat di kaibaw mi ya pinooan da.
Ilaem kod ta dosaem daida.
17Din ipogaw ay pinilim ya indawtam si pigsa
ta mansilbi en sik-a,
ayowanam ya salaknibam sisya.
18Ipalobos mo ay matago kami koma
ta mandaydayaw kamin sik-a
et adi mi polos dokogan sik-a.
19Yahweh ay Diyos ay Kangatoan ay Turay,
itaolim kod dakami sin sigod ay kasasaad mi.
Maseg-ang ka koma ta isalakan mos dakami.
Currently Selected:
Salmo 80: KD
Highlight
Copy
Compare
Share
Want to have your highlights saved across all your devices? Sign up or sign in
© 2000, 2017 Wycliffe Bible Translators, Inc. All rights reserved.
