Salmo 62
62
Si Diyos Di Somalaknib
1Si Diyos anggoy di enak pantalkan,
anosak ay sed-en din ena omisalakanan.
2Sisya anggoy di somalaknib ya omisalakan,
adiak maabak tan sisyay enak pankamangan.
3Amin kayo, ay adi kayon somaldeng ay pomalpaligat
tan nay ay maiarigak si matoktokang ay alad?
4Layden yo anggoy ay mangipababa
en sak-en ay nangato di saad na.
Maragsakan kayo sin pan-etekan yo.
Mayat din kali yo ngem sin nemnem yo yan babbaosan yo.
5Si Diyos anggoy di pantalkak,
sisya di pannamnamaak.
6Sisya anggoy di somalaknib ya omisalakan.
Adiak polos maabak tan sisyay enak pankamangan.
7Si Diyos anggoy di omisalakan ya mangidawat si dayaw ko,
maiarig si pankamangan ay dakdake ay bato.
8Dakayo ay ipogaw, mantalek kayon Diyos Apo.
Ibaga yon sisya amin di problima yo,
tan sisya di pankamangan tako.
9Din ipogaw yan owat dagem di kaiarigan da,
nangato ono nababa yan nan-iiso ay magay silbi da.
Mo timbangen et magay dagsen da,
mayap-ew mo dagem di timbang da.
10Adi kayo mantalek si kabaelan yo
ay mamaligat ono mangegyat si ib-a yo
ta say bomaknangan yo.
Adi kayo aben mantalek si inakew yo.
Olay matapian din kinabaknang yo,
baken say pantalkan yo.
11Baken owat namingsan ay inbagan Diyos ay manakabalin sisya
12ya adi manbalbaliw din layad na.
Gon-gonaana amin ay ipogaw insigon sin inamag da.
Currently Selected:
Salmo 62: KD
Highlight
Copy
Compare
Share
Want to have your highlights saved across all your devices? Sign up or sign in
© 2000, 2017 Wycliffe Bible Translators, Inc. All rights reserved.
