Salmo 21
21
Iyaman Begew Sin Nangabakan Di Ari Sin Kalabana
1Apo, manragragsak din ari tan pinapigsam sisya,
nangabakem et palaloy ragsak na.
2Pinatgam din kararag na
et indawat mo din laydena.
3Inmey kan sisya ya ad-ado ay bindisyon di inkoyog mo,
sin toktok na, korona ay balitok di inpeey mo.
4Biyag di kindaw nan sik-a,
yan indawat moy biyag ay eng-enggana.
5Madaydayaw din ari gapo sin badang mon sisya,
nanbalinem ay nangato ya mandinamag di ngadana.
6Wadan sisya din bindisyon mos eng-enggana,
gapo sin kawadam, palalo di ragsak na.
7Diyos ay Kangatoan, mantalek din ari en sik-a,
gapo sin layad mo, mantoltoloy di panturayana.
8Depapen din ari am-in din kalabana
ya am-in ay malmaliget en sisya.
9Apo ari, sin timpo ay panpailaam,
mabidang ay apoy di kaiarigam.
Kaman okmonen Diyos daida,
tan kanen di apoy daida gapo sin bonget na.
10Ponasem din poli da isnan daga
et maga polos di mabay-an en daida.
11Manplano da si naikontra en sik-a,
ngem maga polos di pantongpalan da,
12tan panaem ropa da et managtag da.
13Sik-a ay Diyos, ipailam koma din panakabalin mo,
ta mankanta kami ay mangidaydayaw sin bikas mo.
Currently Selected:
Salmo 21: KD
Highlight
Copy
Compare
Share
Want to have your highlights saved across all your devices? Sign up or sign in
© 2000, 2017 Wycliffe Bible Translators, Inc. All rights reserved.
