Salmo 19
19
Din Kinangaton Diyos Ya Din Kinasiged Di Linteg Na
1Am-in ay wada ed daya et kanayon ay ipappaila da
din panakabalin Diyos ay nangamag en daida.
2Din kaagawan ya labi et ipaammo day kinadiyos na,
siya abe di iyat di maisned ay labi ya agsapa.
3Olay mo gomiginek da ya magay madnge ay ibaga da,
4ngem din ipaammo da
et kaman kali ay madnge sin intiro ay daga.
Din agew et in-amagan Diyos si panteana ed daya.
5Kaman naragsak ay kaas-asawa na
ono din napigsa ay managtag ay malaydan ay makilongba,
say kaiarigan din agew mo bomala sin agsapa.
6Bomala sin esa ay soli ed daya
enggana ay domateng sin esa abe ay soli na,
et maga di makalisi sin atong na.
7Din kalin Diyos et kostokosto, magay kaoyawana,
baro ay biyag ya pigsan di nemnem di idawdawat na.
Din inpaammon Diyos ay pinaneknekana
et kosto ay pantalkan tan dadlon tet-ewa.
Say mangipalaing sin kolang di adal na.
8Din bilbilin Diyos et kosto di ibagbaga na,
am-in ay mangonod et maragsakan da.
Magay kinalawan di am-in ay linteg na,
kaman silaw sin nemnem di ipogaw mo maawatan da.
9Din pamatpatgan di ipogaw en Diyos
et dadlon nasantoan ya nadalos.
Din panaydayawan da en sisya
et mantoltoloy si eng-enggana.
Am-in ay ikeddeng Diyos et kosto da
tan polos ay magay pabpaborana.
10Din kalin Diyos et nabanbanol mo din balitok ay kanginaan,
mammam-is abe mo din anig ay kam-isan.
11Babaen sin kalim, ay Diyos, mabagbagaanak,
et dakdake di gon-gonak sin panongtongpalak.
12Magay makanemnem sin am-in ay ipaksaw na,
namnamed din adi na ammo ay basol na.
Sapay koma ay Diyos ta pomakawan ka.
13Adi ka koma aben ipalobos ay igagarak ay manbasol en sik-a
ya omituray din basol ay kaman nisa.
Et mo siya di, magay maipabasol en sak-en,
et mailisiak si basol ay nadagsen.
14Sapay koma ay Diyos ta malaydan kas nan kali ya nemnem ko,
sik-a ay pankamangak ya manobot ko.
Currently Selected:
Salmo 19: KD
Highlight
Copy
Compare
Share
Want to have your highlights saved across all your devices? Sign up or sign in
© 2000, 2017 Wycliffe Bible Translators, Inc. All rights reserved.
