Salmo 16

Iyaman Begew Sin Komadkadwaan Diyos

1Sik-a ay Diyos, somalaknib ka koma,

tan din pankamangak et sik-a.

2Tet-ewa din inbagak ay sik-a di Diyos ko,

sik-a anggoy di kapoan di siged isnan biyag ko.

3Din matalek ay ipogaw mo isnan daga,

bigbigek din sigesiged ay ogali da

et maragsakanak ay makikadkadwa en daida.#16:3 Baken nalawag din kanana sin Hebreo. Di odom ay kaiologan nina sin Hebreo et: Magay silbin din sinan didiyos isnan daga, madosa am-in ay maragsakan ay manaydayaw en daida.

4Din mangdayaw si didiyosen,

ad-ado ay ligat di en da lak-amen.

Adiak maitapi en daida ay mangidaton si dada,

sigaak abe ay mangibaga sin ngadan di didiyosen da.

5Ibilang kos sik-a, Apo, ay nabanol ay tawid ko,

mapon sik-a am-in ay masapol ko.

Sik-a di makaammo sin biyag kon to.

6Maymayat di inpatawid mo

et palalo di ragsak ko.

7Man-iyamanak, Apo, tan bomagbaga ka.

Olay sin labi et omitdo nan konsinsiya.

8Adiak emegyat, tan ammok ay komadkadwa ka,

kankanayon abe ay bomadbadang ka.

9Isonga palalo di ragsak ko

ya natalna di nemnem ko.

10Tan adi ka tomaynan sin kaot ko,

adi ka aben ipalobos ay madonot nan awak ko,

sak-en ay matalek ay bag-en mo.#16:10 Di esa abe ay kaiologan nina sin Hebreo et: Tan adi kan ipalobos nan matalek ay baam, ay sin kad-an di natey di ena pantongpalan.

11Din danan ay maiturong sin biyag et en ka itdo,

makikadwaak en sik-a isonga peteg di ragsak ko.

Currently Selected:

Salmo 16: KD

Highlight

Copy

Compare