Salmo 138
138
Iyaman Sin Layad Ya Seg-ang Diyos
1Man-iyamanak en sik-a, Apo,
si amin ay liknak ya nemnem ko.
Mankantaak ay mangidaydayaw en sik-a
sin sangoanan di “kadiyodiyos” ay kanan da.#138:1 Nankinalasi di pangawat di ipogaw sin layden nina ay kalien: 1) nailangitan ay parparsua; 2) didiyosen di kailiili; ono 3) tuturay isnan daga.
2Manyakog-ongak ay mansagong sin nasantoan ay Timplom
ta idayaw kos sik-a gapo sin layad mo ya kinapodnom,
tan inpailam ay nangatongato
din karim ya ngadan mo.
3Pinatgam din kararag ko
sin nankedawak si badang mo
yan indawat mo di toled ya bikas ko.
4Awni et dayawen daka si amin ay ari isnan daga,
tan din karim yan dinnge da.
5Ikanta dan to din inam-amag mo,
tan nakaskasdaaw di panakabalin mo.
6Ay-ayowanam din nababa, olay mo nangato ka,
ngem adi makalisin sik-a din mangipapangato si awak da,
olay mo addawi di kad-an da.
7Olay mo nanliniked di ligat ko,
isalakan mo pay dedan din biyag ko.
Omisalakan ka sin bonget di kalaban ko
babaen sin panakabalin mo.
8Tongpalem amin ay planom paran sak-en, Apo,
magay pap-eng din adi manbalbaliw ay layad mo,
itoloy mo koma din nilogiam ay oblam, Apo.
Currently Selected:
Salmo 138: KD
Highlight
Copy
Compare
Share
Want to have your highlights saved across all your devices? Sign up or sign in
© 2000, 2017 Wycliffe Bible Translators, Inc. All rights reserved.
