Salmo 118
118
Pan-iyaman Di Ipogaw En Diyos Sin Naabakan Di Kaibaw Da
1Man-iyaman tako en Diyos tan siged sisya,
ya magay pap-eng din adi manbalbaliw ay layad na.
2Ibogaw yo koma ay Israelita,
“Magay pap-eng din adi manbalbaliw ay layad na!”
3Dakayo ay papadin Diyos et kanan yo koma,
“Magay pap-eng din adi manbalbaliw ay layad na!”
4Dakayo am-in ay manaydayaw en Diyos et kanan yo koma,
“Magay pap-eng din adi manbalbaliw ay layad na!”
5Nankedawak si badang Diyos sin timpon di ligat ko
et inmisalakan tan dinnge na din adawag ko.
6Magay makaamag si lawa en sak-en mo si Diyos di tomatakdo,
isonga maga di iegyat ko.
7Gapo ta si Diyos di kabadang ko,
mailak din kaabakan di kalaban ko.
8-9Agpos mo si Diyos di pantalkan ya pankamangan tako
ay baken din iib-a tako ya olay din tuturay tako.
10-12Din adi kabilang ay kalaban ko et linmikob da,
kaman dan maangat ay anig ay inmalibongbong da,
ta gobaten das sak-en sin am-in ay banda.
Ngem begew sin panakabalin Diyos ed daya,
laton ay inabak kos daida,
tan din nango ay pagat et nalaka ay mapooan da,
et siya met laeng di kaiarigan da.
13Dandani ay maabakak gapo sin kapigsa da,
ngem binmadang si Diyos ay wadad daya.
14Si Diyos di pankamangak ya mangidawat si pigsak,
begew sin inyat na, maisalakanak.#118:14 Di esa abe ay kaiologan nina sin Hebreo et: Si Diyos di mangidawat si bikas ko ya din ikankansiyon ko, sisya abe di mangisalakan ko.
15Dengngen yo din bogaw di Israelita
ay wada sin tolda ay panbeeyan da
ay manlaylayad sin nangabakan da.
“Nakaskasdaaw din panakabalin Diyos,” kanan da.
16“Madayaw si Diyos sin nangabakana
gapo sin nakaskasdaaw ay panakabalina.”
17Adiak matey mo adi et wadaak ay matmatago
ta idaddad-at ko din inam-amag di Apo.
18Nadagsen di indawat na ay dosak,
ngem adi na inpalobos ay mateyak.
19-20Bokatan yo din eneb di Timplo
ay senggepan anggoy di nalinteg ya kosto
ta senggepak ay man-iyaman en Apo.
21Man-iyamanak en sik-a, Apo, tan dinngem din kararag ko.
Inabak ko din kalaban ko begew sin badang mo.
22Din bato ay sinigaan di kakarpintiro
et say nanbalinen Diyos ay kabanolan ay bato
ay mangipakneg sin beey si kosto.
23Si Diyos di nangamag isna,
et palalo ay kaeetnga.
24Manragsak tako
tan din agew ay nay di panginemnemneman tako
sin nangabakan Diyos sin kaibaw tako.
25Kedawen mi ay Diyos ta itoltoloy mo ay isalakan dakami,
bindisyonam kod dakami ta somiged din biyag mi.
26Mabindisyonan koma
nan inbaan Diyos ay panakaawak na.
Dakami ay wada sin Timplon di Apo
et bindisyonan mi abes dakayo.#118:26 Din bindisyon ay nay et inbagan din papadi ay wada sin oneg di Timplo.
27Si Yahweh di Diyos tako
ay nangsilaw ya namindisyon en datako.
Ilogi yo ngarud ay mansilibrar,
man-a kayos tobon di kaiw ta iliked yo sin altar.
28Sik-a di daydayawek ay Diyos et man-iyamanak en sik-a,
idaddad-at ko din panakabalin mo ay kaeetnga.
29Man-iyaman tako en Diyos tan siged sisya,
ya magay pap-eng din adi manbalbaliw ay layad na.
Currently Selected:
Salmo 118: KD
Highlight
Copy
Compare
Share
Want to have your highlights saved across all your devices? Sign up or sign in
© 2000, 2017 Wycliffe Bible Translators, Inc. All rights reserved.
