Salmo 114
114
Maipanggep Sin Kinmaanan Din Israelita Ed Egipto
1Idi kinmaan din polin Jacob ay Israelita
ed Egipto ay ilin di adi kaaw-awatan di kali da,
2nanbalinen Diyos ed Juda ay pandayawan dan sisya,
ya inturayana din Israelita.
3Linmayaw din baybay sin nangilaanan Diyos,
din ginawang ay Jordan yan sinmaldeng ay man-ayos.
4Din dontog ya bilbilig yan nanyegyeg da,
manlaglagto ay kalding ono karnero di kaiarigan da.
5Apay nga sik-a ay baybay yan linmayaw ka,
ya sik-a ay Jordan yan sinmaldeng ka?
6Apay nga dakayo ay dontog ya bilig yan nanlagto kayo
ay kaman din iyat di kalding ya karnero?
7Manpayegpeg ka ay daga sin sangoanan Diyos
ay dinaydayaw en Jacob.
8Sin bato inpabala nay dakdake ay danom
ay nanbalinena si posong.
Currently Selected:
Salmo 114: KD
Highlight
Copy
Compare
Share
Want to have your highlights saved across all your devices? Sign up or sign in
© 2000, 2017 Wycliffe Bible Translators, Inc. All rights reserved.
