Azã 5
5
Azezi botɩ kɔɔrŋɔ yẽ ĩmã'asʋm
1Bɛla poorʋm, Azezi sẽŋɛ la Zerizalɛm tɩ a ka di Zifdõma kibsa. 2La kʋlga n daan boe Zerizalɛm tɩ a yʋ'ʋrɛ la Ebre yetɔga dɛna Betɛsda, a lɛm na piisi zanõrɛ, tɩ põnsɩ banuu bɔna mĩ. 3Tɩ bã'adõma zozo'e daan gã põnsɩ la tẽŋa, fɔɔsɩ la wɔbsɩ, la kɔɔrnɔ. [Ba daan gu'ura la ko'om na sãn wa dãmɛ. 4Se'ere n soe la, Nawẽnnɛ malɛka n daan sigri kʋlga la pʋam wakat-wakatɛ dãmna ko'om na. La malɛka la sãn dãmɛ ko'om na, nẽr-sɛka n dẽŋɛ sige ko'om na pʋam, a yẽtɩ ĩmã'asʋm mɛ, baa bã'a-sɛka n tarɩ ẽ.]
5La bʋraa ayɩla n daan boe mĩ tɩ bã'a tara ẽ yʋʋma pitã la anii. 6Tɩ Azezi yẽ ẽ gãɩ, bãŋɛ tɩ a bẽ yuuge mɛ, yele ẽ yetɩ: «Fʋ boorɩ tɩ fʋ yẽ ĩmã'asʋm?» 7Tɩ bã'ara la lerge ẽ yetɩ: «Zuudãana, mam ka tara nẽra tɩ ko'om na sãn wa dãmɛ tɩ a wʋn yõkɛ mam basɛ kʋlga la pʋam. Mam sãn yetɩ m sige, ayẽma n dẽŋɛ mam sige.» 8Tɩ Azezi yele ẽ yetɩ: «Isge, dɩkɛ fʋ bõn-gã'ala sẽŋɛ.» 9Bilam zẽ'am tɩ bʋraa la daan yẽ ĩmã'asʋm, dɩkɛ a bõn-gã'ala sẽnna.
La daar-ẽŋa daan de la Zifdõma vo'osgo daarɛ. 10Bɛla tɩ Zifdõma nẽŋadõma yele bʋraa la n yẽ ĩmã'asʋm na yetɩ: «La de la vo'osgo daarɛ, la sisri mɛ tɩ fʋ tʋ bõn-gã'ala.» 11Tɩ a lerge ba yetɩ: «Sɛka n botɩ mam yẽ ĩmã'asʋm na, yele mam tɩ m dɩkɛ m bõn-gã'ala sẽŋɛ.» 12Tɩ ba soke ẽ yetɩ: «Nẽr-kãna n yele fõn yetɩ, fʋ dɩkɛ fʋ bõn-gã'ala sẽŋɛ?» 13Tɩ sɛka n yẽ ĩmã'asʋm na ka mina ẽn de sɛka, se'ere n soe la, Azezi daan kẽ la nẽr-kʋʋŋɔ n boe bilam na pʋam fõrgɛ.
14Bɛla poorʋm tɩ Azezi yẽ bʋraa la Wẽnde-kãtʋm na, yele ẽ yetɩ: «Bɩsɛ, fʋ yẽ ĩmã'asʋm. Da le tõm tõon-be'ero, tɩ sɛla n de be'em gãnna bɛla da paagɛ fɔ.» 15Tɩ bʋraa la sẽŋɛ ka yele Zifdõma nẽŋadõma la, tɩ nẽr-sɛka n botɩ ẽŋa yẽ ĩmã'asʋm na de la Azezi. 16Tɩ ba daan ɛɛra tɩ ba nãmsɛ Azezi, ẽn botɩ kɔɔrŋɔ yẽ ĩmã'asʋm vo'osgo daarɛ la ĩyã.
Nawẽnnɛ Dayʋa Azezi tarɩ a Sɔ nõorɛ mɛ
17Tɩ Azezi yele ba yetɩ: «Mam Sɔ tõnnɩ mɛ wa paam nãnannɛ wã, tɩ mam mẽ tõnna.» 18Tɩ Zifdõma nẽŋadõma daan malɩn ɛɛra tɩ ba kʋ ẽ, la dagɩ ẽn sã'am vo'osgo daarɛ sisgo la mã'a ĩyã, la de la ẽn ken wi'ira Nawẽnnɛ tɩ ẽŋa Sɔ, ɩta a mẽŋa wʋ Nawẽnnɛ na ĩyã.
19Tɩ Azezi yele ba yetɩ: «Mam yetɩ ya la sɩra sɩra, tɩ Dayʋa la ka tã ɩta sɛla sɛla la a mẽŋa nõorɛ. A ɩtɩ la ẽn yẽ tɩ a Sɔ ɩtɩ se'em na. Sɔ la n ɩtɩ se'em na, a Dayʋa la mẽ ɩtɩ la bɛla mẽŋa. 20Se'ere n soe la, Sɔ la nõŋɛ a Dayʋa la mɛ, pa'alɛ ẽ sɛla wuu tɩ ẽŋa mẽŋa ɩtɩ, la a wʋn pa'alɛ ẽ na tõon-kãra n gãnnɩ bãna wã tɩ la di'ige ya. 21La wʋ Sɔ la n vo'orɩ kũm bɔ'ɔra ba vɔm na, Dayʋa la mẽ bɔ'ɔra sɛba tɩ a boorɩ vɔm na bɛla. 22La Sɔ la ka diti nẽra nẽra sarɩya, a basɛ sarɩyadia la wuu bɔ la a Dayʋa la, 23tɩ nẽrba wuu wʋn nã'asra Dayʋa la, wʋ ba nã'asrɩ a Sɔ la se'em na. La sɛka n ka nã'asrɩ Dayʋa la, a ka nã'asrɩ Sɔ la n tõm ẽ na.
24Mam yetɩ ya la sɩra sɩra, tɩ sɛka n selse mam yetɔga dee bɔ sɛka n tõm mam na sɩra, a tarɩ la vɔm n ka ba'asrɩ. La ba kãn di a sarɩya. La a yese la kũm pʋam tara vɔm n ka ba'asrɩ. 25Mam yetɩ ya la sɩra sɩra, tɩ wakatɛ sẽm mɛ, la a paam mɛ, tɩ sɛba n ka tarɩ vɔm na wʋn wõm Nawẽnnɛ Dayʋa la kõa, la sɛba n wõm na wʋn vɔa. 26Se'ere n soe la, Sɔ Nawẽnnɛ n tarɩ vɔm a mẽŋa bɔ'ɔra se'em na, a bɔ a Dayʋa la mẽ vɔm na bɛla, tɩ a tara bɔ'ɔra. 27La a bɔ ẽ nõorɛ mɛ tɩ a dita sarɩya, ẽn de Nẽrsaala Dayʋa la ĩyã. 28Da basɛ-ya tɩ mam n tɔgɛ se'em na di'ige ya, se'ere n soe la, wakatɛ sẽm mɛ tɩ sɛba wuu n boe yɔɔm wʋn wõm a kõa, 29vo'oge ze'ele yɔɔrɔ pʋam yese. Tɩ sɛba n ẽŋɛ sõŋa yẽ vɔm Nawẽnnɛ zẽ'am, la sɛba n ẽŋɛ be'em, a wʋn di ba sarɩya.
30Mam ka tã wʋn ẽŋɛ sɛla sɛla la m mẽŋa nõorɛ. Mam diti sarɩya wʋ mam n wõm se'em Nawẽnnɛ zẽ'am na. La mam sarɩyadia masɛ mɛ. Se'ere n soe la, mam ka eerɩ tɩ m ẽŋɛ mam mẽŋa n boorɩ se'em, la de la sɛka n tõm mam na n boorɩ se'em.
31Mam sãn bɔ m mẽŋa kaseto, a kãn dɛna kaseto asɩra. 32La nẽra ayẽma n boe bɔ'ɔra mam kaseto, la mam mi tɩ a kaseto la tɩ a bɔ'ɔrɩ mam yelle la de la sɩra. 33La yãma tõm nẽra mɛ Azã zẽ'am, tɩ a tɔgɛ sɩra kaseto bɔ ya. 34Sãn dɛna mam, mam kaseto ka ze'etɩ nẽrsaala zẽ'am, la mam yele bɛla tɩ ya tã'agɛ yẽ la fãarɛ. 35Azã daan ãn wʋ fɩtla n laŋɛ nẽegɛ, la yãma daan sakɛ mɛ tɩ ya ẽŋɛ sũ-yẽlga wakatɛ fẽe mã'a la a peelem na. 36La mam tarɩ kaseto mɛ gãnna Azã dẽnnɛ na. La de la tõon-sɛba tɩ mam Sɔ bɔ mam tɩ m tõm na, tõon-bãma tɩ mam tõnnɩ na n bɔ'ɔrɩ mam kaseto pa'ala tɩ mam Sɔ Nawẽnnɛ n tõm mam. 37La mam Sɔ la n tõm mam na bɔ'ɔrɩ mam kaseto mɛ. Yãma nãn ka wõm a kõa, la ya nãn ka yẽ ẽ. 38La a yetɔga la ka boe ya sũure pʋam, bɛla n soe tɩ ya ka bɔ sɛka tɩ a tõm na sɩra. 39Yan eerɩ tɩ ya bãŋɛ Nawẽnnɛ gõŋɔ yetɔga la võorɛ la, ya tẽ'esɛ tɩ ya wʋn yẽ la vɔm n ka ba'asrɩ a pʋam. La de la gõn-ẽŋa n tɔgrɩ mam yelle. 40La ya ka boorɩ tɩ ya wa'am mam zẽ'am wa yẽ vɔm na.
41Mam ka eerɩ nã'asgɔ nẽrsaalba zẽ'am. 42La mam mi ya, mam mi tɩ ya ka nõŋɛ Nawẽnnɛ. 43Mam wa'am na m Sɔ yʋ'ʋrɛ, tɩ ya ka to'oge mam. La ayẽma sãn wa'am na a mẽŋa yʋ'ʋrɛ, ẽŋa tɩ ya to'orɩ. 44Yãma to'osrɩ la pẽka taaba zẽ'am, dee ka ɛɛra pẽka n ze'etɩ Nawẽnnɛ ayɩla mã'a zẽ'am. Yãma wʋn ẽŋɛ la wãne bɔ mam sɩra? 45Da tẽ'esɛ-ya tɩ mam n wʋn yetɩ ya ka tarɩ bʋʋrɔ mam Sɔ la zẽ'am, la de la Amoyisi n wʋn yetɩ ya ka tarɩ bʋʋrɔ, ẽŋa tɩ ya te'ege. 46Ya sãn bɔ nɩ Amoyisi sɩra, ya wʋn bɔ mam mẽ sɩra mɛ, se'ere n soe la, a gʋlsɛ mam yelle mɛ. 47La ya sãn ka bɔ ẽŋa n gʋlsɛ bõn-sɛba la sɩra, ya wʋn ẽŋɛ la wãne bɔ mam yetɔga la sɩra?»
Currently Selected:
Azã 5: gurDBL
Highlight
Share
Copy
Want to have your highlights saved across all your devices? Sign up or sign in
© 2008, 2010, Wycliffe Bible Translators, Inc. All rights reserved.