Azã 3
3
Azezi la Anikodɛm
1Bʋraa ayɩla n daan boe Farisi dõma pʋam tɩ a yʋ'ʋrɛ dɛna Anikodɛm. A daan de la Zifdõma nẽŋadãana. 2Bʋra-ẽŋa daan wa'am na Azezi zẽ'am yʋ'ʋŋɔ wa yele ẽ yetɩ: «Karẽnsãama, tõma mi tɩ Nawẽnnɛ n tõm fõn tɩ fʋ dɛna karẽnsãama, se'ere n soe la, nẽra ka tã wʋn ẽŋɛ bõn-yãlma wʋ fõn ɩtɩ se'em wã wuu, sãn dagna Nawẽnnɛ n boe la a dãana.» 3Tɩ Azezi lerge ẽ yetɩ: «Mam yetɩ fʋ la sɩra sɩra, tɩ nẽra sãn ka yẽ dɔg-paalga, a ka tã wʋn yẽ Nawẽnnɛ so'olʋm.» 4Tɩ Anikodɛm soke ẽ yetɩ: «Nẽra n kʋrgɛ wʋn ẽŋɛ la wãne tɩ ba le tã'agɛ dɔgɛ ẽ paalga? A wʋn le tã'agɛ mɛ kẽ a ma pʋʋrʋm tɩ ba le dɔgɛ ẽ bɩɩ?» 5Tɩ Azezi lerge ẽ yetɩ: «Mam yetɩ fʋ la sɩra sɩra, tɩ nẽra sãn ka dɔgɛ la ko'om, la Nawẽnnɛ Sɩa, a ka tã wʋn kẽ Nawẽnnɛ so'olʋm pʋam. 6Nẽrsaala n dɔgɛ sɛka la de la nẽrsaala, la Nawẽnnɛ Sɩa n dɔgɛ sɛka la tarɩ la Nawẽnnɛ Sɩa vɔm. 7Da basɛ tɩ la di'ige fo, mam n yetɩ: Dẽnɩ tɩ ba le dɔgɛ ya la ĩyã. 8Kʋsebgo vugri la ẽn boorɩ zẽ'a, tɩ fʋ wõnna a dãmnɛ, dee ka mina ẽn ze'ele zẽ'a sẽna, la ẽn we'esɩ zẽ'a. Nawẽnnɛ Sɩa n dɔgɛ sɛka la ãna bɛla.»
9Tɩ Anikodɛm le soke ẽ yetɩ: «Bõn-ẽŋa wʋn ẽŋɛ la wãne ẽŋɛ?» 10Tɩ Azezi lerge ẽ yetɩ: «Fõn de Ɩsrayɛlɩ karẽnsãam-kɛ'ɛma dee ken ka mina bõn-ẽna? 11Mam yetɩ fʋ la sɩra sɩra, tɩ tõma tɔgrɩ la sɛla tɩ tõma mi, dee yɛta sɛla tɩ tõma yẽ. La ya ka sakɛ tõma yetɔga la. 12Mam sãn tɔgɛ dũnia wã yɛla pa'alɛ ya, tɩ ya ka sakɛ, mam sãn tɔgɛ Nawẽnnɛ yire yɛla pa'alɛ ya, ya wʋn ẽŋɛ la wãne sakɛ? 13Nẽra nẽra nãn ka zom Nawẽnnɛ yire, sãn dagna Nẽrsaala Dayʋa la n ze'ele Nawẽnnɛ yire sige. 14Wʋ Amoyisi n yʋʋn zẽkɛ bõnsɛla dɔɔgɔ zuo weego pʋam se'em na, dẽnɩ tɩ ba zẽkɛ Nẽrsaala Dayʋa la mẽ bɛla. 15Tɩ nẽr-sɛka woo n bɔ ẽ sɩra wʋn tara vɔm n ka ba'asrɩ.»
16Nawẽnnɛ nõŋɛ nẽrsaalba mɛ halɩ, tɩ a tõm a Bi-yẽŋa dũnia zuo, tɩ nẽr-sɛka woo n bɔ ẽ sɩra kãn sã'am, la a wʋn yẽ vɔm n ka ba'asrɩ. 17Nawẽnnɛ ka tõm a Dayʋa la dũnia tɩ a di nẽrba sarɩya sɩbgɛ ba, a tõm ẽ tɩ a fãagɛ ba mɛ basɛ. 18La sɛka n bɔ ẽ sɩra, ba kãn di a sarɩya. La sɛka n ka bɔ ẽ sɩra la, a põn koŋe bʋʋrɔ mɛ, ẽn ka bɔ Nawẽnnɛ Bi-yẽŋa la sɩra la ĩyã. 19Bõn-ẽna n de sarɩyadia la: Peelem wa'am dũnia pʋam mɛ, la nẽrsaalba nõŋɛ la lika gãnna peelem na, ba tõoma n de tõon-be'ero la ĩyã. 20Nẽr-sɛka woo n tõnnɩ tõon-be'ero sisri peelem mɛ, a ka sẽm peelem pʋam, a zotɩ mɛ tɩ a tõoma la wʋn puke. 21La nẽr-sɛka woo n tõnnɩ sɩra sẽm na peelem zẽ'am, tɩ a tõoma la pa'alɛ tɩ a sakrɩ la Nawẽnnɛ.
Azã tɔgɛ Azezi yelle
22Bɛla poorʋm, Azezi la a karẽnbiisi sẽŋɛ la Zude so'olʋm ka bɔna bilam misra nẽrba ko'om pʋam. 23Tɩ Azã mẽ daan bɔna Enõ tẽŋa n lɛm Salim tẽŋa la misri nẽrba ko'om pʋam, se'ere n soe la, ko'om n daan boe mĩ zo'oge. Tɩ nẽrba sẽnna, tɩ a misra ba. 24Wakat-ẽŋa ba daan nãn ka kẽ'esɛ Azã yʋ'a deem.
25Tɩ Azã karẽnbiisi basɛba, la Zifdõma nẽra daan wẽ'era nõke'ene, Zifdõma sisgo n yetɩ ba pɛɛra ba mẽŋa malgra la yelle. 26Tɩ ba sẽŋɛ Azã zẽ'am ka yele ẽ yetɩ: «Karẽnsãama, sɛka n daan boe la fõn Zʋrdẽ doone ke bɔba la, sɛka tɩ fõn daan tɔgɛ a yelle la, ẽn wãna n misri nẽrba ko'om pʋam, tɩ nẽrba wuu sẽnna a zẽ'am.» 27Tɩ Azã lerge ba yetɩ: «Nẽra ka tã wʋn to'oge sɛla tɩ la sãn dagna Nawẽnnɛ n bɔ ẽ. 28Yãma mẽŋa tã wʋn bɔ kaseto mɛ tɩ mam yetɩ: ‹Dagɩ mam n de Krisi la. La, ba tõm mam mɛ tɩ m dẽŋɛ a nẽŋa wa'am.› 29La ãn wʋ nẽra n di pɔga: Pɔgdita la n soe pɔka la, la pɔgdita la sɩrɛ n ze dee sɛlsra a yetɔga la, a tarɩ sũ-yẽlga mɛ zozo'e. Bɛla mam tarɩ sũ-yẽlga mɛ zozo'e. 30Dẽnɩ tɩ ẽŋa lebge kãtɛ dee tɩ mam lebge pɩka.
31Sɛka n yese saazuum wa'am n gãnnɩ wuu, la sɛka n yese dũnia de la dũnia nẽra, la a tɔgrɩ la dũnia yelle. Sɛka n yese Nawẽnnɛ yire wa'am na n gãnnɩ wuu, 32la a tɔgrɩ la ẽn wõm dee yẽ sɛla la, la nẽra nẽra ka to'oge a yetɔga la. 33Nẽr-sɛka n to'oge a yetɔga la sakɛ mɛ tɩ Nawẽnnɛ de la sɩra dãana. 34Se'ere n soe la, sɛka tɩ Nawẽnnɛ tõm na tɔgrɩ la Nawẽnnɛ yetɔga, Nawẽnnɛ n bɔ ẽ a Sɩa pãŋa zozo'e la ĩyã.
35Sɔ Nawẽnnɛ nõŋɛ a Dayʋa la mɛ, tɩ a dɩkɛ sɛla woo ẽŋɛ a nu'usum. 36Sɛka n bɔ a Dayʋa la sɩra tarɩ la vɔm n ka ba'asrɩ. La sɛka n ka sakɛ a Dayʋa la kãn yẽ vɔm n ka ba'asrɩ, la Nawẽnnɛ sũ-isgre boe a dãana zuo.»
Currently Selected:
Azã 3: gurDBL
Highlight
Share
Copy
Want to have your highlights saved across all your devices? Sign up or sign in
© 2008, 2010, Wycliffe Bible Translators, Inc. All rights reserved.