Azã 14
14
Azezi n de sore n we'esɩ Nawẽnnɛ zẽ'am
1Azezi le yele ba yetɩ: «Da basɛ-ya tɩ ya sũure sã'am. Bɔ-ya Nawẽnnɛ sɩra, la ya bɔ mam mẽ sɩra. 2Kẽ'a zẽ'esɩ boe mam Sɔ Nawẽnnɛ yire zo'oge mɛ. Mam we'esɩ tɩ m ka malgɛ la zẽ'a ya ĩyã. La sãn dagɩ nɩ bɛla, mam kãn yele nɩ ya. 3La mam sãn sẽŋɛ ka malgɛ zẽ'a la ya ĩyã, mam wʋn leme wa'am wa tarɩ ya sẽŋɛ mam zẽ'am, tɩ mam n boe zẽ'a na, yãma mẽ bɔna bilam. 4La mam n we'esɩ zẽ'e-sɛka la, ya mi a sore la.» 5Tɩ Atoma yele ẽ yetɩ: «Zuudãana, tõma ka mi fõn we'esɩ zẽ'a na, tõma wʋn ẽŋɛ la wãne tã'agɛ bãŋɛ a sore?» 6Tɩ Azezi lerge ẽ yetɩ: «Mam n de sore, la sɩra, la vɔm dãana. Nẽra nẽra ka tã wʋn wa'am mam Sɔ zẽ'am, tɩ la sãn ka doose la mam. 7Ya sãn mi ni mam, ya wʋn mi ni mam Sɔ la mẽ. La lɛɛlɛ wã, ya mi ẽ, la ya yẽ ẽ.»
8Tɩ Afilipi yele ẽ yetɩ: «Zuudãana, pa'alɛ tɔ fʋ Sɔ la, tɩ bɛla seke tõma mɛ.» 9Tɩ Azezi lerge ẽ yetɩ: «Afilipi, mam boe la ya yuuge mɛ, tɩ fõn nãn ken ka mina mam? Sɛka n yẽ mam, yẽ mam Sɔ mɛ. La ẽŋɛ la wãne tɩ fõn yetɩ, m pa'alɛ ya m Sɔ la? 10Fõn ka bɔ sɩra tɩ mam boe la mam Sɔ la lɛ, tɩ mam Sɔ la bɔna la mam lɛ? Yetɔg-sɛba tɩ mam tɔgrɩ la yãma la, ka ze'etɩ mam mẽŋa zẽ'am, la de la mam Sɔ la n boe la mam lɛ la n tõnnɩ a tõoma. 11Bɔ-ya mam sɩra, mam n yetɩ mam boe la m Sɔ la lɛ, tɩ mam Sɔ la bɔna la mam lɛ la. La ya sãn ka sakɛ bɛla, ya bɔ mam sɩra m tõoma la ĩyã.
12Mam yetɩ ya la sɩra sɩra, tɩ sɛka n bɔ'ɔrɩ mam sɩra la, a mẽ wʋn tõm tõon-sɛba tɩ mam tõnnɩ na, la a wʋn tõm tõon-kãra n gãnnɩ bɛla, se'ere n soe la, mam we'esɩ la m Sɔ zẽ'am. 13La bõn-sɛba wuu tɩ ya wʋn sose la mam yʋ'ʋrɛ, mam wʋn ẽŋɛ bɔ ya tɩ m Sɔ la yẽ nã'asgɔ a Dayʋa la ĩyã. 14Ya sãn sose sɛla la mam yʋ'ʋrɛ, mam wʋn ẽŋɛ.»
Nawẽnnɛ Sɩa wa'aŋɔ
15«Ya sãn nõŋɛ mam, ya wʋn sakɛ mam nõorɛ la mɛ. 16La mam wʋn sose m Sɔ la, tɩ a bɔ ya Sõŋra ayẽma tɩ a bɔna la ya lɛ wakatɛ n ka ba'asrɩ. 17A de la sɩra Sɩa tɩ dũnia dõma ka tã wʋn to'oge ẽ, se'ere n soe la, ba ka tã wʋn yẽ ẽ, la ba ka mi ẽ. La yãma mi ẽ, se'ere n soe la, a boe la ya zẽ'am, la a wʋn bɔna la ya lɛ.
18Mam kãn basɛ ya kɩɩbsɩ, mam wʋn leme wa'am ya zẽ'am. 19La sãn ẽŋɛ fẽe, dũnia nẽrba kãn le yẽ mam. La yãma nõo wʋn yẽ mam, se'ere n soe la, mam n vɔa la, yãma mẽ wʋn vɔa mɛ. 20La daar-ẽŋa daarɛ, ya wʋn bãŋɛ tɩ mam boe la m Sɔ la lɛ, tɩ yãma bɔna la mam, tɩ mam bɔna la yãma.
21Sɛka n bãŋɛ mam nõorɛ la tɩ mam bɔ la, dee sakra ɩta bɛla, la de la ẽŋa n nõŋɛ mam. Mam Sɔ la wʋn nõŋɛ sɛka n nõŋɛ mam na mɛ. La mam wʋn nõŋɛ ẽŋa dãana, dee dɩkɛ m mẽŋa pa'alɛ ẽ.»
22Tɩ Azudaasɩ ayẽma n dagɩ Azudaasɩ Iskariyo la soke ẽ yetɩ: «Zuudãana, la ẽŋɛ la wãne tɩ fõn wʋn dɩkɛ fʋ mẽŋa pa'alɛ tõma, dee kãn pa'alɛ dũnia nẽrba?» 23Tɩ Azezi lerge ẽ yetɩ: «Nẽra sãn nõŋɛ mam, a wʋn sakɛ ɩta mam n yele se'em na, la mam Sɔ wʋn nõŋɛ a dãana. La tõma wʋn wa'am a zẽ'am wa bɔna la ẽ. 24Sɛka n ka nõŋɛ mam, a ka sakɛ ɩta mam yetɔga n yele se'em na. La yetɔga la tɩ ya wõnnɩ wã dagɩ mam mẽŋa yetɔga, la de la mam Sɔ la n tõm mam na yetɔga.
25Mam ken bɔna la ya zẽ'am dee tɔgɛ yetɔg-bãna bɔ ya. 26La Sõŋra la, mam Sɔ Nawẽnnɛ Sɩa la tɩ a wʋn tõm na mam yʋ'ʋrɛ tɩ a wa'am ya zẽ'am na, ẽŋa n wʋn zãsʋm ya sɛla woo, dee tẽegɛ ya bõn-sɛba wuu tɩ mam yele ya la.
27Mam basrɩ sũ-mã'asʋm bɔ ya, mam mẽŋa sũ-mã'asʋm tɩ mam bɔ'ɔrɩ ya. Mam ka bɔ'ɔrɩ ya wʋ dũnia n bɔ'ɔrɩ se'em na. Da basɛ-ya tɩ ya sũure sã'am, da zɔta-ya dabeem. 28Ya wõm mam n yele ya tɩ mam we'esɩ mɛ, la mam wʋn leme wa'am ya zẽ'am. Ya sãn nõŋɛ nɩ mam, ya wʋn ẽŋɛ nɩ sũ-yẽlʋm mam n we'esɩ m Sɔ zẽ'am na ĩyã. Se'ere n soe la, mam Sɔ la n gãnnɩ mam. 29Lɛɛlɛ wã, mam tɔgɛ ya mɛ tɩ la nãn ka paagɛ, tɩ la sãn wa paagɛ, ya wʋn bɔ mam sɩra. 30Mam kãn le tɔgɛ la ya lɛ zo'oge, se'ere n soe la, dũnia naba sẽm mɛ. La a ka tarɩ pãŋa la mam. 31La dẽnɩ tɩ dũnia dõma bãŋɛ tɩ mam nõŋɛ m Sɔ la mɛ, la mam ɩtɩ wʋ mam Sɔ la n bɔ mam nõorɛ tɩ m ẽŋɛ se'em na. Isge-ya, tɩ fõrgɛ kalam.»
Currently Selected:
Azã 14: gurDBL
Highlight
Share
Copy
Want to have your highlights saved across all your devices? Sign up or sign in
© 2008, 2010, Wycliffe Bible Translators, Inc. All rights reserved.