Azã 10
10
Dũnsĩina la a piisi makrɛ
1La Azezi daan yetɩ: «Mam yetɩ ya la sɩra sɩra, tɩ nẽr-sɛka n ka dolɩ zanõrɛ kẽ'era piisi denne pʋam, dee dɔla lalga kẽ'era, ẽŋa de la nayiga la fãara. 2La nẽr-sɛka n dolɩ zanõrɛ la kẽ'era, ẽŋa n de piisi la dũnsĩina. 3La zanõrɛ la gu'ura yo'orɩ mɛ bɔ'ɔra ẽŋa. Tɩ piisi la mina a kõa, tɩ a wi'ira ẽn soe sɛba la yʋ'ʋra, botɩ ba dɔla ẽ yɛsra. 4La a sãn tarɩ a piisi la wuu yese, a tollɩ la ba nẽŋa sẽnna, tɩ ba dɔla ẽ, ban mi a kõa la ĩyã. 5La ba kãn malɩn doose sãana, ba wʋn zoe mɛ fõrgɛ dee basɛ ẽ, ban ka mi a kõa la ĩyã.»
6Azezi makɛ la makrɛ ẽna wã bɔ ba, la ba ka bãŋɛ ẽn tɔgɛ se'em bɔ ba la võorɛ.
Azezi n de zanõrɛ
7Tɩ Azezi le yele ba yetɩ: «Mam yetɩ ya la sɩra sɩra, tɩ mam n de piisi denne na zanõrɛ. 8Sɛba wuu n dẽŋɛ mam wa'am na de la nayigba la fãarba, la piisi la ka selse ba. 9Mam n de zanõrɛ la. La nẽr-sɛka n dolɩ mam zẽ'am kẽ'era, a wʋn yẽ fãarɛ. La a wʋn kẽ'era dee yɛsra, yẽta a dia. 10Nayiga sẽm tɩ a zũ mɛ, la a kʋ, la a sã'am mã'a, la mam wa'am tɩ nẽrba n yẽ vɔm sõŋa sõŋa.»
Azezi n de dũnsĩin-sõŋɔ
11Tɩ Azezi le yele ba yetɩ: «Mam n de dũnsĩin-sõŋɔ. Dũnsĩin-sõŋɔ sakɛ kũm mɛ a piisi ĩyã. 12La nẽra n tõnnɩ tɩ ba yɔɔra ẽ, tɩ a ka sɔna piisi la, a ka bɩsrɩ ba sõŋa, la a sãn yẽ saasaa n sẽm, a basrɩ piisi la mɛ dee zɔta. La saasaa la wʋn yõgɛ piisi la mɛ, botɩ ba wɩrgɛ. 13Se'ere n soe la, a tõnnɩ tɔ'ɔra la yɔɔrɔ, a ka fablɩ piisi la yelle. 14Mam n de dũnsĩin-sõŋɔ la, la mam mi m piisi la mɛ, tɩ ba mẽ mina mam, 15wʋ mam Sɔ Nawẽnnɛ n mi mam, tɩ mam mẽ mina ẽ se'em na. Mam sakɛ kũm mɛ m piisi la ĩyã.
16La mam tarɩ piisi basɛba mɛ n ka boe denne wã pʋam. Dẽnɩ tɩ mam tarɩ ba wa'am, tɩ ba wõm mam kõa, lagɩm na bãna tɩ ba dɛna ayɩla, tɩ dũnsĩina ayɩla bɩsra ba.
17Mam Sɔ nõŋɛ mam mɛ, mam n dɩkɛ m vɔm bɔ'ɔra nẽrsaalba, dee wʋn le to'oge ẽ na ĩyã. 18Nẽra nẽra ka to'orɩ mam vɔm. Mam mẽŋa n wʋn dɩkɛ ẽ bɔ. Mam tarɩ pãŋa mɛ wʋn dɩkɛ m vɔm bɔ, dee tara pãŋa wʋn le to'oge ẽ. Mam Sɔ n bɔ mam nõorɛ tɩ m ẽŋɛ se'em n bɛla.»
19Yetɔg-bãna ĩyã tɩ welgre daan le wa'am Zifdõma la tẽŋasʋka. 20Tɩ basɛba zozo'e yetɩ: «Kʋlkã'arga n dolɩ ẽ, a de la zɔlgɔ, bẽm tɩ ya sɛlsra ẽ?» 21Tɩ basɛba yetɩ: «Yetɔg-bãna wã dagɩ kʋlkã'arga n dolɩ nẽra yetɔga. Kʋlkã'arga tã wʋn botɩ fʋa nini yẽta?»
Azezi la Nawẽnnɛ de la ayɩla
22Wakat-ẽŋa Zifdõma Wẽnde-kãtɛ la malgrɛ tẽerɛ kibsa n daan boe Zerizalɛm. La daan de la ɔɔrɔ wakatɛ. 23Tɩ Azezi sẽŋɛ Wẽnde-kãtʋm na ka gilgra zẽ'e-sɛka tɩ ba wi'iri tɩ Asalomõ võnana la. 24Tɩ Zifdõma lagsɛ gilge ẽ, yele ẽ yetɩ: «Fõn wʋn basɛ tɩ tõma sẽ'ena ka paagɛ la dabʋrɛ? Fʋ sãn dɛna la Krisi la, sɛka tɩ Nawẽnnɛ tõm na, fʋ yele to sɩra sɩra.» 25Tɩ Azezi lerge ba yetɩ: «Mam põn yele ya mɛ, tɩ ya ka bɔ mam sɩra. Tõon-sɛba tɩ mam tõnnɩ na m Sɔ yʋ'ʋrɛ la, pa'alɩ mam n de sɛka mɛ. 26La yãma ka bɔ mam sɩra, yãma n dagɩ mam piisi la ĩyã. 27Mam piisi la wõnnɩ mam kõa mɛ, mam mi ba mɛ, la ba dolɩ mam mɛ. 28Mam bɔ'ɔrɩ ba la vɔm n ka ba'asrɩ, tɩ ba kãn malɩn sã'am, la nẽra ka tã wʋn fãagɛ ba mam nu'usum. 29Mam Sɔ la n bɔ mam bãma la, a gãnnɩ sɛla woo mɛ, nẽra ka tã wʋn fãagɛ ba mam Sɔ la nu'usum. 30Mam, la mam Sɔ la de la ayɩla.»
31Tɩ Zifdõma le pĩ'ise kuga tɩ ba lobe ẽ kʋ. 32Tɩ Azezi yele ba yetɩ: «Mam Sɔ botɩ mam tõm tõon-sõma zozo'e mɛ pa'alɛ ya. Tõon-sõma bãma pʋam, tõon-kãna ĩyã tɩ ya bɔɔra tɩ ya lobe mam na kuga?» 33Tɩ Zifdõma la lerge ẽ yetɩ: «La dagɩ tõon-sõma yelle tɩ tõma bɔɔra tɩ tɩ lobe fʋ la kuga kʋ, la de la Nawẽnnɛ yʋ'ʋr-sã'aŋɔ la ĩyã, fõn de nẽrsaala dee ẽŋɛ fʋ mẽŋa tɩ fõn de la Nawẽnnɛ na ĩyã.» 34Tɩ Azezi yele ba yetɩ: «La gʋlsɛ ya lɔɔ gõŋɔ la pʋam tɩ Nawẽnnɛ yetɩ: ‹Ya de la wẽna.› 35Tɩ mi tɩ Nawẽnnɛ gõŋɔ yetɔga la de la sɩra, la a ka tã wʋn sã'am. A wi'iri sɛba tɩ a tɔgɛ yetɔga bɔ ba la tɩ wẽna. 36La mam tɩ Nawẽnnɛ looge tõm dũnia zuo wã, yãma yele mam tɩ m sã'anɩ la Nawẽnnɛ yʋ'ʋrɛ, mam n yele tɩ mam de la Nawẽnnɛ Dayʋa la ĩyã? 37Mam sãn ka tõnna m Sɔ tõoma, ya da bɔ mam sɩra. 38La mam sãn tõnna a tõoma, baa ya sãn ka bɔ mam sɩra, ya bɔ m tõoma la sɩra, tɩ ya tã'agɛ bãŋɛ, la ya sakɛ sɩra tɩ mam Sɔ la boe la mam lɛ mɛ, tɩ mam mẽ bɔna la ẽ.» 39Tɩ ba le zɩgra tɩ ba yõkɛ ẽ, tɩ a põsɛ.
40La ẽn põsɛ la, a le dooge la Zʋrdẽ kʋlaa la doone, zẽ'e-sɛka tɩ Azã daan pɔsɛ bɔna mĩ misri nẽrba ko'om pʋam na, ka bɔna bilam. 41Tɩ nẽrba zozo'e daan sẽŋɛ a zẽ'am. Ba daan tɔgrɩ yetɩ: «Azã ka tõm tõon-yãlma baa ayɩla, la Azã n daan tɔgɛ bʋra-ẽna yelle se'em wuu la de la sɩra.» 42La nẽrba zozo'e bɔ ẽ sɩra mɛ bilam.
Currently Selected:
Azã 10: gurDBL
Highlight
Share
Copy
Want to have your highlights saved across all your devices? Sign up or sign in
© 2008, 2010, Wycliffe Bible Translators, Inc. All rights reserved.