Tõoma 11

Apɩyɛɛrɩ tɔgɛ pa'alɛ lan ẽŋɛ se'em tɩ ẽŋa sẽŋɛ bu-zãŋsɩ zẽ'am

1La Azezi Tõntõnɩba, la a karẽnbi-sɛba n boe Zude so'olʋm na wõm mɛ tɩ nẽr-sɛba n dagɩ Zifdõma la mẽ sakɛ Nawẽnnɛ yetɔga mɛ. 2La Apɩyɛɛrɩ daan lebe la Zerizalɛm, tɩ Zifdõma basɛba n bɔ Azezi sɩra la wẽ'era nõke'ene la ẽ, 3yele ẽ yetɩ: «Bẽm n ẽŋɛ tɩ fõn kẽ lagɩm na bu-zãŋsɩ n ka wãtɩ la dita?»

4Tɩ Apɩyɛɛrɩ yãŋa pa'alɛ ba yɛla la wuu n daan doose se'em na yetɩ: 5«Mam daan boe la Zope pʋ'ʋsra, yẽ sɛla wʋ zãasŋɔ la, tɩ sɛla la ze'ele saazuum sigra wʋ fu-kãtɛ n lʋ zẽ'esɩ sɩnaasɩ sige wa paam mam boe zẽ'a la. 6Tɩ mam bɩsra bõnɔ na zĩi, yẽ yire dũnsi, la we-dũnsi, la bõn-vuula, la bõn-ẽgla. 7Tɩ mam wõm kõa n yetɩ: ‹Apɩyɛɛrɩ, isge kʋ di.› 8Tɩ mam yetɩ: ‹Ayɛɩ, Zuudãana, sɛla n de sisgo bõnɔ bɩɩ bõn-dẽgrɔ ken ka kẽ mam nõorʋm.› 9Tɩ kõa la le ze'ele saazuum tɔgɛ bɔ mam yetɩ: ‹Bõn-sɛka tɩ Nawẽnnɛ yetɩ, a ãn sõŋa, da kãn yetɩ, a de la bõn-dẽgrɔ.› 10La daan ẽŋɛ la nõorɛ atã, dee viise lebe saazuum. 11Tɩ bʋraasɩ batã kɔ'ɔn paam yi-sɛka tɩ mam boe mĩ na. Ba daan tõm ba la Sezaare tẽŋam yetɩ, ba wa'am mam zẽ'am. 12Tɩ Nawẽnnɛ Sɩa yele mam yetɩ, m doose ba sẽŋɛ, m da sẽ'ena. Tɩ tɩ sɔbiisi bãna bayoobɩ wã kɔlgɛ mam, tɩ tõma sẽŋɛ ka kẽ Akɔrnɛlɩ yire. 13Tɩ a yele tõma tɩ ẽŋa daan yẽ la malɛka n ze ẽŋa yire, yele ẽŋa yetɩ: ‹Tõm nẽrba tɩ ba sẽŋɛ Zope ka wi Asimõ-pɩyɛɛrɩ tɩ a wa'am. 14Ẽŋa n wʋn tɔgɛ yetɔg-sɛba n wʋn botɩ fõn na fʋ yir-dõma wuu yẽ fãarɛ.› 15Mam n boe mĩ tɩ m tɔgɛ la, tɩ Nawẽnnɛ Sɩa sige ba zuto wʋ ẽn daan sige tõma zuo se'em pɔspɔsɩ la. 16Bɛla tɩ mam tẽegɛ Zuudãana n daan yetɩ: ‹Azã daan misri nẽrba la ko'om pʋam, la Nawẽnnɛ wʋn mise ya a Sɩa pʋam.› 17La sãn dɛna tɩ Nawẽnnɛ bɔ ba a Sɩa, wʋ ẽn daan bɔ tõma n bɔ Zuudãana Azezi-krisi sɩra se'em na, mam de la ãne wʋn sɩ'ɩsɛ Nawẽnnɛ?» 18Ban wõm bɛla la, ba sĩm mɛ dee pẽgra Nawẽnnɛ yetɩ: «Bɛla, Nawẽnnɛ botɩ bu-zãŋsɩ mẽ yẽ sore mɛ tɩ ba teege yɛm basɛ tõon-be'ero yẽ yõvore.»

Antɩyɔsɩ nẽrba bɔ Azezi sɩra

19La A'etɩɛnɩ kũm na poorʋm, nẽr-sɛba n yẽ nãmsgɔ la wɩrgɛ mɛ, sẽŋɛ halɩ Fenisi, la Sipri, la Antɩyɔsɩ ka mõola Nawẽnnɛ yetɔga la bɔ'ɔra Zifdõma mã'a. 20La ba bʋraasɩ basɛba daan ze'ele la Sipri, la Sirɛnɩ so'olʋm sẽŋɛ Antɩyɔsɩ mẽ ka mõolɛ bu-zãŋsɩ, tɔgɛ Zuudãana Azezi kõ-yẽlga la bɔ ba. 21La Zuudãana pãŋa daan boe la ba mɛ. Tɩ nẽrba zozo'e daan bɔ Zuudãana sɩra dɔla ẽ.

22La Azezi nẽr-kʋʋŋɔ la n boe Zerizalɛm na n wõm bɛla la, ba tõm na Abarnabasɩ yetɩ a sẽŋɛ Antɩyɔsɩ. 23La ẽn paagɛ yẽ tɩ Nawẽnnɛ ẽŋɛ nẽrba la yel-sõnnɛ se'em na, a sũure ẽŋɛ yẽlʋm mɛ. Tɩ a pa'alɛ ba yetɩ, ba keŋe ba mẽŋa dɔla Zuudãana la ba sũure wuu da basɛ. 24Se'ere n soe la, a daan de la nẽr-sõŋɔ, dee bɔ Azezi sɩra zo'oge, tɩ Nawẽnnɛ Sɩa bɔna la ẽ. La nẽrba zozo'e n daan pa'asɛ dɔla Zuudãana.

25La Abarnabasɩ babsɛ mɛ sẽŋɛ Tarsɩ tɩ a ka ɛ Asolɩ. 26La ẽn yẽ ẽ na, a tarɩ ẽ mɛ wa'am Antɩyɔsɩ. La yʋʋnɛ tõrɛ tɩ ba lagsɛ la Azezi nẽr-kʋʋŋɔ la, dee zãsʋm nẽrba zozo'e. La de la Antɩyɔsɩ tẽŋam tɩ ba daan pɔsɛ wi karẽnbiisi la tɩ Krisi nẽrba.

27La wakat-ẽŋa tɩ Nawẽnnɛ nõtɔ'ɔsrɩba daan ze'ele Zerizalɛm sẽŋɛ Antɩyɔsɩ. 28Tɩ ba nẽra ayɩla yʋ'ʋrɛ n de Agabisi isge ze'ele tɔgɛ la Nawẽnnɛ Sɩa pãŋa yetɩ, kɔm kãtɛ n wʋn wa'am dũnia wuu zuo. La kɔm ẽŋa sɩrɩ wa'am mɛ na-keko Akloorɩ wakatʋm. 29Tɩ karẽnbiisi la yetɩ, nẽra woo looge ẽn tarɩ sɛla bɔ tɩ ba to'oge sõŋɛ Azezi nẽr-sɛba n boe Zude la. 30Tɩ ba daan ẽŋɛ bɛla dɩkɛ ligri la ẽŋɛ Abarnabasɩ la Asolɩ nu'usum, tõm ba yetɩ, ba tarɩ sẽŋɛ ka bɔ Azezi nẽr-kʋʋŋɔ la kẽma n boe Zerizalɛm na.

Currently Selected:

Tõoma 11: gurDBL

Highlight

Copy

Want to have your highlights saved across all your devices? Sign up or sign in

Learn More About Farefare, Ninkaré