ⴶⵜⵏ 27

ⵎⵓⵢ ⵏⵀⵍⵙ ⵙⵗⵔⵎ ⵏⵔⵎ

1ⵙ ⵜⵓⵏⴰ ⴹ ⵏⴶⵤ ⵗⵍⵍ ⵏⵎⵏ ⵏⴾⵓ ⴾⵍ ⵏⵜⵍⵢⴰ ⵜⵓⴶⴰ ⵀⵍⵙ ⵏ⵿ⵜⴰ ⴹⵓⵢⴹ ⵎⵙⴾⵙⴰ ⴹⵗ ⴼⵙ ⵏ⵿ⴾⵀⵜⵏ ⵢⵏ ⴶⵏ ⵙⵎ ⵢⵍⵢⵙ ⵂⵏ ⴶⵏ ⵏ⵿ⵙⵌⵜⵏ ⵙ ⵜⵓⵏⵓ «ⵓⴰ ⵏⵆⵢⵙⵔ»⵰ 2ⵜⵤⵔ ⵏⴶⵤ ⵗⵍⵍ ⵏⵎⵏ ⵏⵗⵔⵎ ⵏⴹⵔⵎⵜⵏⵙ ⴾⵏ ⴾⵍⵏ ⵏⵙⵢⴰ ⵓⵏ ⵓⵔⵏⵏ ⴼⵢ ⵏⴶⵔⵓ⵰ ⵂⵏⴰ ⵔⵙ⵿ⵜⵔⵈⵙ ⵎⵙⵏ ⵓⴹⵏ ⵏⵗⵔⵎ ⵏ⵿ⵜⵙⵍⵏⴾ ⵏⴾⵍ ⵓⵏ ⵎⵙⴹⵏⵢⴰ⵰

3ⵙ ⵤⵍ ⵓⴰ ⴹⴼⵔ ⵓⵏ ⵏⵤⵀⵜ ⴹⵗ ⵗⵔⵎ ⵏ⵿ⵙⴹⵏ⵰ ⵢⵍⵢⵙ ⵎⵙⵏ ⵓⴹⵏ ⵙⴾⵏⵏ ⵀⵍⵙ ⵍⵗ ⴾⴼⵢ ⵜⵔⴶⵜ ⵏⴹ ⴾⵓ ⵎⴹⵓⵏⵜ ⵓⵏ ⵂⵏⵏ ⵗⵔⵎ ⵓⵏ ⴼⵍ ⴹⵗⵙ ⵙⵏⵏ⵰ 4ⵙ ⴹⵔⵏⵗ ⴶⵎⴹ ⵗⵍⵍ ⵏⵎⵏ ⵙⴹⵏ ⵏⵍⵍ ⵙⵍⵎ ⵏⴶⵔⵓ ⴹⵗ ⵏⵂⴰ ⴼⵢ ⵏⴾⵍ ⵎⵙⵏ ⴶⵔⵓⵜⵍⵏ ⵙ ⵜⵓⵏⵓ ⵆⵀⵔⵙ ⴼⵍⵙ ⴹⵓ ⴹⵔ ⵏⵎⵆⵙ⵰ 5ⴹⴼⵔ ⵓⵏ ⵏⵛⴾⵍ ⴼⵍ ⴶⵔⵓ ⵓⵙ ⵓⵔ ⴾⵍ ⵏ⵿ⴾⵍⴾⵢⴰ ⴹ ⵓⵏ ⵀⵏ⵿ⴼⵍⵢⴰ ⵜⵎⵏⵜ ⵏⵓⴹⵏ ⵗⵔⵎ ⵏⵎⵔⴰ ⵂⵏ ⴾⵍ ⵓⵏ ⵍⴾⵢⴰ ⵏⵤⵀⵜ ⴹⵗⵙ⵰ 6ⴶⵔⵓ ⴹⵗⵙ ⴾⵀⵜⵏ ⵓⴰ ⴹⵔ ⵏⴹⵓ ⵢⵏ ⵗⵍⵍ ⵏⵗⵔⵎ ⵏⵍⵙⴾⵏ⵿ⴹⵔⵢⴰ ⵜⴾⵏ ⴾⵍ ⵏⵜⵍⵢⴰ ⴶⵏⴰ ⴹⵗⵙ⵰

7ⵏⴶⴰ ⴹⵏ ⴶⵜⵏⵏ ⵏⵙⵍⵍⵎ ⴼⵍ ⵎⵏ ⵙⵍⵏ ⴶⵔⴹ ⵙ ⴹⵏⵂⵤ ⵗⵔⵎ ⵏ⵿ⴾⵏⴹⵙ⵰ ⵜⴶⴹⵍⵏⴰ ⵙⵂⵜ ⵏⴹⵓ ⴹ ⵏⴶⵍⵓ ⴹⵗ ⵏⵎⴹ ⵓⵏ ⵜⵤⵔ ⵏⵏⵎⴹ ⴾⵍ ⵎⵙⵏ ⴶⵔⵓⵜⵍⵏ ⵙ ⵜⵓⵏⵓ ⴾⵔⵜ⵰ ⵙ ⵏⴾⵢ ⴼⵍ ⵙⵍⵎⵏ ⵏⵎⴹⵗ ⵢ ⴾⵔⵜ ⵏⴶⵤ ⴼⵏⵜ⵰ 8ⴶⵔⴹ ⵙ ⵏⵍⵍ ⵙⵍⵎ ⵏⴶⵔⵓ ⵂⵔ ⵏⵓⴹ ⴹⴶ ⴶⵏ ⵙⵎ «ⵤⵤⵀⴰ ⵓⵏ ⵂⵙⵢⵏⵏ ⵏⵗⵍⵍⵏ» ⵏⵎⵂⵤⵏ ⴹⵗⵔⵎ ⵏⵍⵙⵢⴰ⵰

ⵜⵤⴼⴰ ⴹⵍⵎⵤ ⵏⵎⵏ ⵗⵍⵍ

9ⵙⵍⵍⵜⵏⴰ ⵛⴾⵍ ⵓⵏ ⵓⵍⵏ ⵛⴾⵍ ⴹⵗ ⵗⵍⵍ ⵏⵎⵏ ⴹⵗ ⵎⵔⴹⴰ ⴶⵤⵜⵓ ⵍⵗⵔⵔ ⴼⵍⵙ ⵓⵍⴰ ⵤⵎ ⵏ⵿ⴾⵍⵍⵢⵂⴹ ⵓⵏ ⵗⵔⵜ ⴾⵢ⵰ ⴹⵢ ⴼⵍ ⴶⴰ ⵀⵍⵙ ⵢⵢⵜⴹⵏ ⵓⵏ ⵏⴹⵏⵏ ⴹⵗ ⵗⵍⵍ ⵏⵎⵏ ⵏⵙⵈⴰ ⵏⵙⵏ 10«ⵎⴹⵏ ⵂⵏⵢⵗ ⵙ ⵛⴾⵍⵏⵏⴰ ⴹ ⵜⴶⵤ ⵀⴰ ⵏ⵿ⵜⵗⵔⴰ ⴹⵗⵛⴹ ⵤⵓⵔⵏ⵰ ⵓⵔⴶⵗ ⵗⵍⵍ ⵏⵎⵏ ⵗⵙ ⴹⵍⵍⵏⵜ ⵤⵂⵍⴾⵏⵏ ⴾⵍⵔ ⵏⴾⵏⵢ ⴹⴰ ⴹ ⵏⴶⵤ ⵜⵤⴾ ⵜⵏ⵰» 11ⵎⵛⵏ ⵙⴼ ⴾⵀⵜⵏ ⴹⴼ ⵏⵀⵜⵓ ⵜⴰ ⴹⵙⵏⴶⴰ ⵍⵙ ⵓⴰ ⵓⵢⵏ ⵗⵍⵍ ⵏⵎⵏ ⴹⵓⴰ ⵜⵍⵏ ⴹⴼ ⵏⵏⵙⵈⴰ ⵓⴰ ⴹⵙⵏⴶⴰ ⵀⵍⵙ⵰ 12ⴹⴹ ⵎⵙ ⵙ ⵤⵤⵀⵓ ⵏⵗⵍⵍⵏ ⵏⵎⵏ ⵓⵏ ⵓⵔ ⴹⵗⵙ ⵍⵗ ⴾⵙ ⵏ⵿ⵜⴶⵔⵙ⵿ⵜ ⵜⵏ⵿ⴾⵔ ⵜⵛⵎ ⵏⵢⵜⴹⵏ ⵓⵏ ⵎⵛⵗⵍⵏ ⵏⵗⵍⵍ ⴶⵏ ⵜⵏⵜ ⴹ ⴶⵍⵏ ⴶⵎⵢⵏ ⴹⴶⴹ ⵏⵢⵏ ⵗⵔⵎ ⵎⵙⵏ ⵤⵤⵀⵓ ⵏⵗⵍⵍⵏ ⵏⵎⵏ ⴶⵏ ⵙⵎ ⴼⵏⴾⵙ ⵂⵏ ⴾⵍ ⵎⵙⵏ ⴶⵔⵓⵜⵍⵏ ⵙ ⵜⵓⵏⵓ ⴾⵔⵜ ⴾⵙⵏ ⵜⴶⵔⵙ⵿ⵜ ⴹⵗ ⵗⵢⵏ⵿ⵗⵢⵏⵜ ⵙⵢⵏ ⵙⵓⴹ ⵙⴰ ⵙⵔ ⴶⵍⴰ ⴹⵗ ⵜⵔⵎ ⵓⴰ ⵂⴹⵏ ⵙⴰ ⵙⵔ ⵜⵎⵙⵏⴰ ⴹⵗ ⵜⵔⵎ⵰

13ⵍⵏ ⴹⵏ ⴹⴰ ⵙ ⴹⴶⵔ ⵔⵜ ⵏⴹⵓ ⵓⵏ ⴶⵍⴰ ⵜⵤⵔ ⴾⵙⵏ ⵢⵗⵍⵍ ⵏⴹⵢ ⴶⵍⵏ ⵙⵎⴹⵗⵏ ⵢⴾⵍ ⵎⵙⵏ ⴶⵔⵓⵜⵍⵏ ⵏ⵿ⴾⵔⵜ ⴹⵗ ⵂⵤⵏ ⵜⵛⵛⵓⵜⵏⵜ ⵗⵍⵏ ⴹ ⴼⵔⴶⵏ ⵎⵔⴹⴰ ⴶⵢ ⵏⵓⴰ ⵔⵏ⵰ 14ⵎⵛⵏ ⵓⵔ ⵂⴶⵏ ⴹⵜⴾⵍⵢ ⵙ ⴼⵍⵙⵏ ⴹⵜⴶⵔ ⵜⵤⴼⴰ ⵜⵙⵂⵜ ⵙ ⵜⵓⵏⵓ ⵜⵏ ⵜⵎⵙⵏⴰ ⴹⵗ ⴹⵏⴶ ⵜⴶⵜ ⵙⵎ ⵢⵔⴾⵍⵏ ⴹⵙⵏ⵿ⴹⵜⴶⵜ ⴶⵤ ⵓⵏ ⴾⵍ ⵏ⵿ⴾⵔⵜ⵰ 15ⵜⵤⵔ ⵀⵜ ⴹⵓ ⵗⵍⵍ ⵏⵎⵏ ⵏ⵿ⴹⵔⵏⴰ ⴹⴼⵏⵜ ⴶⵍⴰ ⴹⵔⵏⵗ ⵀⵜⵓ ⴹⵓ⵰

16ⵙ ⵏⴶⵤ ⴼⵢ ⵏⵔⵜ ⵏⴾⵍ ⵎⵙⵏ ⴶⵔⵓⵜⵍⵏ ⴶⵏ ⵙⵎ ⴾⵓⴹⴰ ⵏⴶⴰ ⵢⵔⵜ ⵏ⵿ⵜⵗⵍⵍ⵿ⵜ ⵏⵎⵏ ⵍⵓⵢ ⵗⵍⵍ ⵓⴰ ⵏⵂⴰ ⵜⵎⵓⵜ ⵜⴰ ⵏⵔⴰ ⴶⵔⴹ⵰ 17ⴹⴾⵍⵏ⵿ⵜⵜⴹⵓ ⵎⵛⵗⵍⵏ ⵏⵗⵍⵍ ⴶⵏ⵿ⵜⵜ ⴹⵗ ⵎⵙ ⵏⵗⵍⵍ ⵜⵤⵔ ⵙⵗⵍⵢⵏ⵿ⴹⵓ ⵗⵍⵍ ⵏⵎⵏ ⴾⵜⵏⵜ ⵗⵏⵏ ⵤⵓⵔⵏⵏ ⵜⵀⵏⵙ ⵙⵔⵙⵏ ⴼⵍ ⵜⵓⵔⵤⵎⵤⵢⵏ ⵎⵏ⵰ ⵙⵔⵙⵏ ⴼⵔ ⵓⴰ ⵙⴾⴼ ⴹⵓ ⵙⵍⵍⵎ ⴼⵍ ⵎⵏ ⴼⵍ ⴹ ⴶⵓ ⵙⵍⵏ ⴼⵍⵙ ⴾⵙⴹⵏ ⴹ ⵙ⵿ⵜⵀ ⵗⵍⵍ ⵢⵎⴹⵍ ⴹⵗ ⴹⴶ ⴶⵏ ⵙⵎ ⵙⵔ⵿ⵜⵙ ⴹⵗ ⴶⵤⵍ ⴶⵔⵓ ⴶⵍⴰ ⵗⵍⵍ ⵀⵜⵓ ⴹⵔⵏⵗ ⴹⵓ⵰ 18ⵓⴰ ⵜⴶⴰ ⵜⵤⴼⵏ ⴹⵗ ⵙⵂⵜ ⵙ ⵤⵍ ⵓⴰ ⵂⴹⵏ ⴹⵏⴶⵔⵏ ⵎⵛⵗⵍⵏ ⵏⵗⵍⵍ ⵍⵍⵏ ⴹⵗ ⴶⵔⵓ ⴼⵍ ⴹ ⴼⵙⵙ ⵗⵍⵍ⵰ 19ⵙ ⵤⵍ ⵓⵏ ⴾⵔⴹ ⴶⵔⵏⵏ ⴹⵗ ⵎⵏ ⵙ ⴼⵙⵏ ⵓⵏ⵿ⴹⵏⵙⵏ ⵙⵙⴾⵏⴰ ⵏⵗⵍⵍ⵰ 20ⵜⴼⴾ ⵓⵍⴰ ⵜⵔⵏ ⵏⴶⴰ ⴹⵏ ⴶⵜⵏⵏ ⵓⵔ ⵜⵏⵏⵢ⵰ ⵓⴰ ⵜⴶⴰ ⵜⵤⴼⵏ ⴹⵗ ⵙⵂⵜ ⵏⴾⵙ ⴼⴹⴰ ⵜⵎⴰ ⵏⵎⵏⵏⴰ⵰

21ⴹⵏⵏ ⵏⴶⵏ ⵓⵔ ⵜⵍⴰ ⵢ ⵜⵛⵏ ⵔⵜ ⵜⵤⵔ ⵀⴹⴹ ⵀⵍⵙ ⴹⵗ ⵎⵙ ⵏⵢⵜⴹⵏ ⵏⴰ «ⵎⴹⵏ ⵏⵔ ⵜⵜⴼⵎ ⵏⵙⵈⴰ ⵓⴰ ⴹⵓⵏⴶⵗ ⵜⵆⵎⵎ ⴹⴰ ⵓⵔ ⴹⵜⴶⵎⴹⵎ ⴾⵍ ⵓⵏ ⴾⵔⵜ⵰ ⴹⵢ ⵓⵔ ⴾⵓⵏ⵿ⵤⴶⵔⵓ ⵀⴰ ⵏ⵿ⵜⵗⵔⴰ ⵓⴰ ⴹⵂⵍⴾ ⵓⴰ⵰ 22ⵎⵔⵏ ⵎⵔⴹⴰ ⴶⵎⵢⴰ ⴹⵗⵓⵏ ⴹ ⵓⵔ ⵜⴾⵙⵎ ⵜⵎⴰ ⴼⵍⵙ ⵓⵔ ⴾⵓⵏⵂⴰ ⵢ ⵤⴶⵎⴹⵏ ⵎⵏⵜ ⵎⵛⵏ ⵢⴰ ⵗⵍⵍ ⵏⵎⵏ ⵏ⵿ⵜⴰ ⴹⵏⵗⴶⵎⴹ⵰ 23ⵏ⵿ⴹⴹ ⴹⵏⴼⵍⵍ ⵏ⵿ⴶⵍⵙ ⵏⵎⵛⵏⴰ ⵓⴰ ⴹⵍⵏ ⵂⵗ ⵛⵗⵍⵏⵜ 24ⵏⵢ "ⵀⵍⵙ ⴾⵢⵓⵔ⵿ⵜⴶⵤ ⵜⵙⴰ ⵆⵢⵙⵔⴰ ⵓⵏ ⵎⵏⴾⵍ ⵓⴰ ⵤⵓⵔⵏ ⴾⵏ⵿ⴹⵀⴰ ⵜⵀⴹⴹⴰ ⴹⵜⵙ ⵛⵔⵗⴾ⵰ ⵎⵔⵏ ⵏⵢ ⵎⵛⵏⴰ ⴶⴾ ⵔⵈⵎⵜ ⵜⵎⵙⵜ ⴶⵤ ⵏⵢⵜⴹⵏ ⴾⵍ ⵓⵏ ⴹⵔ ⵜⵏⵎⵂⴰ ⵗⵍⵍ ⵏⵎⵏ ⴹⴰ⵰" 25ⴹⵗ ⴹⵢ ⵎⴹⵏ ⴹ ⵓⵔ ⵜⴾⵙⵎ ⵜⵎⴰ ⴼⵍⵙ ⵤⴶⵤⵏⵗ ⵙ ⵎⵛⵏⴰ⵰ ⵓⴰ ⴹⵏⴰ ⴹⵏ ⴹ ⴶⵓ ⵙⵎⴾⵏ ⴹⴰ⵰ 26ⵎⵔⵏ ⴾⵏ⵿ⴹⵀⴰ ⵙ⵿ⵜⵀ ⴹⵔⵏⵗ ⵗⵍⵍ ⵏⵎⵏ ⵢ ⵜⵛⵛⵓⵜ ⵏⴾⵍ ⵢⵏ ⵎⵙⵏ ⴶⵔⵓⵜⵍⵏ⵰»

27ⵙ ⴶⴰ ⴹⵓⵏⵢ ⵏⵂⴹ ⵏⵤⵍⵏⵏⴰ ⵓⵏ ⵎⵔⵓ ⴹⴾⵤ ⵜⴶⵔ ⴼⵍⵏⴰ ⵜⵤⴼⴰ ⵀⵜ ⴹⵔⵏⵗ ⴹⵓ ⵗⵍⵍ ⴼⵍ ⴶⵔⵓ ⴶⵏ ⵙⵎ ⴹⵔⵢⵜⴾ ⵏⴼⵔⵢⵏ ⵎⵛⵗⵍⵏ ⵏⵗⵍⵍ ⵏⵎⵏ ⴹⵙ ⵎⴹⵍ ⵓⵔ ⴶⴶ⵰ 28ⵜⵤⵔ ⴶⵔⵏ ⴹⵗ ⵎⵏ ⵗⵏ ⵢⵙⵔⵙ ⴾⵜⵏ ⵜⵤⴶⵔⵜ ⵏⴶⵔⵓ⵰ ⵜⵆⵍ ⵜⵤⴶⵔⵜ ⵏⵎⵏ ⴹⵗ ⴹⴶ ⵓⵏ ⵙⵢⵜ ⵜⵎⵔⵓⵏ ⵏⵗⵍ ⴹⴾⵤ⵰ ⵙ ⴶⵏ ⵎⵤⵢ ⵍⵙⵏ ⵜⴾⵜ ⵙⵏⵏ ⴹⴶ ⵓⵏ ⵜⵎⵙ ⵜⵤⴶⵔⵜⵏⵜ ⵙⵎⵙⵜ ⵜⵎⵔⵓⵏ ⵏⵗⵍ ⴹⵙⴹⵙ⵰ 29ⵜⴶⵤⵜⵏ ⵜⵙⴰ ⵏⴹ ⵏ⵿ⴼⵍ ⵗⵍⵍ ⵏⵎⵏ ⵢ ⵜⵂⵏ ⵜⵤⵔ ⴶⵔⵏ ⴹⵗ ⵎⵏ ⴹⵗ ⵍⵆⵎ ⵏⵗⵍⵍ ⴾⵤⵜ ⵜⵤⵍⵢⵓⵏ ⵛⵏ ⵙ ⵜⵏⴹⵢⵏ ⵎⵔⵏ ⴹ ⵜⵜⵔⵏ ⵜⵏⵙⴾⵏⵏ ⵤⵍ⵰ 30ⴹ ⴶⵎⵢⵏ ⵎⵛⵗⵍⵏ ⵏⵗⵍⵍ ⵏⵎⵏ ⴹ ⴹⴶⴶⵏ⵰ ⵜⵤⵔ ⵙⵔⵙⵏ ⵜⵗⵍⵍ⵿ⵜ ⵏⵎⵏ ⵜⴰ ⵏ⵿ⴹⵔⵜ ⴹⵗ ⴶⵔⵓ ⴶⵏ ⵙⵔⵓ ⵙ ⵔⵏ ⴹ ⵏ⵿ⴹⵢⵏ ⵗⴼ ⵏⵗⵍⵍ ⵙ ⵛⵢⴹ ⵛⵤⵍⵢⵓⵏ⵰ 31ⵎⵛⵏ ⵏⴰ ⵀⵍⵙ ⵢ ⴾⵀⵜⵏ ⴹⵙⵌⵜⵏ «ⵎⴹⵏ ⵏ ⵙ ⴶⵎⴹⵏ ⵗⵍⵍ ⵓⴰ ⵓⴹⵢ ⵓⵔ ⴹⵓⵏ⵿ⵜⵍⴰ ⴶⵎⴹ ⴹⵎⵏⵓⵏ⵰» 32ⵜⵤⵔ ⵍⵢⵏ ⵙⵌⵜⵏ ⵗⵏⵏ ⵓⵏ ⵆⵏⵏ ⵜⵗⵍⵍ⵿ⵜ ⴶⵍⵏ ⴹⵔⵙ ⵎⵏ⵰

33ⵙ ⵀⴾ ⵤⵍ ⵢⴶⵢ ⴶⵎⵢ ⵀⵍⵙ ⴹⵗ ⵓⴹⵏ ⴾⵍ ⴹ ⵜⵛⵓ ⵏⵙⵏ «ⵤⵍⴹⴰ ⵤⵍⵏⵓⵏ ⵓⵏ ⵎⵔⵓ ⴹⴾⵤ ⴹⵛⵓⵛⴰ ⵍⵀⵙⵏ ⵓⵔ ⵜⵍⴰ ⵔⵜ ⵙ ⵜⵔⵎ ⵜⵜⵢⵏⵜ ⵓⵍⴰ ⵢⵏ ⴶⵤⵏ ⵎⵓⵏⵓⵏ⵰ 34ⴹⵗ ⴹⵢ ⴶⵎⵢⴰ ⴹⵗⵓⵏ ⴹ ⵜⵜⵛⵎ ⴼⵍ ⴹ ⵜⵔⴶⵎ ⴼⵍⵙ ⵓⵔ ⴾⵓⵏⵂⴰ ⵢ ⴹⵗ ⵏ⵿ⵤⵀⴰ ⵓⵍⴰ ⵏ⵿ⵤⴹ ⵢⵏ⵿ⴹⴰ ⵏⵗⴼⵏⵜ⵰» 35ⵙ ⵏⴰ ⵀⵍⵙ ⵓⵏ ⴹⴾⵍⴹⵓ ⵜⴶⵍⴰ ⴶⴰ ⴶⴹⵏ ⵢ ⵎⵛⵏⴰ ⴹⵜⵙⵏ ⴾⵜⵏⵙⵏ ⵎⵔⵏ ⴾⵔⵎⵜ ⴹⵗⵙ ⴹ ⵜⵜⵓ⵰ 36ⵜⴶⵎⴹⵜⵏ ⵜⵙⴰ ⴾⵜⵏⵙⵏ ⵜⵛⵏ ⵏ⵿ⵜⵏⵢ ⴹⴰ⵰ 37ⵓⴰ ⵏⵎⵙ ⴹⵗ ⵗⵍⵍⵏ ⴾⵜⵏⵏⴰ ⵙⵏⵜⵜ ⵜⵎⴹ ⵏⵓⴹⵏ ⴹⵙⵢⵜ ⵜⵎⵔⵓⵏ ⴹⵙⴹⵙ⵰ 38ⵙ ⵢⵓⵏⵏ ⴹⵏⵆⵍⵏ ⵍⴾⵎⴰ ⴹⵗ ⴶⵔⵓ ⴼⵍ ⴹ ⵙⴼⵙⵙⵏ ⵗⵍⵍ ⵏⵎⵏ⵰

39ⵙ ⴶⴰ ⵤⵍ ⵏⵢⵏ ⵎⵛⵗⵍⵏ ⵏⵗⵍⵍ ⵙ ⴾⵍ ⵓⴰ ⴹⵏⵂⵤⵏ ⴹⵏ ⵓⵔ ⵜⵤⴹⵢⵏ⵰ ⴶⵏ ⵤⵤⵍ ⴹⵗ ⵜⵛⵛⵓⵜ ⵏⵏ ⴹ ⴶⵎⵢⵏ ⴹⵙⵔⵙ ⵓⵢⵏ ⵗⵍⵍ ⵂⵔ ⴹⵙ⵿ⵜⵙⵙ⵿ⵜⵀⵏ ⴾⴹ ⴹ ⴼⵔⴶⵏ ⵓⵏ⵰ 40ⴾⵙⵏ ⵛⵤⵍⵢⵓⵏ ⵛⵏ ⵏ⵿ⴹⵢⵏⵏ ⵗⵍⵍ ⵢⵏ⵿ⵜⵏⵜⵏ ⵙⵎⵏ ⵔⵏ ⴹⵗ ⵗⵏⵏ ⵏ⵿ⴾⵜⴾⵓⵜⵏ ⵓⵏ ⵙⵏⵎⴹⵏⵏ ⵗⵍⵍ⵰ ⴹⴼⵔ ⴹⵢ ⴾⵙⵏ ⴹⴰ ⵢⴼⵔ ⵓⴰ ⵂⵏ ⴹⵜ ⵗⵍⵍ ⴼⵍ ⴹ ⵜⵙⴾⴼ ⴹⵓ ⵎⵔⵏ ⵙⵏⵎⵓⵍⵏ⵿ⵜⵓ ⴹⵜⴶⴹⵎⵢⵜ ⵂⴰ ⵤⵤⵍ⵰ 41ⵎⵛⵏ ⵏ⵿ⴼⵍⵏ ⵢ ⵜⴶⴼ⵿ⵜ ⵏⵤⵤⵍ ⵜⵂⵜ ⴶⵔⵓ ⵜⵜⵢ ⴹⵗⵙ ⵗⴼ ⵏⵗⵍⵍ ⵎⵤⵢ ⴹⵎⵜⴾⵓⵢ⵰ ⵜⵤⵔ ⴹ ⵜⵔⵤⵓ ⵙⵂⵜ ⵏ ⵜⵏⵤⵎⵔⵏ ⵍⵆⵎⵏⵜ⵰ 42ⵏⵢⵏ ⵙⵌⵜⵏ ⵓⵏ ⵗⵙ ⵏⵎⵏⴾⵏ ⴼⵍ ⴹ ⴾⵙⵏ ⵎⵏ ⴹⵗ ⵎⵙⴾⵙⴰ ⴼⵍ ⴹ ⵓⵔ ⵛⴼ ⵓⵍⵢⵏ ⴹⵗⵙⵏ ⴹⴶⴶ⵰ 43ⵎⵛⵏ ⴶⴹⵍⵙⵏ ⴾⵀⵜⵏⵙⵏ ⴶⵢ ⵏⵓⵏ ⴼⵍⵙ ⵔⴰ ⴹ ⴶⵤ ⵀⵍⵙ⵰ ⵜⵤⵔ ⵎⵔ ⴾⵀⵜⵏ ⵢⵜⴹⵏ ⵓⵏ ⵙⵏⵏ ⵓⵜ ⵏⵎⵏ ⴹ ⵜⵔⴶⵏ ⴹⵗ ⴶⵔⵓ ⵤⵔⵏⵏ ⵙ ⵜⴶⴹⵎⵢⵜ⵰ 44ⵎⵔⵏ ⵢⵜⴹⵏ ⵓⵏ ⵂⴹⵜⵏⵏ ⵏ⵿ⵜⵏⵢ ⵎⵔ⵿ⵜⵏ ⵙⴹ ⵓⵔⵏ ⴾⵜⴾⵓⵜⵏ ⴹⴶⵏⵜⵏ ⵏⵗⵍⵍ ⵓⵏ ⴹⵏⵙⵔⵏⵏ⵰ ⵎⴾⵏ ⴹⴰ ⵙ ⵓⴹⵏ ⴾⵜⵏⵙⵏ ⵜⴶⴹⵎⵢⵜ ⵏⴶⵔⵓ ⵔⴶⵏ⵿ⴹⵓ⵰

Currently Selected:

ⴶⵜⵏ 27: TTQtg

Highlight

Copy

Compare