Proverbo 31
31
Konseho do asa ka patol
1Niaya sa o konseho a vinata di Patol a Lemuel no ina na: 2“Imo o oyod ko a ichaddaw a manganak as imo o atbay no dasal ko as ango paro vatahen ko dimo. 3Ipoha moava o ayet mo kano kartos mo dira do mavavakes, ta aro dana o nirarayaw da nia a patol. 4Adngeyen mo yaken mo Lemuel. Logar sava ominom so palek o patol anmana no kahoho pa a ominom sia. 5Ta an ominom sa ya am kawayakan da do ononotan sa kano anohed da no mangaylangan. 6No palek am maparin a tovatova dira do madiman dana kanira no mahara a mandidiw. 7Ominom sa tapian kawayakan da o kaoyod da a makasiasi kano abo so konswelo do viay.
8“Itbay mo sa o di makatbay so karakohan da. Ipachidiman mo o anohed da no abo so mapaparin. 9Defendien mo sa as kahosto no kahosga mo dira. Ipachidiman mo o anohed da no makasiasi kanira no mangaylangan.”
No kakovot a mavakes a oyod a mapia a ehemplo
10Oyod a masadit o kapakavoya so oyod a mapia a kakovot a mavakes as no balor na am manghavas pa kano balor no oyod a rakoh a polak.
11Oyod sia ichasaray no kakovot na as mangwan sava anti do pakasisian. 12As mintras maviay sia am mapia o parinyen na atavo do kakovot na. Pakararahten nava sia.
13Maynehah ava as mamarin sia so lamit kano ayoayob.
14Mapaychepeh sia so kanen a yapo do matatarek a logar a akma so kapayakot no asa ka bapor.
15Mayvangon sia manam so kapaysehsehdang a omprepara so riagen no familia na as kayokoyokod na nira no pachirawatan na sa.
16Konsideran na o idakaw a tana as kasadiw na sia as kamohamoha na dia no naho na kartos.
17Oyod sia mapangto as di mangolangolay.
18Mapanmo na o balor no atavo a parinyen na. Maytrabaho pa sia a manda do kaoyod narana mahep.
19Iya dana o mamarin so onayen na.
20Mayayavahen dira do makasiasi kanira no mangaylangan.
21Ichamo nava o kawara no hanebneb no amian, ta mian o niprepara na a ayoayob da atavo.
22Mamarin ya so irasay do kama as kapangonay na so mafino a lamit.
23No kakovot na mahakay am masinchad no atavo ta mian o mato a anongen na.
24Mamarin o mavakes aya so lamit kano tahed as kapadakaw na nia dira do maynegosio.
25Rakoh o anib sia as kangdet na a somalap so atavo a maparin as kadi na komtoktoan no kapaypamalkem na.
26Matanoy a mayliliak as kasolib na a mapavata so ichapia da no kadwan.
27Mapia o katidib na dia o sinahad no vahay na kano kaylangan da.
28Oyod da sia ipakamia no manganak na sa as kano kakovot na a makavata sia, 29“Aro sa o mavavakes a mapipia so dadakay, pero imo o mapía dana dira.”
30No manghapot a avid am maparin ava ichasaray, ta makalo ya mangopas. As nawri o dadayen o asa ka mavakes a sominchad do Dios a aniven.
31Torohan nio so vahes no mapia saya pariparinyen na, ta mayanong ya sincharan.
Currently Selected:
Proverbo 31: VTSP
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.