Impezayag 10

Is Deisey he Velesahan

1Ne zutun neehè ku is sevaha pa he mekeg̵eg̵ehem he velinsug̵uen he ebpenaug he ebpuun te langit. Midtaved diyà te kandin is gapun ne mibpeyungan is ulu zin te velugtu. Iring te kedsig̵a te andew is buked din ne is menge paa zin, ne henduen be te menge tukud he regreg. 2Ne ziyà te velad din egewezan din is nevekar en he zeisek he velesahan. Is kewanan he paa zin, ne ziyè din ig̵iek te lawed te zag̵at ne is givang, ne ziyà te tanà. 3Ne mibpekezag̵ing sikandin is ed-umew ne is kezag̵ing te egkeg̵iyen din ne henduen te hinig̵er te erimaung. Ne zutun te ked-umew zin, mibales te pitu he veransì he utew mezag̵ing. 4Ne zutun te kebales te veransì, idsurat ku pezem is nezineg ku, iyan, nezineg ku is egkag̵i ziyà te langit te, “Ieles nu is ibpesavut kayi te pitu he veransì ne kenè nu isurat.”

5Ne zutun, sikan is belinsug̵uen he neehè ku he edhithitindeg he ziyà is sevaha he paa zin te tanà ne is sevaha ziyà te zag̵at, imbayew zin diyà te langit is kewanan he velad din. 6Ne impepirmahan din is egkeg̵iyen din te wazà kemetayen he Megbevayà he nenlimbag te langit wey tanà wey zag̵at wey nenlimbag daan te langun he tag̵ù kayi. Ke sikandin te, “Kenè en heini ebpekesendud! 7Ne emun edhiyupen dutun te ikepitu he velinsug̵uen is budyung din, ne human dutun ed-ul-ulaha te Megbevayà is tuyù he in-eles din sumalà is migkag̵i zin dengan diyà te menge ebpeneuven din he menge sulug̵uen din.”

8Ne zutun mid-uman megkag̵i zini te kediey sikan is nezineg ku he egkag̵i ziyà te langit. Ke sikandin te, “Hendutun ka te velinsug̵uen he ziyà egiek is sevaha he paa zin te tanà ne is sevaha ziyà te zag̵at. Ne kuwaa nu is belesahan he igkulang din he neebriyan en.” 9Ne midhendutun a te velinsug̵uen ne mibuyù ku haazà is deisek he velesahan. Ne migkeg̵iyan e zin te, “Kuwaa nu ne keena nu. Meemis utew he iring te teneb diyà te vèbè nu, iyan, emun diyè en te g̵etek nu ne utew mepezes.” 10Ne migkuwa ku haazà is deisek he velesahan diyà te velad din, ne migkaan ku ne meemis iyan diyà te vèbè ku su iring te teneb, iyan, hein neeveleng ku, ne mibmepezes utew ziyà te g̵etek ku.

11Ne zutun duen migkag̵i zini te kediey, ke sikandin te, “Kinahanglan he iuman nu ipenudtul is ibpepenudtul kenikew te Megbevayà he egkeulaula te mezakel he menge hadì wey menge etew ziyà te minsan hendei he g̵inhedian wey minsan hengkey he kineg̵iyan.”

Currently Selected:

Impezayag 10: mbbNT

Highlight

Copy

Compare