Hibriyuhanen 10

1Ne egkesavut te en he is kesug̵uan he imbilinbilin ni Moises, ne alung dà; ne is langun he meupiya he egkehimu pinaag̵i ki Kristu, ne iyan hustu he impaalung dutun te kesug̵uan. Su insug̵ù dutun te kesug̵uan he kinahanglan kada tuig, ne layun edhimuwa is menge kebpemuhat. Ne tenged kayi egkesavut ta zaan he pinaag̵i kayi te kebpemuhat kenà egkehimu he ebmetazeng is menge etew. 2Su emun pinaag̵i zutun he paag̵i nelumpiyuwan is menge ulaula te menge ed-azap, ne wazè en kinahanglan he ed-uman dan pa ebpemuhat su nengepesaylu en pezem is menge salè dan ne egkesavut dan dutun he kenè en sikandan edsilutan tenged te menge mezaat he ulaula zan. 3Ne g̵eina te kada tuig dutun, kinahanglan gihapun he ed-uman dan ebpemuhat ne netuenan dan he wazè bes maawà is menge salè dan. 4Su kenà egkehimu te minsan hengkey he paag̵i he igkeawà te menge salè tew is lengesa te menge vaka wey menge kambing.

5Ne egketuenan ta heini su zutun te timpu zengan he nekeuma si Kristu zini te kelibutan, migkag̵i sikandin diyà te Amey zin he Megbevayà te,

“Kena iyan is menge ibpemuhat he ayam egkesuatan nu, kekenà,

midlimbag nu is lawa he egkeg̵amit ku,

ne iyan heini egkesuatan nu he ibpemuhat.

6Su kenè nu iyan egkesuatan is kebpemuhata zan te menge ayam he edtutungen wey is lengesa te menge ayam he ibpemalis te menge salè dan.

7Ne tenged kayi migkag̵i si Kristu ziyà te Megbevayà te,

‘Iyan impengetuvang ku kenikew su edtumanen ku en is egkesuatan nu sumalà is insurat he tagnà mehitenged kedì dutun te insurat he lalag nu,’ ” ke sikandin.

8Midhunaan din te egkag̵i he kenà egkesuatan te Megbevayà is menge halad wey menge kebpemuhat he edtutungen wey is lengesa te menge ayam he ibpemalis te salà. Ne migkag̵i zin heini minsan pa te intelaan heini te kesug̵uan. 9Ne mid-umanan din te egkag̵i te, “Iyan impengetuvang ku kenikew su edtumanen ku en is egkesuatan nu.” Ne tenged kayi egkesavut tew he mid-ilisan te Megbevayà is daan he paag̵i te kebpemuhat ne iyan in-ilis dutun is kebpemuhata te lawa ni Kristu. 10Ne g̵eina te midtuman ni Jesu Kristu is egkesuatan te Megbevayà, nengepalis is menge salè tew pinaag̵i te kesevaha zà he kebpemuhata zin te keugelingen din he lawa.

11Ne zutun te zaan he paag̵i te ked-azap, is menge memumuhat he Hudiyu, ne andew-andew ziyè dan te simbahan edhithitindeg is edterebahu su edtumanen dan is baal zan te kebpemuhat. Ne heini is menge kebpemuhat dan, ne kenà gihapun ebpekeawà te menge salà te menge etew. 12Iyan, si Kristu mulà, kesevaha zà sikandin mebpemuhat, ne naawà dutun is menge salè tew ne kenè en heini kinahanglan he ed-umanan pa maan te minsan keenu. Ne tuus te netapus din en heini is terebahu zin su mibpinuu sikandin diyà te lavew he pinuuwà te egkekewanan te Megbevayà su edhadì. 13Ne kemulu pa sikandin dutun guntaan su edteg̵azan din is timpu keuzemà he zutun egkevakus te Megbevayà is langun he menge kuntada zin wey sikandin mekehadì. 14Ne tenged kayi te kesevaha zà he kebpemuhat din diyà te Megbevayà, sikitew is mibpelisan din te salà, midhimu kiw zin he metazeng te wazà pidtemanan.

15Ne zuen daan ibpenurù kenitew te Wag̵as he Mulin-ulin dutun te insurat he Lalag te Megbevayà he edhenduen te,

16“Siak is Nengazen,

iyan heini veg̵u en he paag̵i

he edtukuzen ku zutun te menge sakup ku keuzemà wey ku sikandan mezawat.

Idsurat ku is menge sug̵ù ku ziyà te g̵ehinawa zan wey ziyà te isip dan,” ke sikandin.

17Ne mid-uman sikandin megkag̵i te, “Is menge salè dan wey is menge mezaat he ulaula zan, edlipatan ku, ne kenè ku en maan ed-isipen.” 18Ne zutun, geina te nengepesaylu zin en heini is langun, wazè en kinahanglan he zuen pa ibpemuhat he id-awà te menge salè ta.

Is Ked-uvey Ziyà te Megbevayà

19Ne, menge suled, tenged te mibpehimatey si Jesus ne impetig̵is is lengesa zin, wazè en kegkelenew ta te kedseled pinaag̵i te ked-ampù dutun te utew mahal he rug̵u he seled te kurtina. 20Su si Jesus, midhimu zin is ibayè ta pinaag̵i te kebpemuhata te lawa zin, ne heini is ibayà, ne ebpekeveg̵ey te untung he wazè din pidtemanan. 21Ne kenà duen dà taman su zuen te en utew lavew he memumuhat he ebayàbayà kenitew te menge sakup te Megbevayà. 22Ne tenged kayi, ed-etuvang ki en te Megbevayà, ne kenà tarù is ked-ezapa ta kandin. Edheg̵eten ta is kedtuu ta ne kenè ki eduwazuwa. Su netuenan ta he nepelisan ki en te lengesa ni Jesus ne netuenan ta zaan he in-awà kayi is menge salè ta. Nengebewtismuwan kiw en he tuus te kedlumpiyuwi kenitew te Megbevayà. 23Edhemenan tew is meheg̵et he kebperateng te kedtulusa kenitew keuzemà te wazà duwazuwa su netuenan tew he metinumanen is Megbevayà ne edhimuwen din is impenaad din kenitew. 24Kenà tew ed-ewaan dini te g̵ehinawa tew is kebpepurpurungè tew su wey layun mahal zini te g̵ehinawa tew is minsan hentei, ne wey layun mehimu te uman sevaha kenitew is menge meupiya he ulaula. 25Kenè tew ed-engkezan is kedtig̵um tew te ked-azap te Megbevayà; kenè tew ed-iringan is duma he menge tumutuu he mid-engkezan dan en is kedsimba, kekenà, edtig̵um kiw su wey kiw mekepesemsembag̵à. Utew heini kinahanglan, lavew en emun egketuusan ta he meg̵aan en is kedlikù te Nengazen tew he si Jesus.

26Ne emun nesavut te en is tutuu he tuluuwen, iyan, edtuyuen te pa maan is layun ked-ulaula te mezaat he ulaula, wazè en minsan hengkey he kebpemuhat he edewaten te Megbevayà wey maawà is salè ta. 27Is etew he iyan heini ulaula zin, ne iyan egkepengkusan din is mekelimlimezang he hukum kandin wey is utew meinit he hapuy he iyan idsilut te Megbevayà dutun te langun he edsukul kandin. 28Su is minsan hentei zengan he wazè din tehuza is kesug̵uan he imbilinbilin ni Moises, emun edtistig̵usan heini te minsan tetelu wey ke zezuwa ve he tistig̵us, ne kenà egkehizuwan, kekenà, edhimetayan sikandin. 29Ne emun iyan haazà, wey pe be kenà utew meveg̵at is idsilut dutun te etew g̵untaan he edsumpeliten din is hizu kandin te Anak te Megbevayà. Utew meveg̵at is idsilut kandin su igkepesavut din pinaag̵i zutun te mid-ulaula zin he wazà pulus dutun te lengesa ni Jesus he ibpalis pezem kandin he iyan tuus te veg̵u en he paag̵i te kebpekidsevaha te Megbevayà te menusiyà. Meveg̵at is silut kandin su edsumpeliten din is belig̵eg̵awen he Wag̵as he Mulin-ulin. 30Su netuenan tew he migkag̵i is Megbevayà te, “Iyan a ebales, iyan a edsilut kandan tenged te menge ulaula zan he mezaat.” Ne zuen daan insurat he lalag he edhenduen te, “Edsusiyen te Megbevayà is menge ulaula te menge sakup din.” 31Ne emun iyan edsilut is Megbevayà he wazè din kemetayen, ne utew mekehandekhandek haazà is idsilut din!

32Isipa niw is timpu zengan hein sikan kew pa meteyawi te tutuu he tuluuwen ne midtuuwan niw. Utew mezakel is kemereg̵enan he nengeeg̵iyan niw, iyan, nekeantus kew ne wazà haazà ikeawà te kedtuu niw. 33Mibpesipelahan kew ne midlupig̵an kew ziyà te etuvangan te mezakel he menge etew, ne zuen timpu he mid-unungan niw is menge zuma niw te menge pesipala kandan su nehizuwan niw. 34Ne nehizuwan niw, ne midtevangan niw is menge tumutuu he nengepirisu. Ne minsan pa te mibpen-ileg te menge etew is langun he menge azen niw, midlipey kew gihapun su netuenan niw he zuen azen niw he utew pa meupiya ziyà te langit he kenà egkeileg diyà te keniyu te wazè din pidtemanan. 35Umba, menge suled, kenè niw engkezi is kedsarig niw su emun meheg̵et is kedsarig niw te Megbevayà, egkezawat niw is suhul zin he utew meupiya. 36Kinahanglan he meinentusen kew wey niw metuman is egkesuatan te Megbevayà ne human niw egkezawat is impenaad din keniyu. 37Su zuen insurat he Lalag te Megbevayà he edhenduen te,

“Meg̵aan en is kebpekeuma te edteg̵azan niw ne kenà egkehimu he ebpekelimpas sikandin.

38Ne haazà is menge sakup ku he nengehimu en he metazeng tenged te kedtuu zan kedì,

ebeg̵ayan ku sikandan te untung he wazè din pidtemanan.

Iyan, ke zuen minsan hentei kandan he edsuwey tenged te kegkehandek, utew ku igkeepes,” ke sikandin.

39Iyan, sikitew, menge suled, kenè kiw iring te menge etew he edsuwey ne edsilutan sikandan te Megbevayà su mezesen mulà is kedtuu tew ne pinaag̵i kayi nelibri kiw en te silut.

Currently Selected:

Hibriyuhanen 10: mbbNT

Highlight

Copy

Compare