Luka 21
21
Nsembe ya nyankufwilwa muyakine
(Mk 12:41-44)
1Yesu pecilolesha ngako, ewona ŵanthu olemela opoza nsembe zawo mu bokosi ya nsembe mu Ngʼanda ya Mulungu. 2Ewona soti nyankufwilwa opozamo tundalama tuŵili. 3Pamene apo Yesu elaŵila kuti, “Nulaŵila cendi kuti nyankufwilwa wosauka uyu wapozamo kupula wonse aŵa. 4Cikomo ayakine wonse aŵa ayingopozamo vatapapo pa vinyinji va ali navo. Koma nyankufwilwa uyu, mu uzingwi wake, wapozamo vonse va ali navo, cukanga vangayositila cakulya.”
Matamano na manzunzo
(Mt 24:1-14; Mk 13:1-13)
5Ŵanthu ayakine enzolaŵila va Ngʼanda ya Mulungu kuti eyiwamisha na myala iweme, na votwala kwa Mulungu. Yesu elaŵila kuti, 6“Kulaŵila va vinthu vamuwona ivi, nsiku zikuza kuti pakaŵelini mwala weka umo palulu pa mwala uyakine; yonse azeayiwundule.”
7Ŵanthu ŵala ekonsha Yesu kuti, “Asambizyi, ivi vizevicitikelini? Tizetiwonele vinji kuti vonse ivi vili pafupi kucitika?”
8Yesu elaŵila kuti, “Ŵani celu osawuzyiwa wenye. Cikomo kukafwike ŵanthu anyinji mu zina yangu nakuzolaŵila kuti, ‘Mpulumushi Wolayizyiwa wala ni newo.’ Akuzolaŵila soti kuti, ‘Nsita yankhala pafupi.’ Ŵamene awo osati muzeŵakonkhe. 9Nipo patimuzamvwe va nkhondo na vowukilana, osati muzecite wowa. Ivi vuwamila kuti vikatatike kucitika, koma niyelini kuti cisilizyilo cufwika nsita yamene iyo.”
10Yesu eŵawuzya soti kuti, “Pakuti mtundu uzewukilane na mtundu uyakine, na ufumu uzewukilane na ufumu uyakine. 11Kukaŵe vivomezi na njala ku vitwa vonse. Kuzekuŵe soti viziŵikilo vikulu vupanga ŵanthu kuyopa vukuza ku nthangu.
12“Koma pavikaliyocitika vonse ivi, azeamukateni nomzingwishani. Azeaye namwe ku milandu ku kacisi wa Ayuda, nomupozani mu jele. Azeakutwaleni ku mafumu na kwa akulu–akulu ŵa boma cikomo ca newo. 13Uyu uzaŵe mpata woninkhalila umboni. 14Tetyo, muziŵiletu kuti musakonzekele malizu ŵakuti muzeŵayasuke pa mlandu apo. 15Newo nizekupeni malizu na nzelu zangakanelini keno kuzisusha alwani ŵanu. 16Na makolo ŵanu kumo, enekwanu, anansi ŵanu, na ayanu, ŵamene awo azekutwaleni kwa alwani ŵanu, nipo ayakine mwa mwewo azeapayiwe. 17Ŵanthu wonse azeatinkhane namwe cikomo ca newo. 18Muzemuŵe muliye matamano cukanga na sisi imo ikatayikepolini. 19Mukazokoselela, niye kuti muzetole moyo wanu.”
Yesu olaŵililatu va kucenekeka kwa Yelusalemu
(Mt 24:15-21; Mk 13:14-19)
20“Mukazowona kuti Yelusalemu wazingiwa na maumba ŵa nkhondo, ziŵani kuti cicenekeko cake cafwika. 21Pamene apo ŵala ali mu Yudeya azeawutukile ku malupili, ŵala ali mu mzinda afumemo, nipo ŵamene ali ku minda osati azeloŵe soti mu mzinda mwala, koma afisame. 22Cikomo masiku ŵamene awo azaŵe masiku wowezyamo, kuti vonse vala vilembewa mu Malembo vitweshewe. 23Ali na shamu anakazi ŵatiakaŵe na pakati, na ŵala ŵatiakonyonsha masiku awo. Pakuti pazepone manzunzo akulu mu calo cala, nipo ukali pa ŵanthu aŵa. 24Azeapayiwe pa nkhondo yoyofya, notolewa ngani ŵazya ŵa ŵanthu ŵa mitundu iyakine. Nipo Yelusalemu izeikandiwe na ŵa kunja mpaka ku nsilizyo kwake kwa nsita ya ŵala aliye cicetekelo.”
Kuwela kwa Mwana wa Munthu
(Mt 24:29-31; Mk 13:24-27)
25“Pazenkhale viziŵikilo vokanganisha pa zuŵa, pa mwezi, na pa nyenyezi. Pansi pano ŵanthu ŵa mitundu yonse azaŵe na nkhawa nosila nzelu, pakumvwa congo ca cimmana na mafunde ŵake. 26Ayakine azeakomoke na wowa polindililila vativikaŵele pa calo conse ca pansi, pakuti mphamvu za kululu zizesungʼuzyike. 27#Dn 7:13 Pamene apo ŵanthu azeawone Mwana wa Munthu owela mu mikumbi, ali na mphamvu na ulemelelo ukulu. 28Vamene ivi vikazotatika kucitika, muzemupaname nokweza mitu yanu, cikomo cinunulo canu cafwika pafupi.”
Linganizyo ya mkuyu
(Mt 24:32-35; Mk 13:28-31)
29Pa vuli pake Yesu eŵawuzya linganizyo elaŵila kuti, “Loleshani mkuyu na vimiti viyakine vonse. 30Mukatatika kuwona kuti matepo ŵake ophukila, muziŵe kuti mainza ali pafupi. 31Motetyo, soti, mukazowona vala vanalaŵila vucitika, muzeziŵe kuti Ufumu wa Mulungu uli pafupi.
32“Ni cendi nulaŵilisha kuti vonse ivi vizeviwoneke ŵanthu ŵa luko ino akaliyomwalila wonse. 33Kululu na calo ca pansi vizesile, koma malizu ŵangu azeasilelini nsita zonse.”
Yesu oŵacenjezya kuti aŵe na celu
34“Ŵani celu kuti mitima yanu ingayoŵelele na malyelelo, kukolwa, nodela nkhawa za moyo uno, kuti nsiku iyo ingakufwikileni movundumukizya. 35Pala izeiŵaponele ngani msampha ŵanthu wonse onkhala pa calo conse ca pansi. 36Mwakuŵa celu nsita zonse, nipo muwolomba, kuti muŵe na mphamvu zopulumukila ku vonse vitivizevicitike, na kuti mukapaname pa menso pa Mwana wa Munthu.”
37Masiku wonse Yesu enzosambizya mu Ngʼanda ya Mulungu, koma usiku enzofuma nakuyonkhala ku Lupili ya Olivi. 38Lomba ŵanthu wonse enzocelela mmamawa kuza kwa yeve ku Ngʼanda ya Mulungu kuzokumvwa malizu wake.
Currently Selected:
Luka 21: GMN
Highlight
Share
Copy
Want to have your highlights saved across all your devices? Sign up or sign in
Nsenga New Testament © The Bible Society of Zambia, 2015.