Yh 14
14
Yesu niye Njila ya kwa Atata
1Yesu ewuzya asambili wake ŵala kuti, “Mitima yanu isavutike. Cetekelani mwa Mulungu, cetekelani soti mwa newo. 2Mu ngʼanda mwa Atata muli vipinda vinyinji vonkhalamo. Kuti mwenze muliye vipinda, sembe nikuwuzyani. Nikuya kuyokuwamyilani malo. 3Nipo nikaluta kuyokuwamyilani malo, nikawele soti kuzokutolani, kuti namwe soti mukaŵe kwa newo. 4Nipo kwanukuya newo, njila yake muyiziŵa.”
5Thomasi elaŵila kuti, “Asikulu, tuziŵalini kwamukuya. Nga njila yake tingayiziŵe tyani?”
6Yesu emuyasuka kuti, “Newo nine njila, nine vyendi, nipo soti nine moyo. Paliye munthu angafwike kwa Atata keno opitilalini mwa newo. 7Keno mwiniziŵa newo, Atata soti mwiŵaziŵa. Koma kutatikila lomba muŵaziŵa nipo muŵawona.”
8Filipo elaŵila kuti, “Asikulu, tilangizyeni ŵamene awo Atata, nipo cukwanila kwa sewo.”
9Yesu emuyasuka kuti, “Wewo Filipo, naŵa namwe nsita yonse iyi, nipo ukaliyoniziŵa mphela? Wawona newo, wawona soti Atata. Ngani cikomo canji ukuti, ‘Tilangizyeni Atata?’ 10Kansi ucetekelalini kuti newo nunkhala mwa Atata, nipo Atata onkhala mwa newo? Polaŵila kwa asambili, malizu ŵanukuwuzyani ofumilalini mwa newo neka yayi, koma Atata onkhala mwa newo, niye anyanchito yawo. 11Municetekele kuti newo nunkhala mwa Atata, nipo Atata onkhala mwa newo. Keno municetekelalini, koma mucetekele mphela cikomo ca nchito zangu izi.
12“Nulaŵilisha cendi kuti ocetekela mwa newo, na nchito zanucita newo, naye soti azeazicite. Nipo azecite zopula apa, cikomo nukuya kwa Atata. 13Ciliconse catimuzemusenge mu zina yangu nizenicite, kuti Atata azeacinzikiwe mwa Mwana. 14Keno muzemunisenge kanthu mu zina yangu, nizenicite cendi.”
Yesu olayizya Mzimu Mtuŵa
15Keno munitemwa, muwokonkha Matetulo ŵangu. 16Pamene apo nizenisenge Atata, nipo azeakupeni Nkhoswe iyakine kuti izokuŵa namwe nsita zonse. 17Nkhoswe iyo ni Mzimu woziŵisha vyendi. Ŵanthu oyingotemwa va pano pansi angatweshelini kumupokela yayi, cikomo omuwonalini keno kumuziŵa. Koma mwewo mumuziŵa, cikomo onkhala na mwewo nipo azeankhale mwa mwewo.
18Nikusiyenilini mweka kuti muŵe ŵana ŵa nchete, koma nizeniwele soti kwanu. 19Kwayingosala kansita katontho, nipo ŵanthu otemwa va pano pansi azeniwonelini. Koma mwewo muzemuniwone soti – pakuti newo nili na moyo, namwe soti muzaŵe na moyo. 20Nsiku yamene iyo muzeziŵe kuti newo nunkhala mwa Atata, nipo mwewo mukuŵa mwa newo, ngani newo nunkhala mwa mwewo.
21“Munthu opokela Matetulo ŵangu noŵakonkha, niye onitemwa. Nipo otemwa newo, Atata azeamutemwe. Nane soti nizenimutemwe munthu wala, nipo nizeniziwoneshe kwa yeve.”
22Yudasi, osati Isikaliyoti yayi, emukonsha kuti, “Asikulu, muzeziwoneshe tyani kwa sewo, koma osati kwa ŵanthu wonse?”
23Yesu elaŵila kuti, “Keno munthu onitemwa, azeasunge vanalaŵila newo. Atata ŵangu azeamutemwe, nipo sewo tizetiwele kuzonkhazikika mwa yeve. 24Munthu onitemwalini, asungelini vanalaŵila newo. Malizu ŵamukumvwa aŵa ni ŵangulini yayi, koma ni ŵa Atata ŵamene enituma.
25“Ivi nakuwuzyani nikali namwe. 26Koma Nkhoswe yala, Mzimu Mtuŵa watiazemutume Atata mu zina yangu, niye watazeakusambisheni vonse, nipo azeamukumbusheni vonse venikuwuzyani.
27“Nukusiyilani mtendele. Nukupani mtendele wangu. Nukupanilini mtendele wala ngani mwamene calo ca pansi cupela yayi. Mtima wanu usavutike keno kuŵa na nkhawa. 28Mwanimvwa nukuwuzyani kuti, ‘Nukuya, koma nikawele soti kwa mwewo.’ Kuti mwinitemwa cendi, sembe mwisangalala cikomo nukuya kwa Atata, cikomo Atata ni akulu kupula newo. 29Nakuwuzyilantoni lomba ivi vikaliyocitika, kuti vikazocitika, muzecetekele. 30Nilaŵilelini namwe vinyinji lomba yayi, pakuti Satana, mfumu ya ŵanthu wocimwa ŵa calo ca pansi, akuza. Yeve uyo aliye mphamvu pali newo. 31Koma ŵanthu wonse owamila kuziŵa kuti nutemwa Atata, ni cikomo cake nucita vakunilamulila.”
Pecisilizya kulaŵila, Yesu eciti, “Tiyeni, takuya.”
Currently Selected:
Yh 14: GMN
Highlight
Share
Copy
Want to have your highlights saved across all your devices? Sign up or sign in
Nsenga New Testament © The Bible Society of Zambia, 2015.