Macitilo 14

Banabasi na Paulo ku Ikoniyo

1Vicitika ku Antiyokeya, vicitika soti ku Ikoniyo. Paulo na Banabasi eloŵa mu kacisi wa Ayuda. Esambizya motangʼa, motetyo, ŵanthu anyinji ngako, Ayuda na ŵanthu ŵa mitundu iyakine ecetekela. 2Koma Ayuda aliyocetekele, ewusha mitima ya ŵa kunja ŵala kuti atinkhane na Akristu. 3Paulo na Banabasi eciŵa uko pa kansita cendi, oŵilizya motangʼa mtima vowama mtima kwa Asikulu. Nipo Asikulu enzocitila umboni malizu ŵawo poŵapa mphamvu zocitila viziŵikilo na vokanganisha. 4Koma ŵanthu ŵa mu mzinda mwala eyaŵanikana, ayakine enze ku mbali ya Ayuda, ayakine enze ku mbali ya nthumi.

5Pamene apo ŵanthu ŵa kunja na Ayuda, pamo na akulu ŵawo, esimikizya voŵanzunza noŵatema myala. 6Atumiki ŵala pecimvwa ivi, ewutukila ku Listala na ku Delibe, mizinda ya ku Likawoniya, nipo soti ku calo cozunguluka mizinda yala. 7Kwamene uko soti etatika kuŵilizya Malizu Aweme.

Banabasi na Paulo ku Listala

8Ku Listala kwenze munthu wopunduka mendo inzoyingonkhala pansi. Evyalika wolemala nipo cinkhalile cake enzoyendalini. 9Yeve uyo enzomvwilila penzolaŵila Paulo. Paulo emulolesha, nipo peciwona kuti munthu wala enze na cicetekelo cakuti angapole, 10elaŵila moŵilikizya kuti, “Yondolola mendo wako, panama.” Pamene apo munthu wala epanama notatika kuyenda.

11Ŵanthu wonse ŵala peciwona vecicita Paulo, eŵilikizya mu cilaŵilo ca Cilikawoniya kuti, “Yatiselukila milungu yowoneka ngani ŵanthu.” 12Motetyo, Banabasi emuyita Zewusi nipo Paulo emuyita Helemesi, cikomo niye enzotangulila polaŵila. 13Ngʼanda yolombelamo Zewusi wala yenze kunja pafupi na mzinda wala. Lomba wansembe wake ewela ku milyango pecitola ngʼombe yomangiwa maluŵa mu mkosi. Yeve pamo na ŵanthu wonse ŵala epangwa kuyotwala nsembe.

14Koma nthumi zala, Banabasi na Paulo pezicimvwa ivi, zengʼamba vovwala vawo, nowutukila pakati pa ŵanthu ŵala. Elaŵila moŵilikizya malizu kuti, 15“Mwewo mwe ŵanthu, ni cikomo canji mucita ivi? Nase soti nise ŵanthu ngani mwamulili mwewo. Tumuŵilizyilani Malizu Aweme olaŵila kuti muleke vinthu va tyala–tyala nokonkha Mulungu wa moyo elenga kululu, calo ca pansi, cimmana, na vonse vilimo. 16Kale yeve elekelela ŵanthu ŵa mitundu yonse kukonkha njila zawo–zawo. 17Koma aliyoleke kuvicitila umboni mu vinthu viweme venzocita. Kufumila Kululu omupani mvula na nsita yavotwala. Okupani vakulya na viyakine vinyinji vozuzya mitima yanu na cimwemwe.” 18Cukanga na malizu aŵa, evutika kuŵalesha ŵanthu ŵala kuti asaŵatwalile nsembe.

19Koma kwiwela Ayuda ayakine ofumila ku Antiyokeya na ku Ikoniyo nonyengelela ŵala ŵanthu. Lomba ŵanthu ŵala etema Paulo myala, nomuguguzila kunja kwa mzinda, cikomo eyesa kuti wafwa. 20Koma asambili ayakine peciwungana nomuzungulila, yeve ewuka noloŵa soti mu mzinda mwala. Mmawa mwake yeve na Banabasi eluta ku Delibe.

Paulo na Banabasi owelela ku Antiyokeya mu citwa ca Siliya

21Paulo na Banabasi peciŵilizya Malizu Aweme kwala ku Delibe, nonyengelela wocetekela anyinji, ewelela ku Listala, ku Ikoniyo na ku Antiyokeya mu citwa ca Pisidiya. 22Eŵakosesha mtima asambili ŵala, kuti asataye cicetekelo cawo. Eŵawuzya kuti, “Kuti tiloŵe mu Ufumu wa Mulungu, tuwamila kukoselela manzunzo anyinji.” 23Pa mpingo uliwonse eyikapo akulu ŵa mpingo. Nipo polombela nolilesha kulya eŵatwala kwa Asikulu ŵecicetekela lomba.

24Pa vuli pake epitila ku Pisidiya nofwika ku Pamfiliya. 25Nipo peciŵilizya Malizu ŵa Mulungu ku Pega, eluta ku Ataliya. 26Pecifuna ku Ataliya eloŵa mu wato nozyokela ku Antiyokeya, kwecitwaliwa ku cisomo ca Mulungu pa nchito yecisilizya.

27Pecifwika kwala, ewunganisha mpingo wonse, nowukonkhololela vonse vecicita Mulungu mwa ŵeve, nipo soti yeve mwecivulila ŵanthu ŵa mitundu iyakine njila kuti acetekele. 28Lomba eciŵa kwala na asambili wala nsita itali.

Currently Selected:

Macitilo 14: GMN

Highlight

Copy