Macitilo 12

Helode opaya Yakobe notwala Petulo mu jele

1Pafupi na nsita iyo, mfumu Helode ekata ayakine ŵa mu mpingo kuti aŵanzunze. 2Elamula kuti Yakobe, mkwawo wa Yohane, apayiwe na cingwandali. 3Nipo peciwona kuti ivi vitemwesha Ayuda, epitilizya kukata soti Petulo. Ivi vicitika pa masiku ŵa Pasaka, cisangalalo ca mikate iliye cofufumishila. 4Pecimukata, emuvalila mu jele, nomutwala kwa maumba anayi ŵa asilikali kuti awomulonda, umba iliyonse asilikali anayi. Tetyo, Helode enzopangwa kumupa mlandu pa menso pa ŵanthu wonse, cisangalalo ca Pasaka cikasila.

5Motetyo, Petulo enzomusunga mu jele, koma mpingo wenzomulombela kwa Mulungu kosalekezya.

Mngelo ofumya Petulo mu jele

6Usiku wakuti mmawa mwake Helode amupe mlandu wake, Petulo elala pakati pa asilikali aŵili. Enze womangiwa na maunyolo aŵili, nipo pa mulyango pa jele penze olonda ayakine. 7Movundumukizya kwifwika mngelo wa Asikulu, nipo kwetuŵa kwenze mbee nosanika mu cipinda mwala. Mngelo wala egunduza Petulo mu maŵambo mwake kuti amuwushe, nipo elaŵila kuti, “Uka mmangu!” Pamene apo maunyolo ŵala ekolopoka mu manja mwake.

8Nipo mngelo wala emuwuzya kuti, “Vwala mkhanjo wako na nkhwaŵilo zako.” Petulo pecicita ivi mngelo ŵala emuwuzya soti kuti, “Vwala mwinjilo wako, unikonkhe.” 9Pamene apo Petulo efuma nomukonkha, osaziŵa kuti mngelo venzocita venze va vyendi. Enzolingilila kuti owona vinthu mu maloto tyala.

10Petulo na mngelo wala epitilila umba yotatika ya asilikali ŵala, na ya ciŵili, mpaka kufwika pa ciseko ca nsimbi ca pa mulyango woloŵela mu mzinda. Ciseko cala ciyingovulika ceka, ŵeve nofuma. Eyenda cendi mu mseu uyakine wa mu mzinda mwala. Pecifwika polekezyela, mngelo ŵala efumapo.

11Pamene apo, Petulo ezizimuka nolaŵila kuti, “Lomba nusimikizyila cendi kuti Asikulu etuma mngelo wawo nipo wanipulumusha kwa Helode, na ku viyipa vonse venzolindila Ayuda kuti vizevinicitikile.”

12Peciziŵa ivi, eluta ku ngʼanda kwa Maliya, anyina ŵa Yohane woyitiwa Maliko. Ŵanthu anyinji enze ewungana uko olomba. 13Petulo pecikonkhosha pa ciseko ca pa mulyango, msimbi, zina yake Loda, ewela kuti amuvulile. 14Peciziŵa lizu kuti ni ya Petulo, esangalala ngako, kwakuti aliyovuleko ku ciseko, koma ewutukila soti mkati kuyowuzya ŵala ayakine kuti, “Petulo ali pa mulyango apa!”

15Ŵanthu ŵala elaŵila kuti, “Wasiluka wewo!” Koma yeve etangʼilila kuti ni vyendi. Nipo ŵeve elaŵila kuti, “Ni mngelo wake uyu.”

16Koma Petulo epitilizya kukonkhosha. Pecimuvulila nowona kuti ni vyendi ni wamene, ekanganishiwa. 17Petulo eyimya kwanja kuti ŵeve aŵe celele, noŵawuzya mwecimufumyila mu jele mwala Asikulu. Nipo elaŵila kuti, “Mumuwuzye Yakobe na enekwawo ayakine ŵala va ivi.” Pamene apo yeve efuma nakuya kuyakine.

18Pekwecica, asilikali ŵala esokonezeka ngako, elaŵila kuti, “Petulo waluta kuni?” 19Helode emusakila, koma aliyomufwane. Eŵapa mlandu amalonda ŵala, nolamula kuti apayiwe. Pa vuli pake Helode efuma ku Yudeya nakuya ku Kayisaliya, nokuŵa kwamene uko.

Imfwa ya Helode

20Helode ekwiyila ŵanthu ŵa ku Tilo na ŵa ku Sidoni. Tetyo, ŵanthu ŵala ewela pamo kwa yeve. Etatika kunyengelela Blasto, kapitawo wa ku ngʼanda ya mfumu, nakuyosenga mtendele, cikomo cakulya ca calo cawo cenzofuma mu calo ca mfumu yala.

21Epangana nsiku, nipo pa nsiku yala, Helode evwala vovwala vake vacifuma nonkhala pa mpando wake wa cifumu, notatika kulaŵila na ŵanthu ŵala. 22Ŵanthu ŵala elaŵila moŵilikizya kuti, “Iyi ni lizu ya Mulungu, osati ya munthu yayi.” 23Pamene apo mngelo wa Asikulu, emunyata Helode wala cikomo aliyotwale mcinzi kwa Mulungu. Vikusi vimulya nipo ecifwa.

24Koma Malizu ŵa Mulungu epitilila kuŵilizyiwa.

25Tetyo, Banabasi na Saulo pecisilizya veciŵatumila ku Yelusalemu, ewelako. Etolako Yohane woyitiwa Maliko.

Currently Selected:

Macitilo 12: GMN

Highlight

Compare

Copy