KO SEFANAIA 3
3
Ko e Faiangahala mo e Fakamo‘ui ‘o Selusalema
1‘OIAUĒ ‘a e kolo pau‘u,
‘A e kolo kuo ‘uli‘i,
‘A e kolo fai fakaehaua! 2Kuo ‘ikai te ne fakaongo ki he le‘o;
Kuo ‘ikai te ne tali ‘a e fakatonutonu;
Kuo ‘ikai te ne tui kia Sihova;
Kuo ‘ikai te ne ‘unu‘unu ki hono ‘Otua.
3Ko hono hou‘eiki ko e fanga laione ‘oku kālou ‘i loto kolo;
Ko ‘ene kau fakamaau ko e fanga ulofi ‘o e efiafi;
‘Oku ‘ikai te nau tuku ha me‘a ke toki ngungu pongipongi.
4Ko ‘ene kau palōfita ‘oku māfanangofua,
Ko e tu‘unga me‘a ‘oku koto kākā;
Ko ‘ene kau taula‘eiki ‘oku nau va‘inga‘aki ‘a e me‘a ‘oku tapu,
‘Oku nau fakamālohia ‘a e lao.
5Ko Sihova Fai Totonu ‘oku ‘i loto kolo;
Tala‘ehai te ne fai ha kovi:
‘I he pongipongi kotoa pē ‘oku ne tuku ‘ene fakalao ke fu‘u e‘a:
Tala‘ehai ‘oku ne ta‘efai hono ngafa;
Ka ko e tangata kovi ‘oku ‘ikai te ne ‘ilo ‘a e mā.
6Na‘a ku tu‘usi ‘ani pule‘anga, kuo holo honau ngaahi taua; kuo u ‘ai ke lala honau ngaahi hala, ke ‘oua na‘a laka ange ai ha taha: kuo lailai ‘enau ngaahi kolo, ‘o ‘ikai ha tangata ai, ‘o ‘ikai ha nofo. 7Na‘a ku pehē, Kuo pau te ke manavahē kiate au ‘e koe, te ke tali ‘e koe ‘a e fakatonutonu; pea ‘e ‘ikai ai tu‘usi hono nofo‘anga,#3.7 pea… nofo‘anga, Ko hono faka-Hepeluú ia, ka ‘oku pehē ‘i hono ngaahi hiki fuoloa ‘e ni‘ihi: ke ‘oua ‘e ngalo ‘iate kinautolu. ‘a e me‘a kehekehe na‘a ku tu‘utu‘uni ma‘ana, ka na‘a nau tūkuingata ‘enau fakaka‘anga ‘enau ngaahi fai anga kehekehe.
8Ko ia, mou tatali kiate au–ko Sihova ia mei he Ta‘ehāmai–tatali ki he ‘aho ‘o ‘eku tu‘u hake ke fai ha vete: he ko hoku totonu ke fakatefua ‘ani kakai, ke tānaki ‘ani pule‘anga, ke lilingi kiate kinautolu ‘eku houhau, ‘a e kakaha kotoa ‘o ‘eku ‘ita; he keina ‘a māmani kātoa ‘e he afi ‘o ‘eku fua‘a.
9He te u toki liliu ‘a e ngaahi kakai ke nau loungutu ma‘a, ke nau tāpafua kotoa pē ‘a e huafa ‘o Sihova, ke uouongataha ‘enau ngāue kiate ia. 10Mei he potu ki kō ‘o e ngaahi vaitafe ‘o Kusa#3.10 Kusa; Vakai ki he “Ngaahi Huluhulu”. te nau ‘omi ‘eku kau lotu, si‘i hako ‘o ‘eku movete, ko e feilaulau kiate au. 11‘I he ‘aho ko ia ‘e ‘ikai fakamaa‘i koe ‘e ho‘o ngaahi fai anga kehekehe, ‘a ia kuo ke hia ai kiate au: he te u toki ‘ave mei ho lotolotonga ‘a e fa‘ahinga ‘oku pātapata ‘i ho laukau, pea ‘e ‘ikai te ke toe fai fakamofutofuta ‘i hoku mo‘unga tapu.#3.11 mo‘unga tapu; Ko e Mo‘unga ko Saioné (vakai ki he “Saioné” ‘i he Ngaahi ‘Uhinga‘i Leá. 12Pea te u fakatoe ‘i ho lotolotonga si‘a kakai vaivai mo tu‘utāmaki, ‘a ia te nau tui ki he huafa ‘o Sihova. 13Ko e toetoe ‘o ‘Isileli ‘e ‘ikai te nau faikovi, pea ‘e ‘ikai te nau lea loi; pea ‘ikai ‘ilo ‘i honau ngutu ha ‘elelo kākā; ka ko e fa‘ahinga ko ia te nau kaikai mo tokoto, pea ‘e ‘ikai ha taha ‘e mafakahoha‘asi kinautolu.#Fkhā 14.5
Ko ha Hiva Fiefia
14Mavava, si‘i ta‘ahine ko Saione;
Mou hiki tuē, si‘i ‘Isileli;
Fiefia mo pātapata ‘aki ‘a e kotoa ‘o ho loto,
Si‘i ta‘ahine ko Selusalema.
15Kuo ‘ave ‘e Sihova ho ngaahi tautea,
Kuo ne tafi ki tu‘a ho fili:
Ko e Tu‘i ‘Isileli, ‘a Sihova, ko ho tokaikolo ia:
‘E ‘ikai te ke toe sio#3.15 pe manavahē. ki ha kovi.
16‘I he ‘aho ko ia ‘e tala ki Selusalema,
‘Oua te ke manavahē: Si‘i Saione,
‘Oua ‘e tāupe ho nima.
17‘Oku lotolotoi ‘iate koe ‘a Sihova ko ho ‘Otua,
Ko e Helo ia ‘oku fai fakamo‘ui;
Te ne patapatakā ‘iate koe he‘ene fiefia,
Kuo a‘u ‘ene ‘ofa ki he nonga;#3.17 pe ‘oku ne ‘ofa fakalongolongo; pe pea te ne ‘oatu ha mo‘ui fo‘ou ‘i he‘ene ‘ofá.
‘Oku ne tome‘e ‘iate koe mo mavava.
18Te u fakatefua mai ‘a kinautolu ‘oku nofo mamahi ko ‘enau mama‘o mei he kātoanga tu‘utu‘uni, ko e fa‘ahinga tupu meiate koe; ‘a kinautolu ko ‘enau kavenga ko e manukia.#3.18 ‘Oku ‘ikai ke mahino ‘a hono faka-Hepelū ‘o e vēsí ni. 19Ko au eni te u fai ‘i he taimi ko ia mo e kakai ‘oku fakamālohia koe, pea te u fakahaofi si‘i ketu, pea te u tānaki si‘i me‘a na‘e sese‘e; pea te u ngaohi kinautolu ko e fakamālō‘ia, mo e ongoongoa ‘i he ngaahi fonua kehekehe, he na‘e fakamaa‘i ai kinautolu. 20‘I he taimi ko ia te u ‘omi kimoutolu, ‘io, ‘i he taimi ‘o ‘eku tānaki kimoutolu; he te u ngaohi kimoutolu ko e kakai ‘oku ongoongoa mo fakamālō‘ia ‘i he ngaahi kakai ‘o māmani, ‘oka u ka fakafoki homou pōpula, ‘o mou sio ki ai–ko e folofola ia ‘a Sihova.
Currently Selected:
KO SEFANAIA 3: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
