KO SĀKALAIA 4
4
Ko ha Vīsone ki ha Tu‘unga Maama
1PEA ko e ‘āngelo na‘e lea ‘iate au na‘a ne foki, ‘o fafangu au, ‘o hangē ha tangata ‘oku fafangu mei he‘ene mohe. 2Pea ne folofola kiate au, Ko e hā ‘oku ke sio ni ki ai? Pea u pehē, Kuo u fakasio, pea tā ko e tu‘unga maama ena ‘oku koula hono kotoa, pea ko hono tauhi‘anga lolo ‘oku mei ‘olunga, pea kuo fakaheka hono fitu‘i fo‘i maama; ‘oku taki fitu ‘a e paipa ki he ngaahi fo‘i maama, ‘a ia ‘oku mei ‘olunga.
3Pea tu‘u ofi ai ha ongo fu‘u ‘ōlive, ko e taha mei he to‘omata‘u ‘o e tauhi‘anga lolo, mo e taha mei hono to‘ohema. 4Pea u hanga ‘o fakatau folofola ki he ‘āngelo na‘e lea ‘iate au, ‘o pehē, ‘Ēī, ko e hā ena?
5Pea tali ‘a e ‘āngelo na‘e lea ‘iate au, ‘o ne folofola mai, ‘Oku ‘ikai te ke ‘ilo koā pe ko e hā ‘a e ‘ū me‘a na? Pea u tali, ‘Ēī, ‘oku ‘ikai.#4.5 ‘Oku fakahū mai heni ‘a e veesi 10e-14 ‘i he ngaahi hiki ‘e ni‘ihi ‘i onopooni, he ko e hokohoko totonu nai ia ‘a e talanoá.
6Pea tali ‘e ia, ‘o ne folofola mai, ‘o ne pehē, Ko e folofola ena ‘a Sihova kia Seluipepeli, ke fakahā, ‘Oku ‘ikai tu‘u ‘i he ivi, pea ‘oku ‘ikai tu‘u ‘i he ngū, ka ko hoku Laumālie pē–ko e folofola ia ‘a Sihova Sāpaoti.#‘Ēsela 5.2 7Ko hai koe ‘a e fu‘u mo‘unga na ‘i he ‘ao ‘o Seluipepeli? Te ke lafalafa; pea te ne fakahū mai ki tu‘a ‘a e maka tau‘olunga mo e kailavaki hono talamonū, Monitonu! Monitonu! 8Pea hoko ‘a e folofola ‘a Sihova kiate au, ‘o pehē. Ko e ongo nima ‘o Seluipepeli na‘e tanupou ‘a e fale ni; 9pea ko hono ongo nima te na faka‘osi: pea te ke ‘ilo ko Sihova Sāpaoti ia ne fekau au kiate kimoutolu.
10Ko hai ia ‘oku ne ta‘etoka‘i ‘a e ‘aho ‘o e me‘a si‘i? Tala atu, ‘e fiefia ‘a e Fitu ko ē, he‘enau sio ki he fuavai ‘i he nima ‘o Seluipepeli; ko e ngaahi fo‘i fofonga ‘o Sihova ia ‘oku felēleaki ‘i māmani kātoa.#Fkhā 5.6
11Pea u hanga ‘o fakatau folofola kiate ia, Ko e hā ‘a e ongo fu‘u ‘ōlive na ‘oku hopo hake ‘i he to‘omata‘u mo e to‘ohema ‘o e tu‘unga maama?#Fkhā 11.4 12Pea u toe fakatau folofola hono tu‘o ua ki ai, Ko e hā ‘a e ongo lito‘i ‘ōlive ‘oku lave ki he ongo fakatafe koula, ‘a ia ‘oku hala hifo ai meiate kinaua ‘a e lolo koula?
13Pea ne tala mai, ‘o pehē, ‘Oku ‘ikai koā te ke ‘ilo pe ko e hā ena?
Pea u pehē, ‘Ēī, ‘oku ‘ikai.
14Pea ne folofola mai, Ko kinaua ko e ongo founga lolo, ‘oku fakafe‘ao ki he ‘Eiki ‘o māmani kātoa.
Currently Selected:
KO SĀKALAIA 4: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
