KO SĀKALAIA 11
11
Ko Hono Fakahifo ‘o e Tu‘i Fakaaoaó
1‘E LEPANONI, fakaava ho ngaahi matapā,
Kae keina ‘e he afi ho ngaahi sita!
2Tangi ‘oiauē, si‘i paini, he kuo tō ‘a e sita,#11.2 si‘i paini… sita; ‘Oku faka‘ilonga‘i ‘aki ‘a e fu‘u ‘akaú ‘a e ngaahi pule‘anga kaukaua, pe ko honau ngaahi tu‘í.
Hono kuo ‘auha ‘a e ngaahi ‘akau hako!
Tangi ‘oiauē ‘a e ngaahi ‘oke ‘o Pēsani,
He kuo ‘ohifo ‘a e vao na‘e ‘aa‘i.
3‘Oku ongoonga‘a mai ‘a e ‘oiauē ‘a e kau tauhi manu,
He kuo ‘auha honau viki‘anga.
‘Oku ongoonga‘a mai ‘a e kālou ‘a e fanga manu hau,
He kuo ‘auha ‘a e lāngilangi ‘o Soatani.
Ko ha Ongo Tauhi Sipi
4Ko e folofola eni ‘a Sihova ko hoku ‘Otua: Tauhi ‘a e tākanga#11.4 tākanga; Ko e tākanga sipí ko e fakatātā ia ‘o e kakai ‘a ha tu‘i. Ko e tu‘í ‘a e tauhi sipí. ‘oku toutou tāmate‘i: 5‘a ia ‘oku tāmate‘i kinautolu ‘e he fa‘ahinga na‘e fakatau, ka nau ta‘ehalaia tokua; pea ko ha‘a fakatau atu kinautolu ‘oku nau pehē, Mālō mo Sihova ‘eku ma‘u koloa; pea ko honau kau tauhi ‘onautolu ‘oku ‘ikai te nau faka‘atu‘i kinautolu.
6Tala atu, ‘e ‘ikai te u toe faka‘atu‘i ‘a e nofo ‘i he fonua–ko Sihova ia mei he Ta‘ehāmai–pea ko au eni ‘oku ou tuku atu ‘a e kakai takitaha ki he nima ‘o hono kaungā‘api, pea ki he nima ‘o hono tu‘i, pea ‘e fetā‘aki#11.6 pe te nau taa‘i ‘a e fonua. ‘a māmani, pea ‘e ‘ikai te u hamusi mei honau nima.
7Ko ia, na‘a ku tauhi ‘a e tākanga na‘e toutou tāmate‘i: ‘aua, ‘a e vaivai ‘o e tākanga. Pea u to‘o mai ha ongo tokotoko; na‘a ku ui ‘a e taha ko Hōifua,#11.7 pe faka‘ofo‘ofa. pea u ui ‘a e taha ko ‘Ū-ha‘i; pea u fafanga ‘a e tākanga. 8Pea u faka‘auha ha kau tauhi ‘e toko tolu ‘i ha māhina ‘e taha; ka na‘e kina ‘eku mo‘ui ‘iate kinautolu; ‘io, na‘a mo honau loto na‘e fakalili‘a kiate au. 9Pea u pehē. ‘E ‘ikai te u nofo ko e tauhi kiate kimoutolu: ke mate pē ‘a e ha‘a mate, pea ke ‘auha pē ‘a e ha‘a ‘auha; pea ko e me‘a ki hono toe, ke keina ‘e ē ‘a e kakano ‘o ē. 10Pea u to‘o hoku tokotoko, ‘a Hōifua, ‘o u tu‘usi ia, ke maumau‘i ‘eku kovinānite na‘a ku fai mo e ngaahi kakai kotoa. 11Ko ia na‘e maumau ia ‘i he ‘aho ko ia: pea na‘e ‘ilo ai ‘e he kau vaivai ‘o e tākanga, ‘a ia na‘e tokanga kiate au, tā ko e folofola ‘a Sihova ia. 12Pea u pehē kiate kinautolu, Kapau ‘oku hā lelei kiate kimoutolu, tuku mai ‘eku totongi: pea ka ‘ikai, tuku ai pē. Ko ia, na‘a nau fua hā tolungofulu‘i pa‘anga siliva ma‘aku totongi.#Māt 26.15 #Māt 27.9-10
13Pea folofola ‘a Sihova kiate au, Lī ia ki he tufunga ipu ‘umea,#11.13 Lī… ‘umeá: Ko hono faka-Hepeluú ia, ka ‘oku pehē ‘i hono ngaahi hiki fuoloa ‘e ni‘ihi: ‘Ave ki he loki tuku‘anga koloa ‘o e Temipalé. ‘a e koloa hulu ni ‘a ia kuo nau lau ko hoku fe‘unga. Ko ia, na‘a ku to‘o ‘a e tolungofulu‘i siliva, pea u lī ia ki he tufunga ipu ‘umea ‘i he fale ‘o Sihova. 14Pea u toki tu‘usi ‘a hono ua ‘o hoku tokotoko, ‘a ‘Ū-ha‘i, ke maumau‘i ‘a e tautehina ‘o Siuta mo ‘Isileli.
15Pea folofola ‘a Sihova kiate au, Toe fai, to‘o mai ‘a e nāunau ‘o ha tauhi manu ‘oku vale. 16He vakai, ko au eni ‘oku ou fokotu‘u ha tauhi ‘i he fonua, ‘a ia ‘e ‘ikai te ne ‘a‘ahi kiate kinautolu ‘oku fai hono faka‘auha, pea ‘e ‘ikai te ne kumi ki he manu kuo hē, pea ‘e ‘ikai te ne faito‘o ki he lavea; pea ‘e ‘ikai te ne fafanga ‘a ia ‘oku tu‘u, kaekehe ‘oku ne keina ‘a e kakano ‘o e manu nge‘enge‘e, pea na‘a mo e keukeu ‘oku ne ngungu. 17‘Oiauē ‘a e ‘ata‘i tauhi ‘oku li‘aki ‘a e tākanga! ‘e hoko ‘a e heletā ki hono nima, mo hono mata to‘omata‘u: ‘e mātu‘aki mingi hono nima, pea ‘e mātu‘aki ka‘anga hono mata to‘omata‘u.
Currently Selected:
KO SĀKALAIA 11: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
