KO LUTE 1
1
1PEA ko eni, ‘i he taimi na‘e pule ai ‘a e Kau Fakamaau na‘e honge ‘a e fonua. Pea na‘e ‘alu ha tangata mei Pētelihema-Siuta ke ‘āunofo ‘i he tuku‘uta ‘o Moape, ‘a ia mo hono uaifi mo hono ongo foha. 2Pea ko e hingoa ‘o e tangata ko ‘Elimeleki, pea ko hono uaifi ka Neomai, pea ko hono ongo foha ko Māloni mo Kilioni, ko e tu‘unga ‘Efalata kinautolu mei Pētelihema-Siuta. Pea na‘a nau a‘u ki he tuku‘uta ‘o Moape, ‘o nofo ai. 3Pea pekia ‘a ‘Elimeleki ko e husepāniti ‘o Neomai; pea na‘e tuku ‘a e finemotu‘a mo ‘ene ongo tama. 4Pea na mali mo ha ongo fafine Moape; ko e hingoa ‘o e taha ko ‘Opa, pea ko e taha ko Lute: pea nau nofo ai ‘o hongofulu ta‘u nai. 5Pea pekia ‘a Māloni mo Kilioni fakatou‘osi; pea tuku ‘a e finemotu‘a ta‘eha‘ane ongo tama mo hano husepāniti.
6Pea nau tutu‘u, ‘e ia mo e ongo uaifi ‘o ‘ene ongo tama, ke ne foki mei he tuku‘uta ‘o Moape: he kuo ne fanongo ‘i he tuku‘uta ‘o Moape kuo ‘a‘ahi ‘a e ‘Eiki ki hono kakai, he‘ene tuku ke nau ma‘u me‘akai. 7Pea ne ‘alu atu mei he potu kuo ne nofo ai, pea ō mo ia ‘ene ongo fafine; pea nau fou ‘i he hala ke foki ki he fonua ‘o Siuta. 8Pea lea ‘a Neomai ki he‘ene ongo fafine, Ō, ‘o foki takitaha ki he fale ‘o ‘ene fa‘ē; tauange mo Sihova ke ne fai ‘ofa kiate kimoua, ‘o hangē ka ho‘omo fai ki he pekia, 9Ke tuku mai ‘e Sihova ke mo ma‘u ha mālōlō‘anga takitaha ‘i he fale ‘o hano husepāniti. Pea ne toki ‘uma kiate kinaua; pea nau ofa‘aki ‘enau fākafoa.
10Pea na pehē kiate ia, ‘Ikai, ka te tau foki mo koe ki ho kakai.
11Ka ka pehē ‘e Neomai, Foki atu pē, nga‘ata; ko ‘etau omi mo au koe‘uma‘ā? ‘Oku toe koā ha ngaahi tama ‘i hoku manava ke mali mo kimoua? 12Foki ā, nga‘ata, ‘o ō; he kuo u motu‘a fau ke toe ma‘u husepāniti. Ka ne u pehē ‘oku ai ha‘aku ‘amanaki ki ai, ‘io, ka ne u ma‘u ha tangata he pō ni, ‘o u fā‘ele‘i ha ongo tama; te mo tatali koā ki he‘ena tangata? 13te mo nofo alafianga ai koā, ‘o ta‘ema‘u husepāniti? ‘Oua, nga‘ata; he ‘oku ou mamahi telia kimoua,#1.13 mamahi… kimoua; pe mamahi koe‘uhi ko e me‘a kuo hoko kiate kimouá pe faka‘ofa‘ia ‘iate kimoua. he kuo tō kiate au ‘a e tā ‘a Sihova.
14Pea nau toe ofa‘aki ‘enau fākafoa: pea ‘uma ‘a ‘Opa ki he‘ene fa‘ē;#1.14 ‘uma… fa‘eé ‘Oku pehē he hiki fuoloa ‘e taha: ‘uma ‘a ‘Opa ki he‘ene fa‘ē peá ne foki ki ‘api; ka ‘oku ‘ikai ke tu‘u ‘a e peá ne foki ki ‘apí ‘i he faka-Hepeluú. ka ka pīkitai ki ai ‘a Lute. 15Pea pehē ‘e he finemotu‘a; Vakai, kuo foki ho tokoua ki hono kakai, pea ki hono ‘otua:#1.15 ‘otuá. E pe ngaahi ‘otuá. muimui koe ki ho tokoua.
16Ka ka pehē ‘e Lute, ‘Oua te ka o‘i au ke li‘aki koe, pea ke tuku ‘eku muimui ‘iate koe: he ko e potu ‘oku ke ‘alu ki ai, te u ‘alu ki ai au; pea ko e potu ‘oku ke mohe ai, te u mohe ai: ko ho kakai ko hoku kakai, pea ko ho ‘Otua ko hoku ‘Otua: 17ko e potu te ke pekia ai, te u pekia ai, pea ‘e tanu ai au. ‘Ilo ‘e au, ‘o lahi hake, ‘o kapau ‘e ai ha me‘a ‘e fakamāvae kitaua, ko e mate pē.#1.17 ko e mate pē; pe ‘o a‘u ai pē ki he mate.
18Pea ‘i he vakai ‘e he finemotu‘a kuo pau hono loto ke omi mo ia, na‘a ne tuku ‘ene lea ki ai.
19Pea na fononga ai kinaua, ‘o na a‘u ki Pētelihema. Pea ‘i he‘ena hū ki Pētelihema, pea ngatētē tu‘u ‘a e kolo kotoa kiate kinaua, pea pehē ‘e he kau fefine, Ko Neomai koā eni?
20Pea ne pehē kiate kinautolu, ‘Oua ‘e ui au ko Neomai (ko Melie), ui au ko Mala (ko Kona); he kuo fai kona ‘a Sātai kiate au. 21Na‘a ku ‘alu atu kuo u fonu, pea kuo fakafoki au ‘e Sihova kuo u maha: ko e hā ‘oku mou ui ai au ko Neomai; ‘osi, kuo hopo mo au ‘a Sihova, pea kuo fakamamahi‘i au ‘e Sātai?
22Ko ia na‘e foki ‘a Neomai, pea omi mo ia ‘a Lute, ko e uaifi ‘o ‘ene tama, ko e fefine Moape, ko ‘ena foki mei he tuku‘uta ‘o Moape: pea na‘a na a‘u ki Pētelihema ‘i he kamata utu ‘a e ta‘u pa‘ale.
Currently Selected:
KO LUTE 1: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.