Filipaí Ko e Talateu
Ko e Talateu
Ko e Tohi ‘a Paula ki he Kakai Filipaí na‘e fai ia ki he fuofua siasi na‘e fokotu‘u ‘e Paula ‘i he kelekele ‘o ‘Iulopé ‘i he vahefonua Loma ko Masitōnia. Na‘e fai ‘a e tohí ni ‘oku lolotonga nofo pōpula ‘a e ‘apositoló, pea ‘i he vaha‘a na‘á ne faingata‘a‘ia ai koe‘uhi ko e fakafepaki na‘e fai ‘e ha kau ngāue faka-Kalisitiane kehe kiate ia, pea na‘e mafasia hono lotó koe‘uhí ko e akonaki hala kuo fai ‘i he siasi ‘i Filipaí. Ka neongo ia, ko e tohi eni ‘oku hā mata‘ā‘ā ai ‘a e fiefia mo e fakatu‘amelie ‘a Paula ‘a ia ko hono tupu‘angá pē ko ‘ene mātu‘aki tui falala kia Sīsū Kalaisi.
Ko e ‘uhinga na‘e ‘uluaki fakakaukau ai ‘a Paula ke fai ‘ene tohí ni ko ‘ene fie fakamālō ki he kau Kalisitiane Filipaí koe‘uhí ko e me‘a‘ofa na‘a nau fakamoimoi kiate ia ‘i he tu‘unga na‘á ne fiema‘u ai ‘a e tokoni ko iá. Na‘á ne toe ngāue‘aki ‘ene tohí ko e faingamālie ke ne poupou kiate kinautolu ke nau loto to‘a mo e loto falala, neongo hono ngaahi faingata‘a‘iá mo honau ngaahi faingata‘a‘iá. Na‘é ne kole kiate kinautolu ke nau loto fakatōkilalo ‘o hangē ko Sīsuú, ‘o ‘oua na‘a nau ‘efihia ‘i he loto siokita mo ‘afungi. Na‘á ne fakamanatu kiate kinautolu ko ‘enau mo‘ui ‘i he‘enau taha mo Kalaisí ko e me‘a‘ofa ia mei he ‘ofa tu‘unga‘a ‘a e ‘Otuá ‘a ia kuo nau a‘u ki ai ko ‘enau tuí, ‘o ‘ikai ko ‘enau tauhi ‘a e ngaahi ouau ‘o e Lao Faka-Siú. Na‘e lau ai pē ‘a Paula ‘i he‘ene tohí ni ki he fiefia mo e nonga ‘oku foaki ‘e he ‘Otuá ma‘a kinautolu kuo nau taha mo Kalaisí.
‘Oku ‘ilonga ‘i he tohí ni ‘a hono fakamamafa‘i ‘o e fiefia, mo e loto falala, mo e fāitaha, mo e vilitaki atu ‘i he tui mo e mo‘ui faka-Kalisitiané. ‘Oku hā ai pē foki mei he tohí ‘a e fu‘u ‘ofa lahi ‘a Paula ‘i he siasi ‘o Filipaí.
Ko e Kakano ‘o e Tohí
Ko e talateu (1.1-11)
Ko e ngaahi me‘a na‘á ne ‘ātakai ‘a e mo‘ui ‘a Paulá (1.12-26)
Ko e mo‘ui ‘ia Kalaisi (1.27–2.18)
Ko e ngaahi palani kia Tīmote mo ‘Epafalataito (2.19-30)
Ko e ngaahi fakatokanga fekau‘aki mo e ngaahi fili mo e ngaahi fakatu‘utāmaki (3.1–4.9)
Ko Paula mo hono ngaahi kaume‘a ‘i Filipai (4.10-20)
Ko e Faka‘osi (4.21-23)
Currently Selected:
Filipaí Ko e Talateu: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.