NŌMIPA 29
29
Ko e Feilaulau ‘i he Kātoanga Ta‘u Fo‘oú
(Lev 23.23-25)
1PEA ‘i hono fitu ‘o e māhina, ‘i he ‘uluaki ‘aho, ‘e fai ha‘amou fakataha tapu: tapu ‘aupito ha‘amou fai ‘a e ngāue ‘a homou ngaahi lakanga: ko e ‘aho ifi ia kiate kimoutolu. 2Pea te mou feia ha feilaulau-mōifua mo‘o ngangatu fakahōifua kia Sihova; ko e pulu mui ‘e taha, ko e sipi tangata ‘e taha, ko e fitu‘i lami ‘oku ta‘u taha pea ta‘emele; 3pea ko honau kinaki ko e ‘elito‘i mahoa‘a kuo natu ‘aki ‘a e lolo, ko e vahehongofulu ‘e tolu ki he pulu, ko e vahehongofulu ‘e ua ki he sipi tangata, 4ko ha vahehongofulu ‘e taha ki he lami takitaha ‘i he fitu‘i lami: 5ko e kosi tangata foki ‘e taha mo‘o feilaulau-angahala, ke fai‘aki ha fakalelei ma‘amoutolu: 6tukukehe ‘a e feilaulau-mōifua ‘o e fakamāhina-fo‘ou mo hono kinaki, mo e feilaulau-mōifua tu‘u ma‘u mo hono kinaki ‘o‘ona, mo honau kava, ‘o hangē ko honau konisitūtone, mo‘o ngangatu fakahōifua fai ‘alu ‘a e afi kia Sihova.
Ko e ngaahi Feilaulau ‘i he ‘Aho ‘o e Fakalelei
(Lev 23.26-32)
7Pea ‘i hono ‘aho hongofulu ‘o e māhina fitu ko ia ‘e fai ha‘amou fakataha tapu; pea te mou fakavaivai homou laumālie; ‘ilonga ha ngāue fakatamaio‘eiki ‘e ‘ikai te mou fai: 8ka te mou ‘atu ki he ‘Eiki ha feilaulau-mōifua mo‘o ngangatu fakahōifua; ko e pulu mui ‘e taha, ko e sipi tangata ‘e taha, ko e fitu‘i lami ‘oku taha ta‘u; te mou tokanga ke nau ta‘emele. 9Pea ko honau kinaki ko e ‘elito‘i mahoa‘a kuo natu ‘aki ‘a e lolo, ko e vahe hongofulu ‘e tolu ki he pulu, ko e vahehongofulu ‘e ua ki he taha‘i sipi tangata. 10Taki vahehongofulu ha lami ‘i he fitu‘i lami: 11ko e kosi tangata mo‘o feilaulau-angahala; tukukehe ‘a e feilaulau-angahala fakalelei, mo e feilaulau-mōifua tu‘u ma‘u, mo hono kinaki, mo honau kava.
Ko e ngaahi Feilaulau ‘i he Kātoanga Fale Lou‘akaú
(Lev 23.33-44)
12Pea ‘i hono ‘aho hongofulu mā nima ‘o hono fitu ‘o e māhina ‘e fai ha‘amou fakataha tapu: ‘ilonga ha ngāue fakatamaio‘eiki ‘e ‘ikai te mou fai, pea te mou fai ha kātoanga kia Sihova ‘o ‘aho fitu. 13Pea te mou ‘atu ha feilaulau-mōifua ko e feilaulau tutu, mo‘o ngangatu: fakahōifua kia Sihova; ko e pulu mui ‘e hongofulu mā tolu, sipi tangata ‘e ua, lami tangata ‘e hongofulu mā fā ‘oku taha ta‘u (te nau ta‘emele): 14pea ko honau kinaki ko e ‘elito‘i mahoa‘a kuo natu lolo, ko e vahehongofulu ‘e tolu ki he hongofulu mā tolu‘i pulu takitaha, ko e vahehongofulu ‘e ua ki he ongo sipi tangata takitaha, 15pea taki vahe-hongofulu ‘a e hongofulu mā faa‘i lami: 16ko e kosi tangata foki ‘e taha mo‘o feilaulau-angahala; tukukehe ‘a e feilaulau-mōifua tu‘u ma‘u, ‘a hono kinaki mo hono kava.
17Pea ‘i hono ‘aho ua ko e pulu mui ‘e hongofulu mā ua, sipi tangata ‘e ua, lami ‘e hongofulu mā fā ‘oku taha ta‘u pea ta‘emele; 18pea ko honau kinaki mo honau ngaahi kava ki he fanga pulu, ki he ongo sipi tangata, pea ki he fanga lami, ‘o fakatatau ki honau tokolahi mo e tu‘utu‘uni ki ai: 19ko e kosi tangata foki ‘e taha mo‘o feilaulau-angahala; tukukehe ‘a e feilaulau-mōifua tu‘u ma‘u, mo hono kinaki pea mo honau kava.
20Pea ‘i hono ‘aho tolu ko e pulu ‘e hongofulu mā taha, sipi tangata ‘e ua, lami ‘e hongofulu mā fā ‘oku taha ta‘u pea ta‘emele; 21pea ko honau kinaki mo honau ngaahi kava ki he fanga pulu, ki he ongo sipi tangata, pea ki he fanga lami, ‘o fakatatau ki honau tokolahi mo e tu‘utu‘uni ki ai: 22ko e taha‘i kosi feilaulau-angahala foki; tukukehe ‘a e feilaulau-mōifua tu‘u ma‘u, mo hono kinaki mo hono kava.
23Pea ‘i hono ‘aho fā ko e pulu ‘e hongofulu, sipi tangata ‘e ua, lami ‘e hongofulu mā fā ‘oku taha ta‘u pea ta‘emele; 24ko honau kinaki mo honau ngaahi kava, ki he fanga pulu, ki he ongo sipi tangata, pea ki he fanga lami, ‘o fakatatau ki honau tokolahi mo e tu‘utu‘uni ki ai: 25ko e kosi tangata foki ‘e taha mo‘o feilaulau-angahala; tukukehe ‘a e feilaulau-mōifua tu‘u ma‘u, ‘a hono kinaki mo hono kava.
26Pea ‘i hono ‘aho nima ko e pulu ‘e hiva, sipi tangata ‘e ua, lami ‘e hongofulu mā fā ‘oku ta‘u taha pea ta‘emele; 27pea ko honau kinaki mo honau ngaahi kava, ki he fanga pulu, ki he ongo sipi tangata, pea ki he fanga lami, ‘o fakatatau ki honau tokolahi mo e tu‘utu‘uni ki ai: 28ko e taha‘i kosi feilaulau-angahala foki; tukukehe ‘a e feilaulau mōifua tu‘u ma‘u, mo hono kinaki mo hono kava.
29Pea ‘i hono ‘aho ono ko e pulu ‘e valu, sipi tangata ‘e ua, lami ‘e hongofulu mā fā ‘oku taha ta‘u pea ta‘emele; 30mo honau kinaki mo honau ngaahi kava, ki he fanga pulu, ki he ongo sipi tangata, ki he fanga lami, ‘o fakatatau ki honau tokolahi mo e tu‘utu‘uni ki ai: 31mo e taha‘i kosi feilaulau-angahala foki; tukukehe ‘a e feilaulau-mōifua tu‘u ma‘u, ‘a hono kinaki mo hono kava.
32Pea ‘i hono ‘aho fitu ko e pulu ‘e fitu, sipi tangata ‘e ua, lami ‘e hongofulu mā fā ‘oku taha ta‘u pea ta‘emele; 33mo honau kinaki mo honau ngaahi kava, ki he fanga pulu, ki he ongo sipi tangata, ki he fanga lami, ‘o fakatatau ki honau tokolahi mo e tu‘utu‘uni ki ai: 34ko e taha‘i kosi feilaulau-angahala foki; tukukehe ‘a e feilaulau-mōifua tu‘u ma‘u, ‘a hono kinaki mo hono kava.
35‘I hono ‘aho valu ‘e fai ha‘amou faka‘osi: tapu ‘aupito ho‘omou fai ‘a e ngāue ‘a homou ngaahi lakanga; 36ka te mou ‘atu ha feilaulau-mōifua, ko e feilaulau tutu, mo‘o ngangatu fakahōifua kia Sihova; ko e pulu ‘e taha, sipi tangata ‘e taha, lami ‘e fitu ‘oku taha ta‘u pea ta‘emele; 37ko honau kinaki mo honau ngaahi kava, ki he fanga pulu, ki he sipi tangata, pea ki he fanga lami ‘o fakatatau ki honau tokolahi mo e tu‘utu‘uni ki ai; 38ko e taha‘i kosi feilaulau-angahala foki; tukukehe ‘a e feilaulau-mōifua tu‘u ma‘u mo hono kinaki mo hono kava.
39Ko eni ia ‘a e me‘a te mou feia kia Sihova ‘i homou ngaahi ‘aho tu‘utu‘uni–tuku kehe ho‘omou ngaahi tukumo‘ui, mo ho‘omou ngaahi me‘a-‘ofa-ma‘amou ngaahi feilaulau mōifua, pea ma‘amou ngaahi kinaki, pea ma‘amou ngaahi feilaulau-kava, pea ma‘a-mou ngaahi feilaulau-‘ofa.
40Pea fakamatala ‘e Mōsese ki ha‘a ‘Isileli ‘a e ngaahi me‘a kotoa pē kuo tu‘utu‘uni ‘e Sihova kiate ia.
Currently Selected:
NŌMIPA 29: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
