NŌMIPA 18
18
Ko e ngaahi Fatongia ‘o e Kau Taula‘eikí mo e Kau Līvaí
1PEA folofola ‘a e ‘Eiki kia ‘Ēlone, Ko koe mo ho ngaahi foha, mo e fale ‘o ho tupu‘anga fakataha, te mou fuesia ‘a e hia ‘o e Fale Tapu; pea ko koe mo ho ngaahi foha fakataha, te mou fuesia ‘a e hia ‘o homou lakanga fakataula‘eiki. 2Pea ko ho kāinga foki ko e fa‘ahinga ‘o Līvai, ‘a e matakali ‘o ho tupu‘anga, ‘omi mo koe, ke nau ofi, ke nau piki kiate koe mo tauhi koe: ka ko koe mo ho ngaahi foha foki te nau taka ofi ki he Tēniti Fakamo‘oni‘anga. 3Pea te nau fai ho tauhi, mo e tauhi ‘o e Tēniti kātoa: ko e me‘a pē, ‘e ‘ikai te nau ofi ki he nāunau ‘o e Fale Tapu, pe ki he ‘ōlita, na‘a nau pekia, ‘a kinautolu mo kimoutolu. 4Ka te nau piki kiate koe, ‘o fai ‘a e tauhi ‘o e Tēniti Fe‘iloaki‘anga, pe ko e hā ‘a e ngāue ‘o e Tēniti; pea ‘ikai ofi kiate kimoutolu ha kehe. 5Pea te mou fai ‘a e tauhi ‘o e Fale Tapu, mo e tauhi ‘o e ‘ōlita: ke ‘oua na‘a toe houhau‘ia ‘a ha‘a ‘Isileli. 6Pea ko au, vakai kuo u to‘o homou kāinga ‘a e kau Līvai mei he lotolotonga ‘o ha‘a ‘Isileli: ko e foaki ia kiate kimoutolu, he ko e me‘a foaki ia kia Sihova ke fai ‘a e ngāue ‘a e Tēniti Fe‘iloaki‘anga. 7Pea ko koe mo ho ngaahi foha foki te mou tauhi homou tu‘unga fakataula‘eiki ki he ngaahi me‘a kehekehe ‘o e ‘ōlita mo e loto tatau; pea ko homou fatongia ia; kuo u ‘atu ‘a e fakataula‘eiki ko homou fatongia tō: pea ko ha kehe te ne ofi ai te ne mate.
Ko e ‘Inasi ‘o e Kau Taula‘eikí
8Pea folofola ‘a Sihova kia ‘Ēlone ‘o pehē, pea ko au eni kuo u ‘atu kiate koe ‘a e tauhi ‘o ‘eku ngaahi feilaulau-hapai, ‘io, ‘a e ngaahi me‘a kotoa pē kuo fakatapu ‘e ha‘a ‘Isileli, kuo u foaki kiate koe mo‘o ‘inasi, pea ki ho ngaahi foha foki ko e fatongia ta‘engata. 9Ko ‘eni ‘i he ngaahi me‘a toputapu ‘e ‘a‘au, ‘o ‘ikai tutu; ko ‘enau ngaahi kōpano, ‘io, ‘ilonga ha kinaki, pea ‘ilonga ha feilaulau-angahala, pea ‘ilonga ha feilaulau-halaia, ‘a ia te nau ‘omi kiate au, ‘e toputapu ia kiate koe mo ho ngaahi foha. 10‘Io, ‘e tatau ho‘o kai ia mo e ngaahi me‘a toputapu: ‘ilonga hao tangata te ne kai ai: ‘e toputapu ia kiate koe.
11Ko eni foki ‘oku ‘a‘au; ko ‘enau ngaahi me‘a‘ofa ‘oku hapai, ‘io, ‘a e ngaahi me‘a ‘oku tākalo ‘e ha‘a ‘Isileli; kuo u foaki ia kiate koe pea ki ho ngaahi foha, pea ki ho ngaahi ‘ōfefine, ko e fatongia ta‘engata; ko ia kotoa pē ‘i ho fale ‘oku ma‘a te ne kai ai.
12Ko e lelei ‘o e lolo mo e lelei ‘o e uaine mo e uite, ‘a e ngaahi polopolo ‘oku nau ‘omi mei ai kia Sihova, kuo u ‘atu ia kiate koe. 13Ko e ngaahi fua tapu ‘o e me‘a kehekehe ‘oku ‘i honau fonua, ‘a ia te nau ‘omi ki he ‘Eiki, ‘e ‘a‘au ia; ko ia kotoa pē ‘i ho fale ‘oku ma‘a te nau kai ia.
14‘Ilonga ha me‘a ‘i ‘Isileli ‘oku tapui ‘e ‘a‘au ia.#Lev 27.28
15‘Ilonga ha ‘olopo‘ou ‘i he fa‘ahinga me‘a kotoa pē, ‘a ia te nau ‘omi kia Sihova, pe ko e tangata pe ko e manu, ‘e ‘a‘au ia: ka ko e ‘olopo‘ou ‘o e kakai kuo pau te ke huhu‘i, pea te ke huhu‘i mo e ‘olopo‘ou ‘o e manu ta‘ema‘a. 16Pea ko e me‘a ki honau huhu‘i, te ke kamata ho‘o lau mahu‘inga mei he‘ene taha māhina, ko e nima‘i sikeli hono pa‘anga (fai ki he sikeli ‘o e Fale Tapu, ‘a ia ko e kela ‘e uofulu). 17Ka ko e ‘olopo‘ou ‘o e pulu, pe ko e ‘olopo‘ou ‘o e sipi, pe ko e ‘olopo‘ou ‘o e kosi, ‘e ‘ikai te ke huhu‘i: ‘oku tapu ‘a e fa‘ahinga ko ia: ko honau toto te ke afuhi ‘aki ‘a e ‘ōlita, pea ko honau ngako te ke tutu ke feia ha ngangatu fakahōifua kia Sihova. 18Ka ko honau kakano ‘e ‘a‘au, ‘o hangē ko e ‘a‘au ‘a e fatafata tākalo mo e tefito‘i alanga to‘omata‘u.
19Ko e ngaahi me‘a tapu kotoa ‘oku hapai ‘e ha‘a ‘Isileli kia Sihova kuo u ‘atu ia kiate koe, pea ki ho ngaahi foha, pea ki ho ngaahi ‘ōfefine foki, ko e fatongia ta‘engata: ko e fuakava fakamāsima ia, ta‘engata, ‘i he ‘ao ‘o Sihova, kiate koe mo ho hako foki.
20Pea folofola ‘a Sihova kia ‘Ēlone, Ko e me‘a ki honau fonua, ‘e ‘ikai hao tofi‘a ai, pe hao vahe ‘i honau lotolotonga: ko au pē ko ho vahe mo tofi‘a ‘i he lotolotonga ‘o ha‘a ‘Isileli.
21Pea ko e me‘a ki ha‘a Līvai, vakai kuo u foaki hono kotoa ‘o e tukuhau hongofulu mei ha‘a ‘Isileli moonau tofi‘a, ko e fetongi ‘o ‘enau ngāue he‘enau fai ‘a e ngāue ‘o e Tēniti Fe‘iloaki‘anga.#Lev 27.30-33; Teu 14.22-29 22Pea ‘e ‘ikai toe taka ofi ‘a ha‘a ‘Isileli ki he Tēniti Fe‘iloaki‘anga, na‘a nau fua ha hia, ‘o pekia. 23Ka ‘e fai ‘e Līvai ia ‘a e ngāue ‘o e Tēniti Fe‘iloaki‘anga, pea ‘e fua ‘e kinautolu ‘enau hia: ko e tu‘utu‘uni ta‘engata ia, ‘o fai ki ai ‘i he ngaahi to‘utangata ‘amui; ‘e ‘ikai ‘aupito vahe hanau tofi‘a ‘i he lotolotonga ‘o ha‘a ‘Isileli, 24he ko e tukuhau hongofulu ‘a ha‘a ‘Isileli, ‘a ia ‘oku nau feilaulau-hapai ‘aki kia Sihova, kuo u foaki atu ia ki he kau Līvai moonau tofi‘a: ko hono ‘uhinga ia ‘o ‘eku pehē kiate kinautolu, ‘E ‘ikai te mou ma‘u tofi‘a ‘i he lotolotonga ‘o ha‘a ‘Isileli.
Ko e Vahe Hongofulu ma‘á e Kau Līvai
25Pea folofola ‘a e ‘Eiki kia Mōsese, ‘o pehē, 26Ke ke lea foki ki he kau Līvai, mo ke pehē kiate kinautolu, Ka mou ka to‘o mei ha‘a ‘Isileli ‘a e tukuhau hongofulu, ‘a ia kuo u foaki kiate kimoutolu ko homou tofi‘a mei ai, pea te mou hapai mei ai ha feilaulau-hapai kia Sihova, ko e vahe hongofulu ‘o e vahe hongofulu ko ia. 27Pea ‘e lau ho‘omou feilaulau-hapai na, ‘o hangē ko ha uite mei homou ta‘u, pea hangē ko e mahu ‘o ho‘omou tata‘onga uaine. 28Ko ia ‘e hapai ‘e kimoutolu foki ha feilaulau kia Sihova mei he tukuhau kehekehe te mou ma‘u mei ha‘a ‘Isileli; he te mou ‘atu mei ai ‘a e feilaulau-hapai ‘o Sihova kia ‘Ēlone ko e taula‘eiki. 29Mei he ngaahi me‘a‘ofa kotoa pē te mou ma‘u te mou hapai hano feilaulau kia Sihova, pea ko hono ‘inasi tapu ‘e hiki mei he mata ‘o e me‘a. 30Ko ia te ke pehē kiate kinautolu, Ka kuo mou hapai hano mata mei ai, pea ‘e toki lau ia ki he kau Līvai ko e fua ‘o e haha‘anga mo e fua ‘o e tata‘o‘anga. 31Pea te mou kai ia ‘i he potu kotoa pē, ‘e kimoutolu mo homou ngaahi fale: he ko e totongi ia ‘i ho‘omou ngāue ‘i he Tēniti Fe‘iloaki‘anga. 32Pea ‘e ‘ikai te mou hia ai, ‘oka ‘osi ho‘omou hapai hano mata mei ai: ka ko e ngaahi me‘a tāpuhā ‘o ha‘a ‘Isileli ‘e ‘ikai te mou va‘inga‘aki, na‘a mou mate.
Currently Selected:
NŌMIPA 18: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
