KO NEHEMAIA 4
4
Ko Hono Ikuna‘i ‘e Nehemaia ‘a e Kau Fakafe‘ātungia ‘o e ‘Ene Ngāué
1KA ‘i he ‘iloange na‘e fanongo ‘e Sanipalate ‘oku mau langa ‘a e ‘ā, na‘e māfana hono loto, pea ne tuputāmaki lahi ‘aupito, pea ne manuki‘i ‘a e kau Siu. 2‘Io, na‘a ne lea ‘i he ‘ao ‘o hono kāinga pea mo e tau Samēlia, ‘o pehē, Ko e hā ‘oku fai ‘e he kau Siu teimovai na? Te nau lava ke nau malu? Te nau fai hono huufi? Tā ‘e ‘osi ‘anai ‘apē! Tā te nau fakamaka hake ‘a e ngaahi tu‘unga maka kuo tutu ke efu!
3Pea kuo nofo mei hono tafa‘aki ‘a Topaia ‘Āmoni; pea pehē mai ‘e ia, Pea na‘a mo e me‘a ‘oku nau ‘ahi‘ahi langa na, ka ‘alu ha fōkisi ‘i hono funga, te ne holoki honau fu‘u ‘ā maka na.
4(Fanongo ki ai ‘e homau ‘Otua, he ‘oku fakasīkaka‘i kimautolu: pea ke fakafoki ‘enau manuki ki he tumu‘aki ‘onautolu, ‘o tuku kinautolu ke vetea ‘i ha fonua ‘e ‘ave pōpula kinautolu ki ai: 5pea ‘oua na‘a ‘ufi‘ufi ‘enau kovi, pea ke ‘oua na‘a tāmate‘i ‘enau hia mei he fe‘ao mo koe; he kuo nau lea fakamamahi ‘i he ‘ao ‘o e kau langa.)
6Ka na‘a mau langa pē ‘a e ‘ā; pea na‘e ma‘opo‘opo fua pē ‘a e ‘ā, ‘o a‘u ki hono vaeua hake: he na‘e ‘i he kakai ha loto ke ngāue.
7Ka ‘i he ‘iloange na‘e fanongo ‘e Sanipalate, mo Topaia, mo e kau ‘Ālepea, mo e kau ‘Āmoni, mo e kau ‘Asitoti, tokua ‘oku fai hake ‘a e monomono ‘o e ‘ā ‘o Selusalema; kuo kamata ke ma‘opo‘opo ‘a e ngaahi ava; na‘a nau ‘ita ‘aupito. 8Pea nau puleaki‘i kotoa pē fakataha ke ha‘u ‘o fai tau ki Selusalema, ke fakatupu maveuveu ai. 9Ka na‘a mau lotu ki homau ‘Otua, pea mau fokotu‘u ha le‘o ‘aho mo e pō telia kinautolu.
10Na‘e lea mai foki ‘a Siuta, ‘Oku mole ‘a e ivi ‘o e kau fetuku, ka ‘oku lahi ‘a e veve; ko ia ‘oku ‘ikai te mau lava ke fai ‘a e langa ‘o e ‘ā.
11Pea lau ‘e homau ngaahi fili, ‘E ‘ikai te nau ‘ilo, pea ‘e ‘ikai te nau sio, kae fokifā ‘oku tau ‘i honau lotolotonga, ‘o fai honau tāmate‘i, ‘o ta‘ofi ‘a e ngāue.
12Kae‘uma‘ā ‘oka omi ‘a e kau Siu na‘e nofo ofi kiate kinautolu, na‘a nau pehē mai–tu‘o hongofulu nai, pea mei he potu kehekehe–Tokua ke mou foki ki ‘api.#4.12 pehē mai… ki ‘api: ‘Oku ‘ikai ke mahino ‘a hono faka-Hepeluú, ka ko ko hono ‘uhingá nai ko e: fakatokanga mai ‘o fekau‘aki mo e teuteu hotau ngaahi filí ke fakafepaki‘i kitautolu. 13Ko ia, na‘a ku fokotu‘u ‘i he ngaahi potu mā‘ulalo ‘i he feitu‘u mei loto ‘ā, ‘i he ngaahi potu ‘oku ‘ikai ke unga–‘io, na‘a ku fokotu‘u ‘a e kakai ‘o faka-e-fāmili, ‘o nau to‘o ‘enau heletā mo honau tao mo ‘enau kaufana.
14Pea u fakasio, pea u toki tu‘u, ‘o u lea ki he hou‘eiki mo e kau pule, mo hono toe ‘o e kakai, ‘Oua te mou manavahē telia ‘a e kakai ko ē. Manatua ‘a ‘Ātonai, ‘a e Lahi mo Manavahē‘ia, pea mou tau ma‘a homou kāinga, ma‘a homou ngaahi foha, mo homou ngaahi ‘ōfefine, ma‘a homou ngaahi uaifi mo homou ngaahi fale. 15Pea ‘i he faifai pea fanongo ‘e homau ngaahi fili, tā kuo mau ‘ilo ‘a e me‘a, pea kuo fakaikunoa ‘e ‘Elohimi ‘enau fakakaukau, na‘a mau foki kotoa pē ki he ‘ā takitaha ki he‘ene ngafa.
16Pea talu ai mo e fai ngāue ‘e he vaeua ‘o ‘eku kau tama, ka ko e vaeua na‘a nau to‘o ai pē ‘a e ngaahi tao, mo e ngaahi pā, mo e ngaahi kaufana, mo e ngaahi kofu tau; pea na‘e tufotufaki atu ‘a e hou‘eiki, ‘o tu‘u ‘i he tu‘a ‘o e ngaahi fāmili ‘o Siuta. 17Ko e kakai na‘e langa ‘a e ‘ā, mo e kakai na‘e hiki kavenga, ‘o fetuku, na‘a nau ngāue nima taha pē, ‘o to‘o ‘ene mahafu ‘i he taha; 18pea ko e kau langa na‘e takitaha tau ‘ene heletā ki hono fasi‘atu‘a, ‘o fai pehē ‘ene langa. Pea ko e tama ifi talupite na‘e tu‘u ‘i hoku tafa‘aki.
19Pea na‘a ku pehē ki he hou‘eiki, mo e kau pule, pea ki hono toe ‘o e kakai, Ko e ngāue ‘oku lahi mo mafola, pea ‘oku movete kitautolu ‘i he funga ‘ā, ‘o vāmama‘o ‘a ē mo ē.
20‘Ilonga ha potu ‘oku mou fanongo ki ai ki he lea ‘a e talupite, mou fakataha ki ai kiate kimautolu. Ko hotau ‘Otua te ne tau ma‘atautolu. 21Ko ia na‘a mau fai ‘a e ngāue; pea ko honau vaeua na‘a nau to‘o tao mei he mafoa ‘a e ata, ‘o a‘u ki he hā ‘a e ngaahi feitu‘u.
22‘I he taimi ko ia na‘a ku pehē foki ki he kakai, ke takitaha mohe ‘i Selusalema, ‘a ia mo ‘ene tama, koe‘uhi ke kau mo kitautolu ‘i he le‘o po‘uli, mo e ngāue ‘aho. 23Pea ko au, mo hoku kāinga, mo ‘eku kau tama, mo e ka‘ate na‘e muimui kiate au, na‘e ‘ikai te nau vete honau kofu, ‘o takitaha mohe mo ‘ene mahafu ‘i to‘omata‘u.#4.23 ‘o takitaha… to‘omata‘u; ‘Oku fihi ‘aupito. ‘Oku hiki ‘e he ni‘ihi: ‘alu mo ‘ene mahafu ki he vai.
Currently Selected:
KO NEHEMAIA 4: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
