KO NĒHUMI 3
3
1‘OIAUĒ ‘a e kolo toto‘ia!
Kuo fonu ‘aupito ‘i he kākā mo e hae noa;
‘Oku ‘ikai te ne tūkua ‘ene a‘alu.
2Sī! ‘oku ongoonga‘a mai ‘a e uipi,
Pea ‘oku ongoonga‘a mai ‘a e ngatata ‘a e ngaahi me‘a teka;
Mo e patatū ‘a e fanga hoosi,
Mo e tohopo ‘a e ngaahi sāliote;
3‘a e ma‘ali‘ali atu ‘a e tama heka hoosi,
Mo e ulo ‘a e heletā,
Mo e tapa ‘a e tao,
Mo e tokolahi ‘a e kafo,
Pea fokotu‘uniu ‘a e pekia,
Pea ‘oku ‘ikai ha ngata‘anga ‘o e ‘anga‘anga
‘Oku nau humu ‘i honau ngaahi ‘anga‘anga:
4Ko e ‘ātunga ē ‘o e lahi ‘o e fe‘auaki ‘a e pa‘umutu faka‘ofo‘ofa,
Poto he ngaahi tō‘onga tuki;
‘A ia ‘oku ne fakatau ‘a e ngaahi kakai ‘aki ‘ene ngaahi fe‘auaki,
Mo e ngaahi fāmili ‘aki ‘ene ngaahi tō‘onga tuki.
5Ko au eni te u fai mo koe–ko Sihova Sāpaoti ia mei he Ta‘ehāmai–pea te u huke ho kāuni, ‘o pūlou ‘aki ho mata; pea te u tuku ke sio ‘a e ngaahi kakai ki ho‘o telefua, mo e ngaahi pule‘anga ki ho mā‘anga. 6Ko ia te u laku me‘a fakalielia kiate koe, pea te u ngaohi koe ke ta‘etoka‘i, pea te u ngaohi koe ko e me‘a ke māta‘i. 7Pea ‘e faifai pea ‘ilonga ha taha ‘e sio kiate koe te ne hiki ke mama‘o meiate koe, pea te ne pehē:
Kuo fakalala koā ‘a Ninive!
Ko hai te ne maumau‘ia ai?
Te u kumi mei fē ha ni‘ihi ke fakalelu?
8‘Oku ke lelei hake koā ‘i Nō-‘Āmoni?–
Si‘i kolo na‘e nofo ‘i he ngaahi manga ‘o Naila,
‘O vai takai;
‘A ia ko hono puke ko e tahi,
‘Io, ko hono ‘ā ko e tahi pē.
9Ko hono mālohinga ‘a ‘Itiopea mo ‘Isipite,
Pea na‘e ‘ikai hano ngata‘anga;
Ko Futi mo e kau Lupi na‘e nofo mai ke tokoni kiate koe.
10Ka na‘a mo ia na‘e tuku ki he fakahē,
Na‘a ne ‘alu ke nofo pōpula:
Ko ha‘ana ia tamaiki foki na‘e havehave,
He tuliki ‘o e ngaahi hala:
Pea na‘a nau talotalo ki hono hou‘eiki,
Pea ko hono kakai mā‘olunga kotoa na‘e ha‘i seini.
11Ko koe foki ‘e fakainu ke konā,
Te ke hoko ko e me‘a kuo fufū;
Ko koe foki te ke kumi ha hūfanga mei he fili.
12Ko ho ngaahi talitau‘anga kotoa
‘e hoko ‘o hangē ko e ngaahi fiki,
‘Oku ai ‘a e to‘ukai kehe:
Ka lulu, te nau ngangana
Ki he ngutu ‘o e tama kai.
13Vakai, ko e kakai ‘i ho loto kolo ko e koto fefine pē.
Kuo mātu‘aki fakaava ‘a e ngaahi hū‘anga ‘o ho fonua ki ho ngaahi fili:
Kuo keina ‘e he afi ho ngaahi songo.
14Ke ke touvai ma‘au telia ‘a e ‘ākolo‘i,
Ngaohi ke mālohi ho ngaahi talitau‘anga:
‘Alu ki he kele,
‘O malaki ‘a e ‘umea,
‘O monomono ‘a e ngoto‘umu maka ‘umea.
15Ko e potu ko ia ‘e keina ai koe ‘e he afi;
‘E tu‘usi koe ‘e he heletā,
‘E keina koe hangē ko e fai ‘e he‘e-‘emo:
Neongo ho‘o fakatokolahi ‘a tangata
‘O hangē ko e he‘e-‘emo,
Neongo ho‘o fakatokolahi ‘a fefine
Ke hangē ko e he‘e fakafolau.
16Neongo ho‘o ‘ai ho‘o kau fakatau,
Ke tokolahi ange ‘i he ngaahi fetu‘u ‘o e langi;
Kae maumau ‘e he he‘e-‘emo,
‘O ne puna ange.
17Ko ho kau fakanofo ‘oku hangē ko e he‘e-fakafolau,
Pea ko ho‘o ngaahi ‘eikitau ‘oku hangē ko e hokohoko fuifui he‘e,
‘A ia ‘oku nau tālolo ‘i he ngaahi ‘ā ‘akau ‘i he ‘aho momoko,
Ko e hopo leva ‘a e la‘ā pea nau puna,
Pea ‘oku ‘ikai ‘iloa ‘a e potu ‘oku nau ‘i ai.
18Si‘i Tu‘i ‘Āsilia,
Kuo mohe ho‘o kau tauhi,
‘Oku mālōlō ho kau ‘ilonga;
‘Oku movete ho kakai ‘i he ngaahi funga mo‘unga,
Pea ‘oku ‘ikai ha taha ke tānaki kinautolu.
19‘Oku ‘ikai mamate ho lavea;
‘Oku matamatakovi ho kafo:
Ko ia kotoa pē ‘oku fanongo ki he ongoongo kiate koe
Te ne pasipasi nima kiate koe;
He ko hai kuo ‘ikai ke laka atu ki ai
Ho‘o kovi ma‘u ai pē.
Currently Selected:
KO NĒHUMI 3: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
