Mātiú 8

Ko e Fakamo‘ui ‘e Sīsū ‘a e Tangata

(Ma‘ake 1.40-45; Luk 5.12-16)

1PEA ‘i he‘ene ‘alu hifo mei he mo‘unga, na‘e muimui kiate ia ha ngaahi fu‘u kakai. 2Pea ‘iloange na‘e ha‘u ha kilia ‘o ne hū kiate ia, ‘o ne pehē, ‘Eiki, ka ne ke loto ke fai, te ke lava ke fakama‘a au.#8.2 fakama‘a au; Na‘e tui ‘a e kakai Siú ka kilia ha taha, pea ‘uli ia ‘i he sio fakalotu ki aí, ‘o ‘ikai leva ke taau ke ne kau ‘i ha ma‘unga kelesi.

3Pea mafao atu ‘e ia hono nima ‘o ala ki he tangata, ‘o ne pehē, ‘oku ou loto pē: ke ke ma‘a koe. Pea na‘e fakama‘a leva hono kilia. 4Pea pehē ‘e Sīsū kiate ia, Tokanga ke ‘oua na‘a ke tala ha me‘a ki ha taha; ka ke mole pē ‘o fakahā koe ki he taula‘eiki, pea ‘ange ‘a e me‘a‘ofa na‘e tu‘utu‘uni ‘e Mōsese, kōno fakamo‘oni kiate kinautolu.#Lev 14.1-32

Ko e Fakamo‘ui ‘e Sīsū ‘a e Tamaio‘eiki ‘a e ‘Ōfisa Loma

(Luk 7.1-10; Sioné 4.43-54)

5Pea ‘i he‘ene a‘u ki Kāpaneume, na‘e ha‘u kiate ia ha senituliō, ‘o kole kiate ia, ‘o pehē, 6‘Eiki, ko si‘eku tamaio‘eiki ‘oku fokoutua ‘i ‘api, kuo puke ‘i he mamatea, pea fakamanavahē ‘ene mamahi.

7Pea pehē ‘e ia ki ai, Te u ‘alu atu ‘e au, ‘o faito‘o ia.

8Ka ka tali ‘e he senituliō, ‘o ne pehē, ‘Eiki, ‘oku ‘ikai te u taau ke ke hū mai ki hoku poko‘i fale, ka ke fai pē ha fo‘i folofola, pea ‘e mo‘ui ai ‘eku tamaio‘eiki. 9He ko au foki ko e tangata pule‘ia, pea ‘oku ai ha kau sōtia ‘oku fakaongo kiate au: pea u pehē ki ha taha, ‘Alu, pea ‘alu ia, pea ki ha taha, Ha‘u, pea ne ha‘u; pea u pehē ki he‘eku pōpula, Fai ē, pea ‘oku ne fai.

10Pea ‘i he fanongo ki ai ‘a Sīsū na‘a ne ofo; ‘o ne pehē kiate kinautolu na‘e muimui mai, ko au ē, ‘oku ou tala atu, Na‘e‘ikai te u ‘ilo mei ha taha ‘i ‘Isileli ha tui ‘oku pehē fau. 11Pea‘oku ou tala atu, ‘E ha‘u ha tokolahi mei Hangahake mo Hangahifo, ‘o nau nonofo mo ‘Epalahame mo ‘Aisake mo Sēkope, ‘i he Pule‘anga ‘o Hēvani:#Luk 13.29 12ka ko e fānau totonu ‘o e Pule‘anga ‘e kapusi ki he po‘uli ‘o tua‘ā. Ko e potu ia ‘e toki hoko ai ‘a e tangi mo e fengai‘itaki ‘o e nifo.#Māt 22.13; 25.30; Luk 13.28 13Pea pehē ‘e Sīsū ki he senituliō, ‘Alu pē ā: ‘e fai kiate koe ‘o hangē ko ho‘o tui.

Pea na‘e mo‘ui ‘a e tamaio‘eiki ‘i he taimi pē ko ia.

Ko e Fakamo‘ui ‘e Sīsū ‘a e Kakai Tokolahi

(Ma‘ake 1.29-34; Luk 4.38-41)

14Pea ‘i he hū ‘a Sīsū ki he fale ‘o Pita, na‘a ne ‘ilo ‘a e fa‘ē ‘a hono uaifi, ‘oku tokoto kuo puke‘i he mofi. 15Pea ne ala ki hono nima, pea mahu‘i ‘a e mofi mei he fefine, pea ne tu‘u ‘o tauhi kia Sīsū.

16Pea kuo efiafi, na‘a nau ‘oange kiate ia ‘a e tokolahi na‘e ‘āvea; ‘o ne kapusi ‘a e ngaahi fa‘ahikehe ‘aki ha lea pē, pea ne fakamo‘ui mo kinautolu kotoa pē na‘e puke: 17koe‘uhi ke fakamo‘oni ki he me‘a na‘e folofola‘aki ‘ia ‘Aisea ko e palōfita, ‘o pehē,

Na‘a ne to‘o ‘e ia ‘etau ngaahi vaivai,

Mo ne fua ‘etau ngaahi mahaki.#‘Ais 53.4

Ko e Ni‘ihi Na‘e Fie Kaungā Fononga mo Sīsū

(Luk 9.57-62)

18Pea ‘i he vakai ‘e Sīsū ki he ‘ālopaki ha fu‘u kakai lahi, na‘a ne tu‘utu‘uni ke ‘alu mei ai ki he kauvai. 19Pea na‘e ‘unu‘unu mai kiate ia ha toko taha, ko ha sikalaipe, ‘o ne pehē ki ai, Tangata‘eiki, te u muimui kiate koe, neongo pe ko e fē ha potu te ke me‘a ki ai.

20Pea lea ‘a Sīsū kiate ia, ‘o pehē, Ko e fanga fōkisi ‘oku ai hanau tafu, mo e fanga manupuna ‘o e ‘atā hanau pununga; ka ko e Fanautama ‘a Tangata ‘oku ‘ikai si‘a potu ke ‘olunga ki ai hono ‘ulu.

21Pea toki lea mo ha taha kehe ‘o e kau ako, ‘o ne pehē ki ai, ‘Eiki, tuku mai au ke u lele mu‘a ‘o tanu si‘eku motu‘a.

22Ka ka tali ‘e Sīsū, Muimui koe kiate au, pea tuku ki he kau mate ke nau tanu ‘a e mate ‘anautolu.

Ko e Taufa Na‘e Tō

(Ma‘ake 4.35-41; Luk 8.22-25)

23Pea kuo heka ia ki he vaka, pea toki heka mo ‘ene kau ako. 24Pea ‘iloange na‘e hoko ha hou lahi, pea fakapūlou ‘a e vaka ‘e he ngaahi peau: ka ka mohe pē ia. 25Pea ‘unu‘unu atu ‘a e kau ako, ‘o nau fafangu ia, he‘enau pehē, ‘Eiki! Tokoni mai! ‘Oku tau tu‘utāmaki!

26Pea pehē ‘e ia kiate kinautolu, ‘a e kau tui vaivai, ko e hā ‘oku mou lotosi‘i ai? Pea ne toki tu‘u ‘o lolomi ‘a e matangi mo e tahi, pea na‘e hoko ha tofu lahi.

27Pea ofo ‘a e kau tangata ‘o nau pehē, Ko e tangata hā ‘eni! He na‘a mo e matangi mo e tahi, ‘oku na fakaongo kiate ia!

Ko e Fakamo‘ui ‘e Sīsū ha Ongo ‘Āvea

(Ma‘ake 5.1-20; Luk 8.26-39)

28Pea ‘i he‘ene a‘u ki he kauvai, ki he fonua ‘o e ha‘a Katala, na‘e fakafetaulaki mai kiate ia ha ongo tangata na‘e ‘āvea, ko ‘ena fehuufi mei he ‘aaki fonualoto; ko e ongo me‘a ngaohingata‘a ‘aupito, ko ia na‘e ‘ikai ‘uhia ‘a e hala ko ia. 29Pea ‘iloange na‘a na kalanga ‘o pehē, Ko ho hā kimautolu, ‘e ‘Alo ‘o e ‘Otua? Kuo ke ha‘u ke fakamamahi‘i leva kimautolu, ka ‘oku kei tuai hono taimi?

30Pea na‘e ai ha fu‘u fanga puaka na‘e huhua mei he mama‘o; 31pea kole kiate ia ‘e he kau tēvolo, ‘o pehē, Ka ko ho‘o kapusi kimautolu, tuku ke mau hū ki he fanga puaka na.

32Pea pehē ‘e ia kiate kinautolu, ‘Alu pē. Pea nau hū mai kitu‘a, ‘o ‘alu atu, ‘o hū ki he fanga puaka: pea fakafokifā na‘e ‘oho kotoa ‘a e fanga manu ‘i he tahifohifo ki loto tahi, ‘o nau melemo ai.

33Pea hola ‘a e kakai na‘e tauhi kinautolu, ‘o nau ‘alu mei ai ki he kolo, ‘o ongoongoa kotoa pē, kae‘uma‘ā ‘a e ngaahi me‘a na‘e kau ki he ongo ‘āvea. 34Pea vakai, na‘e ‘aukau mai ‘a e kolo kitu‘a ke fakafetaulaki kia Sīsū: pea ‘i he‘enau ‘ilo ia, na‘a nau kole ke ne hiki mei honau feitu‘u.

Currently Selected:

Mātiú 8: TMB

Highlight

Compare

Copy