Mātiú 5

1PEA ‘i he‘ene sio ki he ngaahi fu‘u kakai, na‘a ne ‘alu hake ki he mo‘unga, pea ‘i he‘ene nofo hifo ke malanga na‘e ‘unu‘unu atu kiate ia ‘ene kau ako: 2pea ne ‘ofa‘aki ‘ene lea, ‘o ne ako‘i kinautolu, ‘o pehē,

Ko e Ngaahi Tāpuaki

(Luk 6.20-23)

3Monū‘ia ā ka ko kinautolu ‘oku ongo‘i masiva honau laumālie; he ‘oku ‘onautolu ‘a e Pule‘anga ‘o Hēvani.

4Monū‘ia ā ka ko kinautolu ‘oku fakamamahi:#‘Ais 61.2 he ‘e fakafiemālie ‘a kinautolu.

5Monū‘ia ā ka ko kinautolu ‘oku fa‘a kātaki:#Saame 37.11 he ‘e tō mo‘onautolu ‘a e fonua.

6Monū‘ia ā ka ko kinautolu ‘oka fie kai mo fie inu ki he mā‘oni‘oni:#‘Ais 55.1-2 he ‘e fakamākona ‘a kinautolu.

7Monū‘ia ā ka ko kinautolu ‘oku manava‘ofa: he ‘e fai manava‘ofa kiate kinautolu.

8Monū‘ia ā ka ko kinautolu ‘oku ma‘a honau loto:#Saame 24.3-4 he te nau mamata ki he ‘Otua.

9Monū‘ia ā ka ko kinautolu ‘oku fakatupu melino: he ‘e ui ‘a kinautolu ko e ngaahi foha ‘o e ‘Otua.

10Monū‘ia ā ka ko kinautolu ‘oku fakatanga‘i koe‘uhi ko e failelei:#1 Pit 3.14 he ‘oku ‘onautolu ‘a e Pule‘anga ‘o Hēvani.

11Monū‘ia ā ka ko kimoutolu, ‘oka manukia kimoutolu, mo fakatanga‘i, mo lohiekina ‘i he kovi kehekehe, koe‘uhi ko au.#1 Pit 4.14

12Mou fiefia mo hākailangitau: he lahi ho‘omou totongi ‘i Hēvani; he na‘e pehē ‘enau fakatanga‘i ‘a e kau palōfita, ‘a ia na‘e holomu‘a ‘iate kimoutolu.#2 Kal 36.16; Ngā 7.52

Ko e Māsima mo e Maama

(Ma‘ake 9.50; Luk 14.34,35)

13Ko kimoutolu ko e māsima ‘o e fonua: pea ka mole mei he māsima hono kona, ‘e fakamāsima ‘a e māsima ‘e he hā? ‘Oku ‘ikai kei ‘aonga ki ha me‘a, ka ke laku pē kitu‘a ke molo ai ‘a e kakai.

14Ko kimoutolu ko e maama ‘o māmani: ko e kolo ‘oku tu‘u ‘i ha funga mo‘unga ‘oku ‘ikai te ne lava ke puli.#Sioné 8.12; 9.5 15Pea tala‘ehai ‘oku tutu ha maama ‘o ‘ai ki he loto puha fua, ka ki he tu‘unga maama pē, pea ‘oku ulo atu ia ki he kakai kotoa pē ‘oku ‘i he fale.#Ma‘ake 4.21; Luk 8.16; 11.33 16Pehē foki, ke ulo atu ho‘omou maama ke hā ki he kakai, ke nau mamata ki ho‘omou ngaahi ngāue lelei, pea fakamālō‘ia ‘a ho‘omou Tamai ‘oku ‘i Hēvani.#1 Pit 2.12

Ko e Lao ‘a Mōsesé

17‘Oua te mou mahalo kuo u ha‘u ke tāmate‘i ‘a e Lao, pe ko e Tohi Palōfita: na‘e ‘ikai te u ha‘u ke tāmate‘i, ka ke fakakakato. 18He ko au ē, ‘oku ou tala atu, Lolotonga ‘oku te‘eki mole ‘a e langi mo māmani, ‘e ‘ikai mole mei he Lao ha mata‘itohi ‘e taha, pe ko ha fo‘i kohi, kae‘oua ke fai hono kotoa.#5.18 fai hono kotoa; pe hoko kotoa ‘o mo‘oni. #Luk 16.17 19Ko ia, ‘ilonga ‘a ia te ne tāmate‘i ha taha ‘i he ngaahi tu‘utu‘uni ni ‘oku kihi‘i si‘i, pea ako pehē ki he kakai, ‘e lau ia ko e kihi‘i si‘i ‘i he Pule‘anga ‘o Hēvani: ka ‘ilonga ‘a ia te ne fai ki ai mo ako‘aki, ‘e lau ia ko e lahi ‘i he Pule‘anga ‘o Hēvani. 20He ‘oku ou tala atu, Kapau ‘e ‘ikai lahi hake ho‘omou mā‘oni‘oni ‘i he mā‘oni‘oni ‘a e kau sikalaipe mo e kau Fālesi, ‘e ‘ikai, ‘aupito te mou hū ki he Pule‘anga ‘o Hēvani.

Ko e ‘Ita

21Kuo mou fanongo ne folofola‘aki ki he mātu‘a ‘i mu‘a, ‘o pehē, ‘oua na‘a ke fakapō; pea ‘ilonga ‘a ia te ne fakapō, ‘e fakamāumatea ia ‘i he fakamā‘anga fakakolo:#‘Eki 20.13; Teu 5.17 22ka ‘oku ou tala kiate kimoutolu ‘e au, ‘Ilonga ‘a ia te ne ‘ita#5.22 ‘a ia te ne ‘ita; ‘Oku pehē ‘i he ngaahi hiki fuoloa ‘e ni‘ihi: ‘a ia te ne ‘ita tu‘unga‘a. ki hono kāinga, ‘e fakamāumatea‘i he fakamāu‘anga fakakolo; pea ka ‘ilonga ‘a ia te ne pehē ki hono kāinga, Siana vale, ‘e fakamāumatea ia ‘i he Sanetalimi; ka ‘ilonga ha taha te ne pehē, Siana angatu‘u, ‘e fakamāumatea pea tutu ‘i he afi ‘o Kihena. 23Ko ia, ka kuo ke ha‘u mo koe ha feilaulau ki he ‘ōlita, ‘o ke toki manatu‘i ai ‘oku ai ha me‘a ‘oku kovi‘ia ai ho kāinga kiate koe: 24tuku pē hena ho‘o feilaulau ‘i he ve‘e ‘ōlita, pea ke mole atu mu‘a ‘o fakalelei ho kāinga, pea ke toki ha‘u ‘o ‘atu ho‘o feilaulau.

25‘Alu vave ‘o ‘ahi‘ahi fakamolemole ki he tangata faka‘ilo, ‘o toutou kole ‘o a‘u ki ho‘omo fangafanga hū ki he fakamaau; na‘a ‘iloange; ‘e ‘oatu koe ‘e he faka‘ilo ki he fakamaau, pea ‘oatu ‘e he fakamaau ki he ‘ōfisa, pea ‘e lī koe ki he pilīsone. 26Ko au ē, ‘oku ou tala atu, ‘E ‘ikai te ke ‘alu mei ai kae‘oua ke ‘osi ho‘o totongi ‘o a‘u ki he toenga sēniti.

Ko e Nofo Mali

27Kuo mou fanongo na‘e folofola‘aki, ‘oua na‘a ke tono fefine:#‘Eki 20.14; Teu 5.18 28ka ‘oku ou tala kiate kimoutolu ‘e au, ‘Ilonga ‘a ia te ne fakasio ki ha fefine ke tafunaki ‘ene holi ki ai, kuo ne tono‘i ia ‘i hono loto. 29Ko ia, neongo ko ho mata to‘omata‘u ‘oku fakahingaki koe, kape‘i ia ‘o li‘aki: he ‘oku lelei mu‘a kiate koe ke mole hao kupu pē ‘e taha, ‘i he lī ho sino kotoa ki Heli.#Māt 18.9; Ma‘ake 9.47 30Pea neongo ko ho nima to‘omata‘u ‘oku fakahingaki koe, tu‘usi ia pea li‘aki; he ‘oku lelei mu‘a kiate koe ke mole hao kupu pē ‘e taha, ‘i he a‘u ho sino kotoa ki Heli.#Māt 18.8; Ma‘ake 9.43

Ko e Vete Mali

(Māt 19.9; Ma‘ake 10.11,12; Luk 16.18)

31Ka na‘e folofola‘aki, ‘Ilonga ha taha te ne li‘aki hono uaifi, ke ne ‘ange ki ai ha tohi vete:#Teu 24.1-4; Māt 19.7; Ma‘ake 10.4 32ka ‘oku ou tala kiate kimoutolu ‘e au, Ko ia ‘oku ne li‘aki hono uaifi, kae ‘ikai ‘i ha‘ane faihala mo ha taha, ‘oku ne tuku ia ke tonoa: pea ko e tangata te ne mali mo ia kuo li‘aki ‘oku ne tono fefine.#Māt 19.9; Ma‘ake 10.11-12; Luk 16.18; 1 Kol 7.10-11

Ko e Fuakava Loi

33Ko eni foki, kuo mou fanongo na‘e folofola‘aki ki he mātu‘a ‘i mu‘a, ‘oua na‘a ke fuakava loi, ka ke vete ki he ‘Eiki ho‘o ngaahi fuakava:#Lev 19.12; Nōm 30.2; Teu 23.21 34Ka ‘oku ou tala kiate kimoutolu ‘e au, ‘oua ‘aupito na‘a lea tuki, ‘oua ‘e lea ki he langi, he ko e taloni ia ‘o e ‘Otua:#Sēm 5.12; ‘Ais 66.1; Māt 23.22 35pe ki he fonua, he ko hono tu‘ungava‘e; pe ki Selusalema, he ko e kolo ia ‘o e Tu‘i Fakaleveleva.#‘Ais 66.1; Saame 48.2 36‘Oua ‘e lea tuki ki ho ‘ulu, he ‘oku ‘ikai te ke mafai hano liliu ‘o ha tu‘oni lou‘ulu ‘e taha ke hinehina pe ‘uli‘uli. 37Ka ke peheni ho‘omou lea, ‘Io, ‘Io, ‘Ikai, ‘Ikai: he ka ai hano fakalahi ‘oku mei he Fili ia.

Ko e Sauni

(Luk 6.29,30)

38Kuo mou fanongo na‘e folofola‘aki, Ke totongi ‘aki ‘a e fo‘i mata ha fo‘i mata, mo e fo‘i nifo ha fo‘i nifo:#‘Eki 21.24; Lev 24.20; Teu 19.21 39ka ‘oku ou tala kiate kimoutolu ‘e au, ‘oua na‘a taliteke‘i ho fili; ka ‘oka sipi‘i ‘e ha taha ho kou‘ahe to‘omata‘u, hanga koe, ‘o fulihi ki ai ho to‘ohema. 40Pea ka loto ha taha ke mo hopo, pea ke ne ma‘u ho sote; tuku kiate ia mo ho pulupulu. 41Pea ka fakafatongia koe ‘e ha talafekau ke ke ‘ave ia ‘i ha maile ‘e taha, pea mole mo ia ‘o maile ua. 42Ka fai ha kole ‘e ha taha kiate koe, tali pē; pea ka loto ha taha ke nō meiate koe, ‘oua na‘a ke fulitu‘a ki ai.

Ko e ‘Ofa

(Luk 6.27,28,32,36)

43Kuo mou fanongo na‘e folofola‘aki, Te ke ‘ofa‘i ho kaungā‘api, kae fehi‘a ki ho fili:#Lev 19.18 44ka ‘oku ou tala kiate kimoutolu ‘e au, Mou ‘ofa‘i homou ngaahi fili, pea hūfia ‘a kinautolu ‘oku nau fakatanga‘i kimoutolu. 45Koe‘uhi ke mou hokosi ho‘omou Tamai ‘oku ‘i Hēvani: he ‘oku ne fakahopo ‘ene la‘ā ki he kovi mo e lelei, pea ‘oku ne faka‘uha ki he faitotonu mo e faihala. 46He kapau te mou ‘ofa‘i ‘a kinautolu pē ‘oku ‘ofa mai, ko e me‘a ia ‘e fakakoloa? ‘ikai ‘oku fai pehē mo e kau pōpilikane? 47Pea kapau ‘oku mou fetapa ki homou kāinga pē, ko e hā ha me‘a ‘oku mou fai ‘oku hulu atu? ‘Ikai ‘oku fai ‘e he Senitaile foki ‘a e me‘a ko ia? 48Ka mou haohaoa pē ‘a kimoutolu; ‘o hangē ‘oku haohaoa ‘a ho‘omou Tamai Fakalangi.#Lev 19.2; Teu 18.13

Currently Selected:

Mātiú 5: TMB

Highlight

Compare

Copy