Mātiú 28
28
Ko e Toetu‘u ‘a Sīsū mei he Maté
(Ma‘ake 16.1-18; Luk 24.1-12; Sioné 20.1-10)
1PEA ‘i he faka‘osi ‘o e Sāpate, pea kamata hoko ‘a e ‘uluaki ‘aho ‘o e uike, mo e omi ‘a Mele mei Makitala mo e Mele ‘e taha ke vakai ‘a e fa‘itoka. 2Pea ‘iloange na‘e hoko ha fu‘u mofuike: he na‘e hifo mei langi ha ‘āngelo ‘a e ‘Eiki, ‘o ne ‘alu ‘o teka‘i mai ‘a e maka, ‘o ne hekeheka ai. 3Pea na‘e hangē ‘ene hā ko e ‘uhila, pea hinaekiaki hono kofu ‘o hangē ko e sinou: 4Pea tetetete ‘a e kau le‘o ‘i he manavahē kiate ia, ‘o nau hoko ‘o hangē ha mate.
5Pea lea ange ‘a e ‘āngelo, ‘o ne pehē ki he ongo fafine, ‘oua na‘a manavahē kimoua; he ‘oku ou ‘ilo ko ho‘omo kumi ‘a Sīsū na‘e kalusefai. 6‘Oku ‘ikai te ne ‘i heni: he kuo ne toetu‘u, ‘o hangē ko ‘ene me‘a. Omi ‘o mamata ki he potu na‘a ne toka ai. 7Pea mo ō ke vave ‘o tala ki he‘ene kau ako, ‘o pehē, Kuo ne toetu‘u mei he pekia; pea ko eni ‘oku ne mu‘omu‘a kiate kimoutolu ki Kāleli; ko e potu ko ia te mou mamata ai kiate ia: ko ena, kuo u tala atu.
8Pea na laka leva mei he fonualoto, ‘oku na manavahē kae fiefia ‘aupito; ‘o na fe‘atungi ke ongoongoa ki he‘ene kau ako.
9Pea ‘iloange na‘e fakafetaulaki mai ‘a Sīsū kiate kinaua, ‘o ne me‘a mai, Si‘oto‘ofa atu! Pea ‘unu‘unu atu ‘a e ongo fafine, ‘o puke hono va‘e, ‘o hū kiate ia. 10Pea folofola mai ‘a Sīsū kiate kinaua, ‘oua ‘e manavahē: mole pē ‘o fakahā ki si‘oku ngaahi tokoua ke nau, ‘alu ki Kāleli, pea ko e potu ko ia te nau mamata ai kiate au.
Ko e Fakamatala ‘a e Kau Le‘ó
11Pea lolotonga ‘ena ō, tā na‘e ‘alu ki kolo ha ni‘ihi ‘i he kau le‘o, ‘o nau fakahā ki he hou‘eiki taula‘eiki ‘a e ngaahi me‘a kuo hoko. 12Pea kuo nau fakataha mo e kau mātu‘a, ‘o fai ‘enau fakakaukau, na‘a nau toki ‘ange ha fu‘u pa‘anga ki he kau sōtia, 13‘o nau pehē, Ko ho‘omou lea ‘eni, Na‘e ha‘u po‘uli ‘ene kau ako, ‘o nau kaiha‘asi ia lolotonga ‘emau mohe. 14Pea kapau ‘e faka‘ilo ia ki he Kōvana, te mau fakahehema‘i ia, ka mou ‘ata‘atā.
15Pea nau to‘o ‘a e pa‘anga, ‘o nau fai ‘o hangē ko honau fale‘i: pea ko hono tala ko ia kuo lau holo ‘i he kakai Siu, ‘o a‘u ki he ‘aho ni.
Ko e Hā ‘a Sīsū ki He‘ene Kau Akó
(Ma‘ake 16.14-18; Luk 24.36-49; Sioné 20.19-23; Ngā 1.6-8)
16Pea ko e kau Hongofulu mā taha ‘o e ako na‘a nau fononga ki Kāleli, ki he mo‘unga ne tu‘utu‘uni ‘e Sīsū kiate kinautolu.#Māt 26.32; Ma‘ake 14.28 17Pea ‘i he‘enau mamata kiate ia na‘a nau hū: ka na‘e tāla‘a ‘a e ni‘ihi. 18Pea ‘i he ‘unu‘unu mai ‘a Sīsū, na‘a ne folofola kiate kinautolu ‘o pehē, Kuo tuku kiate au ‘a e pule kotoa pē ‘i langi pea ki māmani. 19Ko ia, ke mou ō, ‘o ngaohi ‘a e ngaahi kakai kotoa pē ko ‘eku kau ako, ‘i he papitaiso kinautolu ki he Huafa ‘o e Tamai mo e ‘Alo mo e Laumālie Mā‘oni‘oni:#Ngā 1.8 20mo e ako‘i kinautolu ke tauhi ‘a e ngaahi me‘a kotoa pē kuo u tu‘utu‘uni atu. Pea ko ‘eni, ‘oku ou ‘iate kimoutolu ‘e au ‘i he ngaahi ‘aho kotoa pē, ‘o a‘u ki he ngata‘anga ‘o māmani.
Currently Selected:
Mātiú 28: TMB
Highlight
Share
Compare
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
