KO SIOSIUA 3
3
Ko e Hiki e Kakai ‘Isilelí ki he Kauvai ‘e Taha ‘o e Vaitafe ko Soataní
1PEA tu‘u hengihengi hake ‘a Siosiua, ‘o nau hiki mei Sītimi, ‘o nau a‘u ki Soatani, ‘a ia mo ha‘a ‘Isileli kātoa; pea nau ‘apitanga ai ‘i he‘enau teu a‘a atu. 2Pea hili ‘a e ‘aho ‘e tolu na‘e ‘alu atu ‘a e kau ‘ōfisa ‘i he loto ‘apitanga; 3‘o nau fanongonongo ki he kakai, ‘o pehē, Ka mou ka sio ki he ‘A‘ake ‘o e Kovinānite ‘o Sihova ko homou ‘Otua, ‘oku kauala ia ‘e he kau Līvai taula‘eiki, pea te mou toki hiki mei homou ngaahi feitu‘u, ‘o muimui atu. 4Ka te mou tuku hamou vaha‘a mo ia, ‘o fe‘unga nai hono fua mo e kiupite ‘e ua afe: ‘oua te mou ofi ki ai, koe‘uhi ke mou ‘ilo ‘a e hala te mou fou ai; he kuo te‘eki ke mou laka ‘i he hala ko ē ha taimi.
5Pea lea ‘a Siosiua ki he kakai, ‘o pehē, Mou tapui kimoutolu, he ko e ‘apongipongi ‘e fai mana ‘e Sihova ‘i homou lotolotonga. 6Pea lea ‘a Siosiua ki he kau taula‘eiki ‘o pehē, Hiki ‘a e ‘A‘ake ‘o e Kovinānite, ‘o laka atu ‘i he ‘ao ‘o e kakai. Pea na‘a nau hiki ‘a e ‘A‘ake ‘o e Kovinānite, ‘o nau laka atu ‘i he ‘ao ‘o e kakai.
7Pea folofola ‘a Sihova kia Siosiua, Ko e ‘aho ni te u kamata ke hākeaki‘i koe ‘i he ‘ao ‘o ‘Isileli kātoa, koe‘uhi ke nau ‘ilo, hangē na‘a ku ‘ia Mōsese, ‘e pehē ‘eku ‘iate koe. 8Pea te ke tu‘utu‘uni ki he kau taula‘eiki ‘oku ha‘amo ‘a e ‘A‘ake ‘o e Kovinānite, ‘o pehē, Ka mou ka a‘u ki he ngutuvai ‘o Soatani, te mou tu‘u ma‘u pē ‘i Soatani.
9Pea lea ‘a Siosiua ki ha‘a ‘Isileli, ‘Unu‘unu mai ki heni ke fanongo ki he ngaahi folofola ‘a Sihova ko homou ‘Otua. 10Pea pehē ‘e Siosiua, Ko e me‘a ko ia te mou ‘ilo ai ‘oku ‘i homou lotolotonga ‘a e ‘Otua Mo‘ui, pea te ne mātu‘aki kapusi mei homou ‘ao ‘a ha‘a Kēnani, mo ha‘a Heti, mo ha‘a Hevi, mo ha‘a Pēlisi, mo ha‘a Keakesa, mo ha‘a ‘Āmoli, mo ha‘a Siepusi. 11Vakai, ko e ‘A‘ake ‘o e Kovinānite ‘o e ‘Eiki ‘o māmani kātoa ‘oku ‘alu mu‘omu‘a ‘iate kimoutolu ki loto Soatani. 12Pea ko eni, mou vahe mai ha toko hongofulu mā ua mei he ngaahi matakali ‘o ‘Isileli, ‘o takitaha ‘a e matakali ha tangata ‘e toko taha. 13Pea ka faifai pea ma‘u ‘enau tu‘u ‘i he vai ‘o Soatani, ‘a e ‘aofiva‘e ‘o e kau taula‘eiki ‘oku kauala ‘a e ‘A‘ake ‘o Sihova ko e ‘Eiki ‘o māmani kātoa, pea ‘e toki motuhi ‘a e vai ‘o Soatani, ‘a ia ‘oku tafe hifo mei he matavai, pea ‘e tu‘u hangē ha fu‘u ‘esi.
14Pea ‘i he hiki ‘a e kakai mei honau ngaahi tēniti ke laka atu ‘i Soatani, ‘oku fotu atu ‘a e kau taula‘eiki ‘enau kauala ‘a e ‘A‘ake ‘o e Kovinānite, 15pea ‘i he a‘u ki Soatani ‘a e kau ha‘amo ‘o e ‘A‘ake, pea lave ‘i he ngutuvai ‘a e va‘e ‘o e kau taula‘eiki na‘e kauala ‘a e ‘A‘ake (he ko e anga ‘o Soatani ‘oku ne mahua mai, ‘o lōmekina hono ngaahi ngutuvai kotoa pē lolotonga ‘a e ututa‘u), 16pea na‘e toki tu‘u hake ‘a e vai ‘o Soatani, ‘a e feitu‘u ki he matavai, ‘o fokotu‘utu‘u hangē ha fu‘u ‘esi, mei he mama‘o ‘aupito, fe‘unga mo ‘Ātama, ko ha kolo ‘oku ‘i he tafa‘aki ‘o Saletani: pea ko e muivai na‘e tafe ki he tahi ‘o e ‘Alapā, ‘a ia ko e Tahi Māsima, na‘e maha ‘aupito: pea na‘e a‘a atu ‘a e kakai, ‘o hangatonu ki Sielikō. 17Pea ko e kau taula‘eiki na‘a nau kauala ‘a e ‘A‘ake ‘o e Kovinānite ‘o Sihova na‘a nau tu‘u ma‘u ‘i he mōmoa ‘i loto Soatani, pea na‘e a‘a atu ‘a ‘Isileli kātoa ‘i he mōmoa, kae‘oua ke ‘osi‘osingamālie ‘a e pule‘anga ‘enau a‘a atu ‘i Soatani.
Currently Selected:
KO SIOSIUA 3: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
