KO SIOSIUA 1
1
Ko e Fekau ‘e he ‘Otuá ‘a Siosiua ke ne Kapa ‘a Kēnani
1PEA hili ‘a e pekia ‘a Mōsese ko e Sevāniti ‘a Sihova, na‘e folofola ‘a e ‘Eiki kia Siosiua ko e foha ‘o Nuni, ‘a ia na‘a ne tauhi ‘a Mōsese, ‘o ne pehē. 2Ko Mōsese ko ‘eku Sevāniti kuo pekia; Pea ko eni ke ke tu‘u koe ‘o ‘alu ki he kauvai ‘e taha ‘o Soatani na, ‘a koe mo e kakai ni kātoa, ‘o a‘u ki he fonua ‘a ia ‘oku ou foaki ni kiate kinautolu, ‘io, ki ha‘a ‘Isileli, 3‘Ilonga ha potu ‘e tu‘u ai homou ‘aofiva‘e, kuo u ‘atu ni mo‘omoutolu, ‘o hangē ko e lea na‘a ku fai kia Mōsese.#Teu 11.24-25 4Te mou ngata mei he Toafa pea mo Lepanoni ena, ‘o fai atu ki he vaitafe lahi, ‘a ‘Eufaletesi, ko e fonua kotoa ‘o ha‘a Heti, ‘o a‘u ki he tahi lahi ‘i he tō‘anga la‘ā. 5‘E ‘ikai lava ‘e ha taha ke tu‘u kiate koe lolotonga ho‘o mo‘ui: hangē ko ‘eku ‘ia Mōsese, ‘e pehē ‘eku ‘iate koe: ‘e ‘ikai te u fakatukuhāusia‘i koe, ‘uma‘ā ha‘aku li‘aki.#Teu 31.6,8; Hep 13.5 6Ke ke lototo‘a ‘o tu‘u kalikali; he ko koe te ke fakahoko ki he kakai ni honau tofi‘a, ‘a e fonua na‘a ku fuakava ai ki he‘enau ngaahi kui ke foaki mo‘onautolu.#Teu 31.6,7,23 7Kehe pē ke ke lototo‘a, mo ke tu‘u kalikali ‘aupito, ‘o tokanga ke fai ki hono kotoa ‘o e lao, ‘a ia na‘e tu‘utu‘uni atu ‘e Mōsese ko ‘eku sevāniti: ‘oua te ke afe mei ai ki he to‘omata‘u pe ki he to‘ohema, koe‘uhi ke ke fai fakapotopoto ‘i he me‘a kotoa pē te ke ‘alu ki ai. 8‘E ‘ikai mahu‘i mei ho ngutu ‘a e tohi lao ko ia, ka te ke fakalaulauloto ki ai ‘i he ‘aho mo e pō, koe‘uhi ke ke tokanga ke fai ‘o hangē ko e me‘a kotoa kuo tohi ai; he te ke toki monū‘ia ‘i he me‘a ‘oku ke fou ai, pea te ke fai fakapotopoto ai. 9‘Ikai kuo u kouna koe? Ke ke lototo‘a, mo tu‘u kalikali; ‘oua te ke manavahē, pea ‘oua te ke tailiili; he ko Sihova ko ho ‘Otua te ne ‘iate koe ‘i he me‘a kotoa ‘oku ke ‘alu ki ai.
Ko e Fai ‘e Siosiua e ngaahi Tu‘utu‘uni ki he Kakaí
10Pea tu‘utu‘uni ‘e Siosiua ki he kau ‘ōfisa ‘o e kakai, ‘o pehē, 11Mou ‘alu atu ‘i he loto ‘apitanga, ‘o fanongonongo ki he kakai ‘o pehē, Tokonaki hamou ‘oho; he ‘i he te‘eki ke ‘osi ha ‘aho ‘e tolu te mou ‘alu atu ki he kauvai ‘e taha ‘o Soatani na, ko ho‘omou ‘alu atu ke ma‘u ‘a e fonua, ‘a ia ‘oku ‘atu ‘e Sihova ko homou ‘Otua ke mou ma‘u.
12Pea lea ‘a Siosiua ki ha‘a Lūpeni, mo ha‘a Kata, mo e vaeua ‘o e matakali ‘o Manase, ‘o pehē,#Nōm 32.28-32; Teu 3.18-20; Sios 22.1-6 13Manatu ki he me‘a na‘e tu‘utu‘uni kiate kimoutolu ‘e Mōsese ko e Sevāniti ‘a Sihova, ‘o pehē, Ko Sihova ko homou ‘Otua ‘oku ne tuku ke mou mālōlō, pea te ne foaki kiate kimoutolu ‘a e fonua ko eni. 14Ko homou kau fefine, ko homou tamaiki, mo ho‘omou fanga manu, te nau nofo ‘i he fonua na‘e ‘atu ‘e Mōsese ‘i he feitu‘u mai ki heni ‘o Soatani; ka ko kimoutolu te mou laka fakakongakau ‘i he ‘ao ‘o homou kāinga ke tokoni kiate kinautolu, ‘io, ‘a ho‘omou kau to‘a kotoa pē; 15kae‘oua ke tuku ‘e he ‘Eiki ke mālōlō homou kāinga, ‘o hangē ko kimoutolu, pea nau ma‘u ‘e kinautolu foki ‘a e fonua kuo tuku mo‘onautolu ‘e Sihova ko homou ‘Otua: pea te mou toki foki ki he fonua kuo tō kiate kimoutolu, pea te mou ma‘u ia, ‘a e fonua na‘e ‘atu ‘e Mōsese ko e Sevāniti ‘a Sihova ‘i he feitu‘u ‘o Soatani ki he hopo‘anga la‘ā.
16Pea na‘a nau tali kia Siosiua, ‘o pehē, Ko e me‘a kotoa pē kuo ke tu‘utu‘uni mai te mau fai, pea ‘ilonga ha potu te ke fekau kimautolu ki ai te mau ‘alu. 17Hangē ko ‘emau fakaongo kia Mōsese ‘i he me‘a kotoa pē, ‘e pehē ‘emau fakaongo kiate koe: kehe pē ke ‘iate koe ‘a Sihova ko ho ‘Otua, ‘o hangē ko ‘ene ‘ia Mōsese. 18‘Ilonga ha taha te ne paetaku ho‘o fekau, ‘o ‘ikai te ne talangofua ki he me‘a ‘oku ke tala ‘i ha‘o tu‘utu‘uni ‘e fai kiate ia, ‘e mate ‘a e tangata ko ia: kehe pē ke ke lototo‘a, mo ke tu‘u kalikali.
Currently Selected:
KO SIOSIUA 1: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
