KAU FAKAMAAU 4
4
Ko Tepola mo Pēlake
1PEA na‘e toe fai ‘e ha‘a ‘Isileli ‘a e me‘a na‘e tau kovi ki he finangalo ‘o Sihova, hili ‘a e pekia ‘a ‘Ēhuti. 2Pea na‘e fakatau kinautolu ‘e he ‘Eiki ki he nima ‘o Siapini ko e Tu‘i Kēnani, ‘a ia na‘e hau ‘i Hasoa; pea ko e kapiteni ‘o ‘ene tau ‘a Sīsela, ‘a ia na‘a ne nofo ‘i Haloseti Senitaile. 3Pea tautapa ‘a ha‘a ‘Isileli kia Sihova: he na‘e ‘iate ia ‘a e sāliote ukamea ‘e hivangeau; pea ko e me‘a fakamamahi ‘ene fakamo‘ulaloa ‘a ha‘a ‘Isileli, ‘o uofulu ta‘u.
4Pea ko Tepola ko e fefine palōfita, ko e uaifi ‘o Lapitoti, ko ia ia na‘a ne fai fakamaau ‘i ‘Isileli ‘i he taimi ko ia. 5Pea na‘a ne nofo ‘i he lolo Paame ‘o Tepola, ‘i he vaha‘a ‘o Lama mo Pēteli ‘i he fonua mo‘unga ‘o ‘Ifalemi; pea na‘e ‘alu hake kiate ia ‘a ha‘a ‘Isileli ke fai honau fakamaau. 6Pea fekau atu ‘e ia, ‘o ui mai ‘a Pēlake ko e foha ‘o ‘Apinoame mei Kētesi Nafitalai, pea ne pehē kiate ia, ‘Ikai kuo fekau ‘e he ‘Eiki ko e ‘Otua ‘o ‘Isileli, ‘o pehē, ‘Alu ‘o fakatē tau ‘i he mo‘unga ko Tepoa, pea ‘alu mo koe ha toko taha mano mei ha‘a Nafitalai mo ha‘a Sepulone? 7Pea te u fakatē mai kiate koe ki he luoki vai ‘o Kīsoni ‘a Sīsela ko e ‘eikitau ‘a Siapini, mo ‘ene ngaahi sāliote mo ‘ene hōsitē; pea te u tuku ia ki ho nima.
8Pea tali ‘e Pēlake kiate ia, Kapau te ta ō mo koe, pea te u ‘alu pē; pea kapau ‘e ‘ikai te ta ō mo koe, pea ‘e ‘ikai te u ‘alu.
9Pea pehē ‘e ia, Seuke, te ta ō pē: ka neongo ia, ka ‘oku ‘ikai ko koe te ke lāngilangi‘ia ‘i he me‘a te ke ‘alu ke fai; koe‘uhi ‘e fakatau ‘e he ‘Eiki ‘a Sīsela ki he nima ‘o ha fefine. 10Pea tu‘u ‘a Tepola, ‘o ‘alu mo Pēlake ki Kētesi. Pea fanongonongo ‘e Pēlake ke ha‘u ‘a Sepulone mo Nafitalai ki Kētesi; pea na‘a ne ‘alu hake ‘oku muimui kiate ia ha toko taha mano: pea na‘e ō mo ia ‘a Tepola.
11Pea ko Hepa ko e tangata Keini, kuo ne mavahe mei ha‘a Keini, mei he hako ‘o Hōpapi ko e kāinga mali ‘o Mōsese, pea kuo a‘u ki he ‘oke ‘i Sa‘ananimi ‘ene hiki tēniti, ‘a e potu ‘oku kau ki Kētesi.
12Pea na‘e fakahā kia Sīsela, kuo ‘alu hake ‘a Pēlake ko e foha ‘o ‘Apinoame ki he mo‘unga ko Tepoa. 13Pea fanongonongo ‘e Sīsela ke fakataha mai ‘ene ngaahi sāliote kotoa pē, ko e sāliote ukamea ‘e hivangeau, pea mo e kakai kotoa na‘e ‘iate ia ke nau hiki mei Haloseti Senitaile ki he luoki vai Kīsoni.
14Pea lea ‘a Tepola kia Pēlake, Tu‘u, he ko e ‘aho eni kuo tuku ai ‘e Sihova ‘a Sīsela ki ho nima: ‘ikai kuo mu‘omu‘a atu ‘a e ‘Eiki? Ko ia na‘e ‘alu hifo ‘a Pēlake mei he mo‘unga ko Tepoa, pea muimui ki ai ha kau tangata ‘e toko taha mano. 15Pea veuveuki ‘e Sihova ‘a Sīsela mo ‘ene ngaahi sāliote mo ‘ene tau kotoa ‘aki ‘a e mata ‘o e heletā ‘i he ‘ao ‘o Pēlake; pea na‘e ‘alu hifo ‘a Sīsela mei he‘ene sāliote, ‘o ne hola ‘i lalo. 16Ka ka tuli ‘a Pēlake ki he tau sāliote mo e hōsitē, ‘o a‘u ki Haloseti Senitaile: pea na‘e tō ‘a e tau kotoa ‘a Sīsela ‘i he mata ‘o e heletā; na‘e ‘ikai toe ha taha.
17Ka ko Sīsela na‘a ne hola ‘i lalo ki he tēniti ‘o Siaili ko e uaifi ‘o Hepa ko e Keini: he na‘e lelei ‘a e vā ‘o Siapini ko e Tu‘i Hasoa pea mo e fale ‘o Hepa ko e ha‘a Keini. 18Pea hū kitu‘a ‘a Siaili ke fakafetaulaki kia Sīsela, pea ne pehē ki ai, Afe mai kiate au, Tangata‘eiki; afe mai, ‘oua te ke manavahē. Pea ne afe kiate ia, ‘o hū ki he tēniti, ‘o ne ‘ai hono kafu.#4.18 ‘o ne… kafu; ‘Oku ngali tonu hono hiki ‘o: na‘á ne fufuu‘i ia he tu‘a puipui; pe na‘á ne ‘ufi‘ufi‘i ‘aki ia ha kafu. 19Pea pehē ‘e ia ki he fefine, ‘Omi mu‘a haku me‘i vai ke u inu; he ‘oku ou fie inua. Pea na‘a ne to‘o ha hina hu‘akau ‘o ne ‘ange hano inu, ‘o ne ngaohi hono kafu. 20Pea ne pehē ki he fefine, Ke ke tu‘u koe ‘i he mata tēniti, pea ka ai ha taha ‘e hau ‘o ‘eke atu, ‘o pehē, ‘Oku ‘i hena ha tangata? Pea ke tali, ‘Ikai.
21Pea hanga ai ‘a Siaili ko e uaifi ‘o Hepa, ‘o ne to‘o ha fa‘o ‘o e tēniti, ‘o ne ala ki he hāmala, ‘o ne faka‘ete‘ete atu, ‘o ne tuki ‘a e fa‘o ki hono manifinifihanga, pea na‘e ‘asi atu ia ki he kelekele; he na‘e ma‘u pē ‘ene mohe he‘ene ongosia. Ko ia na‘a ne pekia. 22Pea ‘iloange ko Pēlake ē ‘oku ne tuli kia Sīsela. Pea hū kitu‘a ‘a Siaili, ke fakafetaulaki kiate ia, ‘o ne pehē ki ai, Ha‘u, ka u fakahā kiate koe ‘a e tangata ‘oku ke kumi ki ai. Pea ne ‘alu ange; pea tā ko Sīsela ‘oku tekefili hena, kuo pekia, pea na‘e ‘i hono manifinifihanga ‘a e fa‘o.
23Ko ia na‘e fakavaivai‘i ‘e he ‘Otua ‘i he ‘aho ko ia ‘a Siapini ko e Tu‘i Kēnani ‘i he ‘ao ‘o ha‘a ‘Isileli. 24Pea na‘e fakautuutu ai pē ‘a e mamafa ‘o e nima ‘o ha‘a ‘Isileli kia Siapini ko e Tu‘i Kēnani, kae‘oua ke ‘auha ‘a Siapini ko e Tu‘i Kēnani.
Currently Selected:
KAU FAKAMAAU 4: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.