KAU FAKAMAAU 2
2
Ko e ‘Asi ‘a e ‘Āngelo ‘a Sihová ‘i Pōkimi
1PEA hā‘ele hake ‘a e ‘Āngelo ‘a Sihova mei Kilikali ki Pōkimi. Pea ne folofola mai, Na‘a ku ‘ohake kimoutolu mei ‘Isipite, pea u fakahū kimoutolu ki he fonua ‘a ia na‘a ku fuakava ai ki ho‘omou ngaahi kui; pea u pehē, ‘E ‘ikai te u vete ‘eku kovinānite mo kimoutolu ‘o ta‘engata. 2Pea ko kimoutolu ‘e ‘ikai te mou fai talite mo e kakai ‘o e fonua ni: te mou holoki honau ngaahi ‘ōlita: ka kuo ‘ikai te mou tokanga ki he‘eku lea. Ko e hā ‘eni kuo mou fai?#‘Eki 34.12-13; Teu 7.2-5 3Ko ia kuo u pehē foki, ‘E ‘ikai te u kapusi kinautolu mei homou ‘ao; ka te nau nofo ko e ngaahi me‘a kinisi ki homou vakavaka#2.3 ko e… vakavaká; Ko hono faka-Hepeluú: ko homou vakavaká; ka ‘oku ngali tonu ange ‘a e ko homou ngaahi fili. pea ‘e hoko honau ngaahi ‘otua ko e tauhele kiate kimoutolu. 4Pea ‘i he lea pehē ‘a e ‘Āngelo ‘a Sihova ki he fakataha ‘o ha‘a ‘Isileli, na‘e ‘ai ‘e he kakai ha‘anau fu‘u fākafoa. 5Ko ia na‘e fakahingoa ai ‘a e potu ko ia ko Pōkimi (ko e Kau Tangi) pea na‘a nau fai feilaulau ai kia Sihova.
Ko e Mālōlō ‘a Siosiuá
6Pea ‘i he tukuange ‘e Siosiua ‘a e kakai, na‘e ‘alu ‘a ha‘a ‘Isileli takitaha ki hono tofi‘a ke ma‘u ‘a e fonua. 7Pea na‘e tauhi ‘a Sihova ‘e he kakai lolotonga ‘a e mo‘ui ‘a Siosiua, pea lolotonga ‘a e mo‘ui ‘a e kau mātu‘a na‘a nau tolonga ‘ia Siosiua, ‘a kinautolu na‘a nau mamata ki he ngāue lahi ‘a Sihova, ‘a ia kuo ne fai ma‘a ‘Isileli. 8Pea pekia ‘a Siosiua ko e foha ‘o Nuni, ko e Sevāniti ‘a Sihova, kuo teau mā hongofulu mālie hono ta‘u. 9Pea na‘a nau telio ia ‘i he ngata‘anga ‘o hono tofi‘a, ‘i Tīminati-hēlesi ‘i he fonua mo‘unga ‘o ‘Ifalemi, ‘i he potu tokelau ‘o e mo‘unga ‘o Kā‘asi.#Sios 19.49-50 10Pea ko e to‘utangata ko ia foki na‘a nau ului ki he‘enau ngaahi kui pea na‘e tupu kimui ha to‘utangata kehe, ‘a ia kuo ‘ikai te nau ‘ilo ‘a Sihova, ‘uma‘ā ‘a e ngāue na‘a ne fai ma‘a ‘Isileli.
Ko e Li‘aki ‘e he Kakai ‘Isilelí ‘Enau Lotu kia Sihová
11Pea na‘e fai ‘e ha‘a ‘Isileli ‘a e me‘a na‘e tau kovi ki he finangalo ‘o Sihova, ‘o nau tauhi ‘a e ngaahi Peali. 12Pea na‘a nau li‘aki ‘a Sihova ko e ‘Otua ‘o ‘enau ngaahi kui, ‘a ia na‘a ne ‘ohake kinautolu mei ‘Isipite, ‘o nau muia ‘a e ngaahi ‘otua kehe, ha ngaahi ‘otua ‘o e kakai na‘e nofo takatakai kiate kinautolu, pea nau punou ki ai: pea na‘a nau fakahouhau‘ia ‘a Sihova. 13‘Io, na‘a nau li‘aki ‘a Sihova, ‘o nau tauhi kia Peali mo ‘Asiteloti. 14Pea langa‘i ai ‘a e houhau ‘a Sihova kia ‘Isileli, pea na‘a ne tuku kinautolu ki he nima ‘o e kau vete, ‘a ia na‘a nau vete kinautolu, pea na‘a ne fakatau kinautolu ki he nima ‘o honau ngaahi fili takatakai; ko ia na‘e ‘ikai te nau kei lava ke tu‘u ‘i he ‘ao ‘o honau ngaahi fili. 15‘Ilonga ha me‘a na‘a nau ‘alu ki ai, na‘e kau ‘a e ‘Eiki ke nau kovi ai, ‘o hangē ko ‘ene folofola, pea mo ‘ene fuakava kiate kinautolu: pea na‘a nau faingata‘a‘ia ‘aupito.
16Pea na‘e toki fokotu‘u ‘e Sihova ha kau fakamaau, ‘a ia na‘a nau taukapo‘i kinautolu mei he nima ‘o e kakai na‘e vete kinautolu. 17Ka na‘e ‘ikai foki te nau tokanga ki honau kau fakamaau, ka na‘a nau tango ki he ngaahi ‘otua kehe, ‘o punou ki ai: na‘e vave ‘enau afe mei he hala na‘e fou ai ‘enau ngaahi kui, ‘enau tokanga ki he ngaahi tu‘utu‘uni ‘a Sihova; na‘e ‘ikai fai pehē ‘e kinautolu. 18Pea ‘oka fokotu‘u ‘e Sihova hanau fakamaau, na‘e kau ‘a e ‘Eiki mo e fakamaau ko ia, ‘o ne fakahaofi kinautolu mei he nima ‘o honau ngaahi fili, lolotonga ‘a e mo‘ui ‘a e fakamaau: he na‘e fakatomala ‘a e ‘Eiki ‘i he‘enau to‘e koe‘uhi ko e kakai na‘e fakamo‘ulaloa mo laiki kinautolu. 19Pea ‘i he faifai pea pekia ‘a e fakamaau, na‘a nau holomui, ‘o fai kovi ange ‘i he‘enau ngaahi tamai ‘enau muia ‘a e ngaahi ‘otua kehe, ke tauhi mo punou ki ai; na‘e ‘ikai te nau tuku ha me‘a ‘o ‘enau ngaahi tō‘onga mo honau ‘alunga fefeka. 20Pea langa ai ‘a e houhau ‘o Sihova ki ha‘a ‘Isileli; pea ne folofola ‘o pehē, Ko e me‘a ‘i he hiki ‘a e pule‘anga ni mei he kovinānite na‘a ku tu‘utu‘uni ki he‘enau ngaahi kui, ‘o ‘ikai te nau fakaongo ki hoku le‘o; 21ko au foki ‘e ‘ikai te u toe kapusi ha taha mei honau ‘ao, ‘i he ngaahi pule‘anga na‘e tuku ‘e Siosiua ‘i he‘ene pekia: 22koe‘uhiā ke u sivi ‘aki ‘a ha‘a ‘Isileli, pe te nau tauhi pe ‘ikai ‘a e ‘alunga ‘o Sihova ke fou ai, ‘o hangē ko e tauhi ki ai ‘e he‘enau ngaahi kui. 23Ko ia na‘e tuku ai pē ‘e Sihova ‘a e ngaahi pule‘anga ko ē, ‘o ‘ikai te ne kapusi vave; pea ‘ikai foki te ne tukuange kinautolu ki he nima ‘o Siosiua.
Currently Selected:
KAU FAKAMAAU 2: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
