KAU FAKAMAAU 13
13
Ko e Fā‘ele‘i ‘o Samisoní
1PEA toe fai ‘e ha‘a ‘Isileli ‘a e me‘a na‘e tau kovi ki he finangalo ‘o Sihova; pea tuku kinautolu ‘e Sihova ki he nima ‘o e kau Filisitia, ‘o fāngofulu ta‘u.
2Pea na‘e ai ha tangata mei Sola, na‘e kau ki he fāmili ‘o ha‘a Tani, pea ko hono hingoa ko Mānoa; pea ko hono uaifi na‘e pa‘a ‘o ‘ikai te ne fanau. 3Pea hā ‘a e ‘Āngelo ‘a Sihova ki he fefine, ‘o ne me‘a ki ai, Sī ni, ko eni kuo ke pa‘a, ‘o ‘ikai te ke fanau: ka te ke feitama, pea te ke fā‘ele‘i ha tama tangata. 4Pea ko ia ke ke faka‘ehi‘ehi mu‘a, ‘o ‘oua te ke inu uaine, pe ha kava mālohi, pea ‘oua te ke kai ha me‘a ‘oku tapu; 5he, vakai, te ke feitama, ‘o ke fā‘ele‘i ha tama tangata, pea ‘e ‘ikai apo ha tele ki hono ‘ulu: he ko e tamasi‘i te ne nofo ko e nāsili#13.5 nāsili; Ko e nāsilí ko ha tokotaha na‘á ne fakahaa‘i ‘aki ‘ene ‘ofa he ‘Otuá ‘a ‘ene fuakava he‘ikai te ne inu pia pe kava mālohi, pe kosi hono ‘ulú, pe ala ki ha ‘anga‘anga (vakai ki he Nōm 6.1-8). kia Sihova mei hono fanau‘i: pea ko ia ia te ne kamata ke fakahaofi ‘a ‘Isileli mei ke kau Filisitia.#Nōm 6.1-5
6Pea ‘alu ‘a e fefine, ‘o tala ki hono husepāniti, ‘o pehē, Na‘e ha‘u kiate au ha tangata ‘o ‘Elohimi, pea ko hono fōtunga na‘e hangē koe fōtunga ‘o e ‘Āngelo#13.6 ‘o e ‘Āngelo; pe ‘o ha ‘āngelo. ‘a ‘Elohimi, ‘o fakailifia faufau; pea na‘e ‘ikai te u fehu‘i pe ko e toko taha mei fē, pea na‘e ‘ikai te ne tala kiate au hono hingoa. 7Ka na‘a ne pehē kiate au, Sī ni, te ke feitama, pea te ke fā‘ele‘i ha tama tangata; pea ko eni, ‘oua te ke inu ha uaine, pe ha kava mālohi, pea ‘oua te ke kai ha me‘a ‘oku tapu; he ko e tama te ne nofo ko e nāsili ki he ‘Otua mei hono fanau‘i, ‘o a‘u ki he‘ene pekia.
8Pea lotu ‘a Mānoa ki he ‘Eiki, ‘o pehē, ‘Ātonai ē, tuku ke toe ha‘u kiate kimaua ‘a e tangata ‘o ‘Elohimi ‘a ia na‘a ke fekau mai, ke hīnoi‘i kimaua ‘i ha me‘a te ma fai ki he tama ‘e fā‘ele‘i.
9Pea tali ‘e ‘Elohimi ‘a e lea ‘a Mānoa; pea na‘e toe ha‘u ‘a e ‘Āngelo ‘a ‘Elohimi ki he fefine, ‘oku ne nofo ‘i he vao: ka na‘e ‘ikai ‘iate ia ‘a Mānoa ko hono husepāniti. 10Pea fakavave ‘a e fefine, ‘o ne lele ‘o tala ki hono husepāniti, ‘o ne pehē ki ai, ‘eni, kuo hā kiate au ‘a e tangata na‘e ha‘u he ‘aho.
11Pea tu‘u ‘a Mānoa, ‘o ne muimui ki hono uaifi, ‘o ne a‘u ki he tangata, ‘o ne pehē ki ai, Ko koe ‘a e tangata na‘e lea ki he fefine?
12Pea ne pehē, Ko au. Pea pehē ‘e Mānoa, ‘Ofa ke hoko mai ho‘o lea: ko e hā ‘a e tu‘utu‘uni ki he tamasi‘i, mo ‘ene ngāue?
13Pea folofola ‘a e ‘Āngelo ‘a Sihova kia Mānoa, Ko e me‘a kotoa na‘a ku fakahā ki he fefine, ke ne faka‘ehi‘ehi mei ai. 14‘Oku tapu kotoa ‘a e me‘a ‘oku tupu mei he vaine ha‘ane kai ai, pea ‘e ‘ikai te ne inu uaine pe ha kava mālohi; pea ‘ilonga ha me‘a ‘oku tapu pea ‘e ‘ikai te ne kai: ko e me‘a kotoa na‘a ku tu‘utu‘uni te ne fai ki ai.
15Pea lea ‘a Mānoa ki he ‘Āngelo ‘a Sihova, ‘o pehē, Ke ma ta‘ofi mu‘a koe, kae‘oua ke ma ngaohi atu ha ki‘i kosi. 16Pea folofola ‘a e ‘Āngelo ‘a Sihova kia Mānoa, Neongo ha‘o ta‘ofi au, ka ‘e ‘ikai te u tokoni ‘aki ho‘o me‘akai; pea kapau ko ho‘o teu ha feilaulau, te ke ‘atu ia kia Sihova. He na‘e ‘ikai ‘ilo ‘e Mānoa ko ha ‘āngelo ‘a Sihova ia.
17Pea lea ‘a Mānoa ki he ‘Āngelo ‘a Sihova, Ko hai ho hingoa? Koe‘uhi ‘oka hoko ho‘o ngaahi lea, pea mau fakahīkihiki koe.
18Pea folofola ki ai ‘a e ‘Āngelo ‘a Sihova, Ko e hā ‘oku ke ‘eke ai ki hoku hingoa, he ‘oku fakaofo ia?#13.18 fakaofo; pe ta‘etāea. #Sēn 32.29
19Pea to‘o ‘e Mānoa ‘a e ki‘i kosi mo e feilaulau me‘akai, ‘o ne ‘oatu ia ‘i he funga makatu‘u kia Sihova: pea na‘e fakaofo ‘ene fai: pea ko Mānoa mo hono uaifi na‘a na tu‘u ‘o sio.#13.19 pea ko Mānoa mo hono uaifí na‘á na tu‘u ‘o sio; ‘Oku tu‘u eni he faka-Hepeluú, ka ‘oku ‘ikai ‘i he ngaahi hiki fuoloa ‘e ni‘ihi. 20He ‘i he ‘iloange na‘e ‘alu hake ‘a e ulo ‘i he ‘ōlita ki langi, na‘e hā‘ele hake ‘a e ‘Āngelo ‘a Sihova ‘i he ulo ‘o e ‘ōlita; pea ko Mānoa mo hono uaifi na‘a na tu‘u ‘o sio, ‘o na tō fo‘ohifo ki he kelekele. 21Pea na‘e ‘ikai ke toe hā ‘a e ‘Āngelo ‘a Sihova kia Mānoa, pe ki hono uaifi. Na‘e toki ‘ilo ‘e Mānoa ko e ‘Āngelo ‘a Sihova ia.
22Pea pehē ‘e Mānoa ki hono uaifi, Kuo pau te ta mate, he kuo ta sio ki he ‘Otua.
23Ka ka tali ‘e hono uaifi, Ka ne ko e finangalo ‘o e ‘Eiki ke tāmate‘i kitaua, ‘e ‘ikai te ne tali ‘eta feilaulau mo e me‘akai, pea ‘e ‘ikai te ne fakahā mai ‘a e ngaahi fu‘u me‘a ko ē, pea ‘e ‘ikai te ne ongoongoa ha ngaahi me‘a pehē ‘i onopooni.
24Pea fā‘ele‘i ‘e he fefine ha tama tangata, ‘o ne fakahingoa ko Samisoni: pea na‘e tupu ‘a e tamasi‘i, pea na‘e tāpuaki‘i ia ‘e he ‘Eiki. 25Pea kamata ‘e he Laumālie ‘o Sihova ke o‘i ia ‘i ‘Apitanga-Tani, ‘i he vaha‘a ‘o Sola mo ‘Esitaoli.
Currently Selected:
KAU FAKAMAAU 13: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
