KAU FAKAMAAU 11
11
1PEA ko Sēfita, ko e tangata Kiliati, ko e fu‘u to‘a ia, ka ko e tama ‘a ha fefine fe‘auaki: pea ko e tamai ‘a Sēfita ko Kiliati. 2Pea ko e uaifi ‘o Kiliati na‘a ne fā‘ele‘i kiate ia ha ngaahi foha; pea ‘i he lalahi ‘a e fānau ‘a hono uaifi, na‘a nau kapusi ‘a Sēfita, ‘o nau pehē kiate ia, ‘E ‘ikai te ke ma‘u tofi‘a koe ‘i he fale ‘o ‘emau tamai; he ko e tama ‘a ha fefine kehe. 3Pea hola ‘a Sēfita mei hono ngaahi tokoua, ‘o ne nofo ‘i he fonua ko Topi: pea na‘e tānaki kia Sēfita ha tu‘unga me‘a hamumu, pea na‘a nau ō fano mo ia.
4Pea na‘e fuoloa, fuoloa, pea fai tau ‘a ha‘a ‘Āmoni ki ‘Isileli. 5Pea ‘i he hoko ‘a e tau ‘a ha‘a ‘Āmoni mo ‘Isileli, na‘e ō ‘a e mātu‘a Kiliati ke ‘omi ‘a Sēfita mei he fonua ko Topi. 6Pea na‘a nau pehē kia Sēfita, Ha‘u ā, ‘o hoko ko homau kapiteni, ke tau fai tau mo ha‘a ‘Āmoni.
7Pea tali ‘e Sēfita ki he mātu‘a Kiliati, ‘Ikai na‘a mou fehi‘a kiate au, pea mou kapusi au mei he fale ‘o ‘eku tamai Pea koe‘uma‘ā ho‘omou omi kiate au ‘i he hoko homou faingata‘a‘ia?
8Pea tali ‘e he mātu‘a Kiliati kia Sēfita, Ko hono ‘uhinga e ‘o ‘emau tafoki kiate koe, koe‘uhi ke tau ō mo kimautolu ke fai tau mo ha‘a ‘Āmoni, ka ke hoko ko homau ‘ulu, ‘o pule ki he kau nofo Kiliati kotoa pē.
9Pea pehē ‘e Sēfita ki he mātu‘a Kiliati, Kapau te mou fakafoki au ke fai tau mo ha‘a ‘Āmoni, pea ka tuku kinautolu ‘e Sihova ki hoku nima, te u hoko koā ko homou pule?
10Pea tali ‘e he mātu‘a Kiliati kia Sēfita, Ko Sihova ē ‘oku ne ‘afio‘i ‘etau alea. ‘Ilo ‘e kimautolu, kapau ‘e ‘ikai te mau fai ‘o hangē ko ho‘o lea! 11Pea ha‘u ‘a Sēfita mo e mātu‘a ‘o Kiliati, pea na‘e fakanofo ia ‘e he kakai ko honau ‘eiki mo kapiteni: pea fai ‘e Sēfita ‘ene ngaahi lea kotoa pē ‘i he ‘ao ‘o e ‘Eiki ‘i Mīsipa.
12Pea kouna atu ‘e Sēfita ha kau talafekau ki he tu‘i ‘o ha‘a ‘Āmoni, ke lea ki ai, ‘o pehē, Ko ho hā au kuo ke ha‘u ai kiate au, ke tau‘i hoku fonua?
13Pea tali ‘e he Tu‘i Ha‘a ‘Āmoni ki he kau talafekau ‘a Sēfita, Koe‘uhi na‘e puke ‘e ‘Isileli hoku fonua, ‘o ne ma‘u mei ‘Alanoni mo Siapoki, ‘o a‘u ki Soatani: ko ia ke ke fakafoki lelei mai ia.
14Pea toe tuku atu ‘e Sēfita ‘a e kau talafekau ki he Tu‘i Ha‘a ‘Āmoni: 15‘o ne pehē ki ai, Ko e lea eni ‘a Sēfita, Na‘e ‘ikai puke ‘e ‘Isileli ‘a e fonua ‘o Moape, pe ko ha‘a ‘Āmoni; 16ka ‘i he‘enau ‘alu hake mei ‘Isipite, pea fononga ‘a ‘Isileli ‘i he Toafa ki he Tahi Kulokula, ‘o ne a‘u ki Kētesi; 17pea na‘e toki tuku atu ‘e ‘Isileli ha kau talafekau ki he Tu‘i ‘Ītomi, ke lea ki ai, ‘o pehē, Ka u laka atu mu‘a ‘i ho fonua. Ka ka ‘ikai tali ‘e he Tu‘i ‘Ītomi. Pea pehē foki ‘ene fekau atu ki he Tu‘i Moape, kae ‘ikai loto mo ia ki ai: pea na‘e nofo ‘a ‘Isileli ‘i Kētesi.#Nōm 20.14-21 18Pea ne fononga ‘i he Toafa, ‘o ne ‘alu takatakai ki ‘Ītomi mo Moape, ‘o ne a‘u ki he potu hahake ‘o e fonua ko Moape; pea nau fokotu‘u tēniti ‘i he potu ki kō ‘o ‘Alanoni; pea na‘e ‘ikai te nau laka mai ki he fonua ‘o Moape, he ko ‘Alanoni ko e kau‘ā ‘o Moape.#Nōm 21.4 19Pea tuku atu ‘e ‘Isileli ha kau talafekau kia Sīhoni ko e Tu‘i ‘Āmoli, ko e Tu‘i Hesiponi; pea lea ‘a ‘Isileli kiate ia, Ka mau laka atu mu‘a ‘i ho fonua, ke u a‘u ki he feitu‘u ‘o‘oku.#Nōm 21.21-24 20Ka na‘e ‘ikai falala ki ‘Isileli ‘e Sīhoni ke nau laka atu ‘i hono loto fonua; ka ne fakataha ‘e ia hono kakai kotoa, ‘o tali tau ‘i Siahasa, ‘o ne tau mo ‘Isileli, 21ka ko Sihova ko e ‘Otua ‘o ‘Isileli na‘a ne tuku ‘a Sīhoni mo hono kakai kotoa ki he nima ‘o ‘Isileli, pea na‘a nau taa‘i kinautolu. Ko ia na‘e ma‘u ‘e ‘Isileli ‘a e ngaahi feitu‘u kotoa ‘o e kau ‘Āmoli, ‘a ia na‘a nau nofo ‘i he fonua ko ia; 22‘io, na‘a nau ma‘u ‘a e tafafonua kotoa ‘o e kau ‘Āmoli mei ‘Alanoni ki Siapoki, pea mei he Toafa ki Soatani. 23Ko ia ko Sihova, ko e ‘Otua ‘o ‘Isileli na‘a ne kapusi ‘a e kau ‘Āmoli mei he ‘ao ‘o hono kakai ‘Isileli, pea te ke ma‘u ‘e koe koā ‘a e fonua? 24Ka ai ha me‘a ‘oku ‘atu ‘e ho ‘otua ko Kīmosi ke ke ma‘u, ‘ikai te ke ma‘u ia? Ko ia, ‘ilonga ha fonua kuo kapusi mei homau ‘ao ‘a e kakai ‘e Sihova ko homau ‘Otua te mau ma‘u ia. 25Pea ko eni, hoke lelei hake koā ‘ia Pēlaki ko e foha ‘o Sīpoa ko e Tu‘i Moape? Pea hono momo‘i fakakikihi ‘e ia mo ‘Isileli, pe fai tau mo kinautolu?#Nōm 22.1-6 26Ko e nofo ē ‘a ‘Isileli ‘i Hesiponi mo hono ngaahi kolo fakaongo, mo ‘Aloeli mo hono ngaahi kolo, mo e ngaahi kolo kehekehe ‘oku tu‘u ‘i he tafa‘aki ‘o ‘Alanoni, ‘o tolungeau ta‘u: pea ko e hā na‘e ‘ikai te mou hamusi ai ia ‘i he fu‘u taimi ko ē? 27Ko ia ‘oku ‘ikai ko au ‘oku hia, ka ko koe kuo ke fai kovi kiate au ke fai tau kiate au: ko Sihova ko e Fakamaau, ‘e fakamaau ‘e ia he ‘aho ni ‘i he vaha‘a ‘o ha‘a ‘Isileli mo ha‘a ‘Āmoni. 28Ka ka ‘ikai tokanga ‘e he Tu‘i Ha‘a ‘Āmoni ki he lea ‘a Sēfita, ‘a ia na‘a ne fekau ke fai kiate ia.
29Pea hā‘ele kia Sēfita ‘a e Laumālie ‘o e ‘Eiki, ‘o ne laka atu ‘i Kiliati mo Manase, pea ne laka atu ‘i Misipa-Kiliati, pea ne hiki mei Misipa-Kiliati ke ‘alu atu ki ha‘a ‘Āmoni. 30Pea fai ‘e Sēfita ‘ene tukumo‘ui ‘ia Sihova, 31Kapau te ke tuku mo‘oni ‘a ha‘a ‘Āmoni ki hoku nima, pea ka pehē, pea ‘ilonga ‘a ia ‘e fuofua ha‘u mei he matapā ‘o hoku fale ke fakafetaulaki kiate au ‘i he‘eku foki tu‘umālie mai mei ha‘a ‘Āmoni, ‘e ‘a Sihova ia; pea te u ‘atu ia ko e feilaulau-mōifua.
32Pea hā‘ele atu ‘a Sēfita ki ha‘a ‘Āmoni, ke tau‘i kinautolu, pea na‘e tuku kinautolu ‘e he ‘Eiki ki hono nima. 33Pea na‘a ne taa‘i kinautolu mei ‘Aloeli ‘o fakapehē atu ki Mīniti, ko e kolo ‘e uofulu, ‘o fai atu ki ‘Ēpeli-Kēlami; ko e tā lahi ‘aupito. Ko ia na‘e fakavaivai‘i ‘a ha‘a ‘Āmoni ‘i he ‘ao ‘o ha‘a ‘Isileli.
Ko e ‘Ōfefine ‘o Sēfita
34Pea ha‘u ‘a Sēfita ki Mīsipa ki hono fale, pea tā ko hono ‘ōfefine ‘ena ‘oku hū mai ke fakafetaulaki kiate ia, mo e ngaahi nafa fāngongo mo e me‘e; pea ko si‘ene me‘a pē taha ia; na‘e ‘ikai hano toe foha pe ‘ōfefine. 35Pea ‘i he ‘iloange na‘a ne mamata kiate ia, na‘a ne haehae hono kofu, ‘o ne pehē, ‘Oiauē nga‘ata, kuo ke mātu‘aki fakatōkilalo‘i au; ‘io, ko e taha koe ‘o hoku kau fakamamahi: he kuo u fa‘ai hoku poko‘i ngutu ni ki he ‘Otua, pea ‘e ‘ikai te u lava ke foki.#Nōm 30.2
36Pea pehē ‘e he fefine kiate ia, ‘Alā, kuo mafa‘a koā ho fofonga kia Sihova? Pe‘i fai kiate au ‘o fakatatau ki he me‘a kuo hū atu mei ho fofonga; kaekehe kuo ngāue ma‘au ‘a Sihova, ‘o ne fai ‘a e sauni ma‘au ki ho ngaahi fili ko ha‘a ‘Āmoni. 37Pea pehē ‘e he fefine ki he‘ene ‘eiki, Taumaiā ke fai eni kiate au! ke tuku ai pē au ‘o māhina ua, ka u ‘alu hifo ki he ngaahi mo‘unga, ‘o tēngihia ‘eku mate tāupo‘ou, ‘e au mo hoku ngaahi takanga. 38Pea pehē ‘e ia, ‘Alu: pea ne tukuange ia ‘i he māhina ‘e ua: pea ne ‘alu, ‘e ia mo hono ngaahi takanga, ‘o ne tēngihia ‘i he ngaahi mo‘unga ‘a ‘ene mate tāupo‘ou. 39Pea ‘i he ‘osi ‘a e māhina ‘e ua, na‘a ne foki ki he‘ene ‘eiki, pea ne fai kiate ia ‘o hangē ko ‘ene tukumo‘ui: pea kuo ‘ikai te ne ‘ilo ha tangata.
40Pea na‘e hoko ia ko e tu‘utu‘uni ‘i ‘Isileli, ko e ta‘u kotoa pē na‘e ‘alu ‘a e kau ta‘ahine ‘Isileli ke sani ‘a e ‘ōfefine ‘o Sēfita, ko e tangata Kiliati, ‘o ‘aho fā ‘i he ta‘u.
Currently Selected:
KAU FAKAMAAU 11: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
