KO ‘AISEA 49
49
Ko ‘Isileli, Ko e Maama ma‘á e ngaahi Pule‘angá
1FANONGO, ‘a e ngaahi motu, kiate au;#Sel 1.5 pea tokanga mai ‘a e ngaahi fa‘ahinga mama‘o: talu hoku fanau‘i mo e ui au ‘e Sihova; talu mei he manava ‘o ‘eku fa‘ē mo ‘ene takua hoku hingoa. 2Pea na‘a ne ngaohi hoku ngutu ke hangē ko e heletā māsila,#Hep 4.12; Fkhā 1.16 na‘a ne fufū au ‘i he malu ‘o hono nima;#49.2 na‘á ne fufū… nimá; pe na‘á ne malu‘i au ‘aki hono nima ‘o‘oná. pea kuo ne ngaohi au ko e ngahau kuo oloolo, kuo ne fakapuli au ‘i he‘ene hōfangahau. 3Pea ne folofola kiate au, Ko ‘eku sevāniti koe; si‘i ‘Isileli, ‘a koe ‘oku ou tu‘u ai ‘eku faka‘ofo‘ofa. 4Ka u pehē ‘e au, Kuo u fakaongosia noa, kuo ‘osi hoku mālohi ‘i he koto nge‘esi mo muna: ka neongo ia, ka ko ‘eku totonu ‘oku ‘ia Sihova pē, pea ko ‘eku ngāue#49.4 pe totongi. ‘oku ‘i hoku ‘Otua pē. 5Ka ‘oku folofola eni ‘a Sihova, ‘a ia na‘a ne ngaohi au talu hoku fanau‘i ke hoko ko ‘ene sevāniti, ke fakafoki ‘a Sēkope kiate ia, pea ke fai ‘a e tānaki ‘a ‘Isileli kiate ia; (he ‘oku ou hā lāngilangi kia Sihova, pea ko hoku ‘Otua kuo ne hoko ko hoku mālohinga).
6Pea ne folofola mai,#‘Ais 42.6; Luk 2.32; Ngā 13.47; 26.23 Ko ho‘o hoko ko ‘eku Sevāniti ke toe fokotu‘u ‘a e ngaahi matakali ‘o Sēkope, pea ke fakafoki ‘a e toenga tauhi ‘o ‘Isileli, ko e me‘a si‘i ia: ka te u tuku koe ko e maama ki he ngaahi pule‘anga,#49.6 ki he ngaahi pule‘angá; pe ki he Senitailé. ke hoko ko ‘eku fakamo‘ui‘anga ‘o a‘u ki he ngata‘anga ‘o māmani. 7Ko e folofola eni ‘a Sihova ko e Koeli ‘o ‘Isileli, mo hono Tāpuhā, kiate ia ‘oku ta‘etoka‘i ‘ene mo‘ui, kiate ia ‘oku fakalili‘a ki ai ‘a e kakai, ki he sevāniti ‘o e kau pule: ‘E sio ki ai ‘ani tu‘i, ‘o nau tu‘u ki ‘olunga, ‘ani hou‘eiki, ‘o nau fo‘ohifo ‘i hono ‘ao; telia ‘a Sihova hono kuo ne fai ki he‘ene lea, telia ‘a e Tāpuhā ‘o ‘Isileli he kuo ne fili koe.
Ko e Fakaato ‘o Selusalema
8Ko e folofola eni ‘a Sihova,#2 Kol 6.2 Ko e taimi tali hū kuo u ongo‘i ai koe, pea ko e ‘aho fai fakamo‘ui kuo u tokoni ai koe: pea te u tauhi koe, pea te u tuku koe ko e kovinānite ki he kakai, ke langa ‘a e fonua, ke vahe ‘a e ngaahi tofi‘a kuo li‘aki, 9ke tala ki he kau pōpula, Mou ō ki tu‘a; pea ke tala kiate kinautolu ‘oku ‘i he po‘uli, hā ki he maama. Te nau kaikai ‘i he ngaahi hala, pea te nau ma‘u me‘akai ‘i he ngaahi mo‘unga molemole. 10‘E ‘ikai te nau fiekaia, pea ‘e ‘ikai te nau fie inua;#Fkhā 7.16-17 pea ‘e ‘ikai taa‘i kinautolu ‘e he vakaloa pe ko e la‘ā: he ko ia ‘oku ne faka‘atu‘i kinautolu ‘e fai honau taki, pea te ne fakamuimui kinautolu ki he potu ‘oku vaipuna‘ia. 11Pea te u ngaohi hoku ngaahi mo‘unga kotoa ke hala‘anga, pea ko hoku ngaahi hala tanu ‘e toe tanu hake. 12Vakai, ‘oku ha‘u ‘a e fa‘ahinga ko ē mei he mama‘o: pea vakai, ‘oku ha‘u ‘a e fa‘ahinga ko ē mei he tokelau mo lulunga; pea mo e fa‘ahinga ko ē mei he fonua ‘o e kau Siaina.#49.12 Siaina; pe Sini.
13Pā mavava ‘a e ngaahi langi;
Pea tome‘e ‘a māmani;
Hiki tuē ‘a e ngaahi mo‘unga:
He kuo fakamānava hake ‘e Sihova hono kakai,
‘Oku ne faka‘atu‘i si‘ene kau ta‘eliekina
14Ka ‘oku pehē ‘e Saione, Kuo li‘aki au ‘e Sihova, pea kuo ngalo au ‘ia ‘Ātonai.
15‘E mangalo koā ‘i ha finemotu‘a ‘ene tamasi‘i kei huhu, ke ‘oua te ne faka‘atu‘i ‘a e tama ‘a hono manava? Tala atu, ka ne mangalo ‘a e fa‘ahinga ko ia, kae ‘ikai mangalo koe ‘iate au. 16Vakai, kuo u tā koe ‘i hoku ‘aofi nima; ‘oku fe‘ao ma‘u pē mo au ho ngaahi ‘ā. 17‘Oku fakavave mai ho‘o fānau;#49.17 ‘Oku tu‘u he tohi ‘e ni‘ihi: ho kau langa fo‘ou. ‘oku hū ki tu‘a meiate koe ‘a kinautolu na‘e maumau koe mo fakalusa. 18Tāngaki hake ho mata, ‘o sio takai: ‘oku tānaki mai ‘a e fu‘u fa‘ahinga ko ē ko ‘enau omi kiate koe. Tangi ‘eku mo‘ui–ko Sihova ia mei he Ta‘ehāmai–te ke ‘ai ia kotoa hangē ko e teunga, mo no‘o ia hangē ha ta‘ahine kuo polo‘i. 19He ko e me‘a ki ho ngaahi potu ‘oku lusa mo maumau, mo ho fonua kuo havehave, kuo ke hoko eni ‘o si‘i fau ‘i he nofo, pea ko e kakai na‘e folofua koe ‘oku nau mama‘o. 20Ko e fonua na‘e tupu ‘i he taimi na‘a ke pehē ‘oku ‘ikai ha fānau, te nau toe fanafana kiate koe, ‘Oku ‘efi‘efi ‘a e potu kiate au; faka‘atā ange ka u lava ke nofo. 21Pea te ke pehē ‘i ho loto, Ko hai kuo ne fanau‘i eni ma‘aku; ‘osi, ko e taha au na‘e ‘ave ‘eku fānau, pea u pa‘a, ko e fakahee‘i ‘o ‘ave? pea ko e fa‘ahinga ni, ko hai kuo ne tauhi? Vakai na‘a ku toe toko taha pē; na‘e ‘i fē fua ‘a kinautolu?
22Ko e folofola eni ‘a ‘Ātonai Sihova: Vakai, te u hiki hoku nima ki he ngaahi pule‘anga, pea te u fokotu‘u ‘eku fuka ke ‘ilo ‘e he ngaahi kakai: pea te nau ‘omi ho ngaahi foha ‘i honau kona, pea fua ho ngaahi ‘ōfefine ‘i honau uma. 23Pea ‘e hoko ‘ani tu‘i ko e tauhi ‘o ho‘o fānau, pea ‘e fakahuhu kinautolu ‘e honau ngaahi kuini: ‘oku nau fo‘ohifo ‘i ho ‘ao, ‘o ‘ai honau la‘e ki he kelekele, pea ko e efu ‘o ho va‘e te nau ‘emo; pea te ke ‘ilo ko Sihova au, ko e taha ‘oku ‘ikai ke mā ‘a kinautolu ‘oku matatali kiate ia. 24‘E ala to‘o koā mei ha helo ‘a e me‘a kuo ne ma‘u? ‘Io, ‘e toe hao mai ‘a e kau pōpula na‘e ma‘u totonu?
25‘Ā, ko e folofola eni ‘a Sihova, Na‘a mo e kau pōpula ‘a e helo, ‘e to‘o meiate ia; pea ‘e hao mai ‘a e me‘a na‘e ma‘u ‘e he nima mālohi; pea te u veipā mo ia ‘oku ne veipā mo koe, pea te u ‘omi fakamo‘ui ‘e au ki ho‘o fānau. 26Pea te u fafanga ‘a kinautolu ‘oku ngaohikovi‘i koe ‘aki ‘a e kakano ‘onautolu; pea te nau konā ‘aki honau toto, hangē ko ha‘anau inu ha uaine fo‘ou: pea ‘e ‘ilo ‘e he kakano kotoa pē ko au Sihova ko ho mo‘ui‘anga, pea ko ho Koeli ko e Mafi ‘o Sēkope.
Currently Selected:
KO ‘AISEA 49: TMB
Highlight
Copy
Compare
Share
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
