KO ‘AISEA 31
31
‘E Malu‘i ‘e he ‘Otuá ‘a Selusalema
1‘OIAUĒ! ‘a kinautolu ‘oku ‘alu hifo ki ‘Isipite ke kumi tokoni, pea ‘oku nau falala ki he fanga hoosi; mo tui ki he ngaahi sāliote, koe‘uhi ko ‘ene lahi, pea ki he kau heka hoosi koe‘uhi ko ‘enau mālohi ‘aupito; ka ‘oku ‘ikai te nau falala ki he Tāpuhā ‘o ‘Isileli, pea ‘oku ‘ikai te nau huhū kia Sihova! 2Ka ko e poto foki mo ia, pea ‘oku ne mafai ke ‘omi ‘a e kovi, pea ko ‘ene ngaahi lea ‘oku ‘ikai te ne tuku: pea te ne tu‘u ki he fale ‘o e kau pau‘u, pea ki he tokoni ‘oku fai ‘e he kau ngāue kovi. 3Pea ko ‘Isipite ko e tangata, ‘o ‘ikai ko e ‘Otua; pea ko ‘ene fanga hoosi ko e kakano, ‘o ‘ikai ko e laumālie: pea ka mafao atu ‘e Sihova hono nima, ‘e humu ‘a e tokoni, pea tō mo ia ‘oku fai ki ai ‘a e tokoni, pea te nau ‘osi kātoa pē fakataha.
4He ko eni ‘a e folofola ‘a Sihova kiate au: Hangē ko e ngungulu ‘a ha motu‘a Saione, pe manu hau, ‘i he funga ‘o ‘ene ‘a‘alu, ka kuo ui mai ‘a e fu‘ufu‘unga kau tauhi manu ke tau‘i ia; tala‘ehai ‘oku ne manavahē ki he‘enau kaila, pea ‘oku ‘ikai te ne vaivai ‘i he‘enau longoa‘a: ‘e pehē ‘a e hifo ‘a Sihova Sāpaoti ke fakatē tau ki Mo‘unga Saione, pea ki hono potu mā‘olunga. 5Hangē ha fanga manupuna ‘oku taupepe, ‘e pehē ‘a e uungi ‘e Sihova Sāpaoti ‘a Selusalema: ‘ene uungi mo fakahaofi, ‘ene lakai mo veteange.
6Ha‘a ‘Isileli, mou foki kiate ia, ‘a e ‘Afio kuo afe mama‘o mei ai ‘a e kakai.#31.6 kuo afe mama‘o mei ai ‘a e kakaí; Ko hono fakalea ia ‘i he ngaahi hiki fuoloa ‘e ni‘ihi, ka ‘oku pehē ‘i he faka-Hepeluú: kuo mou afe mama‘o mei aí. 7He ‘i he taimi ko ia, ‘e fehi‘a takitaha ki he‘ene ngaahi ‘aitoli siliva, mo ‘ene ngaahi ‘aitoli koula, ‘a ia kuo ngaohi ‘e homou nima ke mou angahala ai. 8‘E toki tō ‘a ‘Āsilia ‘i ha heletā, ka ‘oku ‘ikai ko ha heletā ‘a ha maama; ‘io, ‘e keina ia ‘e ha heletā, ka ‘oku ‘ikai ko e me‘a ‘a ha tangata: pea te ne hola telia ‘a e heletā, pea ‘e tali fatongia ‘ene kau talavou. 9Pea ko ‘ene makatu‘u, te ne mole ko ‘ene manavahē, pea ‘e mo‘utāfu‘ua hono hou‘eiki ‘i he‘enau sio ki he fuka–ko Sihova ia mei he Ta‘ehāmai, ‘a ia ‘oku ‘i Saione ‘ene ulo, pea ‘i Selusalema ‘ene fōnise.#31.9 fōnisé; pe ‘ōvani.
Currently Selected:
KO ‘AISEA 31: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
