KO ‘AISEA 22
22
1KO E kavenga mei he Ta‘ehāmai ‘a Tele‘a-Vīsone.
Ko e hā tū ‘a e me‘a kuo hoko kiate koe?
Kuo mou kātoa ai ki he tu‘a fale.
2‘a e fonu longoa‘a,
‘A e kolo vākē, ‘a e kolotau tome‘e?
Ko ho kakai tāmatea ‘oku ‘ikai ko e tāmate‘i ‘e he heletā,
Pea ‘oku ‘ikai ko e mate ‘i he tau.
3Na‘e hola fakataha ho‘o kau pule fua pē,
Na‘a nau tuku ke ha‘i kinautolu ta‘eha fana;
Ko ho kakai kotoa na‘e ma‘u na‘e ha‘i fakataha,
Kuo nau hola mama‘o.
4Ko ia ‘oku ou pehē, Hanga kehe meiate au, ka u fakamamahi tangi pē; ‘o ‘oua te mou nafui hoku fakalelu‘i, ‘eku tēngihia ‘a e maumau ‘o e pele ‘o hoku kakai. 5He ‘oku ai ha ‘aho ‘o ‘Ātonai Sihova Sāpaoti ‘i Tele‘a-Vīsone; ko e ‘aho ‘o e longoa‘a, mo e malaki, mo e maveuveu; ko e holoki ‘o e ‘ā, mo e tangi ilifia ‘oku pā ki he ngaahi mo‘unga.
6Pea ko ‘Īlami e ‘oku to‘o hōfangahau, ai mo e fononga tangata heka hoosi; pea ko Kili ē kuo to‘o ‘a e kofu ‘o e pā. 7Pea ‘oku faifai pea fonu ‘a e lelei ‘o ho ngaahi tele‘a ‘i he tau sāliote, pea ko e kau heka hoosi kuo fakatē atu ki he matanikolo. 8Te ne toki tatala ‘a e pūlou ‘o Siuta; pea ‘oku ke sio ‘i he ‘aho ko ia ki he mahafu ‘i he Fale ‘o e Vao.
9Pea ‘oku mou vakai ‘a e ngaahi holo ‘i he ‘ā ‘o Kolo-‘o-Tēvita, tā ‘oku lahi: pea ne mou tāpuni ‘a e vai ‘o e Lepa Lalo. 10Pea na‘a mou lau ‘a e ngaahi fale ‘o Selusalema, pea na‘a mou holoki ‘a e ngaahi fale ke ngaohi ‘aki ‘a e ‘ā. 11Pea na‘a mou ngaohi ha tānekinga vai ‘i he vaha‘a ‘a e ongo ‘a ki he vai ‘o e motu‘a lepa: ka na‘e ‘ikai te mou sio kiate ia na‘e ngaohi ia, pea na‘e ‘ikai te mou tokanga‘i ‘a e ‘Afio na‘a ne fai ia fuoloa atu.
12Pea ‘i he taimi ko ia na‘e ui ‘e ‘Ātonai Sihova Sāpaoti ki he fai ‘o ha tangi, mo e tangilāulau, mo e fusi ‘ulu, mo e ‘ai tauanga‘a. 13Ka vakai, ko e fakafiefia ē, mo e mavava, ko e te‘ia pulu, mo e tāmate‘i sipi, ko e kai kakano mo e inu uaine–ko e kai mo inu he ‘oku ‘apongipongi ‘etau mate.
14Pea na‘e tatala hoku telinga ‘e Sihova Sāpaoti, ‘o pehē, ‘Ilo ‘e au ‘o kapau ‘e tāmate‘i ‘a e kovi ko ena ‘amoutolu, ‘o a‘u ki ho‘omou mate. Ko e folofola ia ‘a ‘Ātonai Sihova Sāpaoti.
15Ko eni ‘a e folofola ‘a ‘Ātonai Sihova Sāpaoti, Ha‘u ange, ‘alu ki he minisitā ko ena, kia Sēpina, ‘oku pule ki he loto‘ā. 16“Ko e hā ‘au heni? Pea ko hai ‘oku ke ma‘u heni kuo ke foa ai hao faitoka heni?” Si‘ene foa ‘ene fa‘itoka ‘i ‘olunga, si‘ene tā hono toka‘anga ‘i he makatu‘u! 17Vakai, ‘oku teu fakapuna koe ‘e Sihova, ko e fakapuna ‘a ha mafi; pea te ne puke koe ke mapuke. 18Te ne mātu‘aki takai koe hangē ha fo‘i kafa, ‘o fakapuna atu hangē ha pulu ki ha fonua ‘oku ‘atā hono potu ‘osi pē; ko e potu ko ia te ke pekia ai, ko e potu ko ia ‘e ‘ave ki ai ho‘o ngaahi sāliote lāngilangi, ‘a koe ko e kula‘anga ‘o e fale ‘o ho ‘eiki. 19Pea te u fakaoma koe mei ho‘o lakanga, ‘io, te ne hae hifo koe mei ho tu‘unga.
20Pea ‘e hoko ‘i he taimi ko ia, te u ui mai ‘eku sevāniti ko ‘Īlaiakimi foha ‘o Hilikaia: 21pea te u ‘ai ki ai ho kofu ‘o‘ou, pea te u no‘o ‘aki ho no‘o, pea te u tuku ho‘o pule ki hono nima: pea te ne hoko ko e tamai ki he nofo Selusalema mo e fale ‘o Siuta. 22Pea te u hilifaki ki hono uma ‘a e kī ‘o e fale ‘o Tēvita; pea ka to‘o ‘e ia, ‘e ‘ikai tāpuni ‘e ha taha; pea ka tāpuni ‘e ia, ‘e ‘ikai to‘o ‘e ha taha. 23Pea te u tuki ia ko e fa‘o ‘i ha potu ma‘u; pea te ne hoko ko e nofo‘anga lāngilangi ki he fale ‘o ‘ene ‘Eiki.
24‘Io, ‘e fuhi ‘iate ia ‘a e fu‘u tu‘unga kotoa ‘o e fale ‘o hono tupu‘anga, ‘a e akaaka mo e ngaahi lito, ‘a e fanga ki‘i ipu mo e ngaahi ipu pēsoni ki he ngaahi ipu ‘utuvai. 25‘I he taimi ko ia–ko e folofola ia mei he Ta‘ehāmai ‘a Sihova Sāpaoti–‘e homo ‘a e fa‘o na‘e tuki ki he potu ma‘u; ‘io, ‘e mapaki pea tō; pea ‘e tu‘usi ‘a e me‘a na‘e tāupe ai: he kuo folofola ‘a Sihova.
Currently Selected:
KO ‘AISEA 22: TMB
Highlight
Share
Copy
Want to have your highlights saved across all your devices? Sign up or sign in
Tongan Moulton Bible © Bible Society of the South Pacific, 2011.
